കേരളം ഉൾപ്പെടെ അഞ്ച് സംസ്ഥാനങ്ങളിലെ നിയമസഭാ തിരഞ്ഞെടുപ്പ് തീയതികൾ മാർച്ച് 15-ന് ശേഷം കേന്ദ്ര തിരഞ്ഞെടുപ്പ് കമ്മീഷൻ പ്രഖ്യാപിക്കും. പശ്ചിമ ബംഗാളിലെ അന്തിമ വോട്ടർപട്ടികയുമായി ബന്ധപ്പെട്ട പരാതികൾ സമർപ്പിക്കാനുള്ള സമയപരിധി മാർച്ച് 15-ന് അവസാനിക്കുന്ന സാഹചര്യത്തിലാണ് പ്രഖ്യാപനം നീളുന്നത്. വരും ആഴ്ചയിലെ തിങ്കളാഴ്ചയോ ചൊവ്വാഴ്ചയോ തീയതികൾ സംബന്ധിച്ച ഔദ്യോഗിക വിജ്ഞാപനം പുറപ്പെടുവിക്കാനാണ് കമ്മീഷൻ നിലവിൽ ആലോചിക്കുന്നത്.
കേരളം, തമിഴ്നാട്, പുതുച്ചേരി എന്നീ സംസ്ഥാനങ്ങളിൽ ഒറ്റഘട്ടമായി വോട്ടെടുപ്പ് പൂർത്തിയാക്കാനാണ് കമ്മീഷന്റെ തീരുമാനം. എന്നാൽ അസമിൽ മൂന്ന് ഘട്ടങ്ങളായും, പശ്ചിമ ബംഗാളിൽ അഞ്ച് ഘട്ടങ്ങളായും വോട്ടെടുപ്പ് നടന്നേക്കാം. കഴിഞ്ഞ തവണ ബംഗാളിൽ എട്ട് ഘട്ടങ്ങളിലായി നടന്ന വോട്ടെടുപ്പ് ഇത്തവണ അഞ്ചായി ചുരുക്കുന്നു എന്നത് ശ്രദ്ധേയമാണ്. രാഷ്ട്രീയ പാർട്ടികളുടെ ആവശ്യപ്രകാരം ഏപ്രിൽ 20-നും 30-നും ഇടയിലുള്ള തീയതികളിൽ വോട്ടെടുപ്പ് നടക്കാനാണ് സാധ്യതയേറുന്നത്.
തിരഞ്ഞെടുപ്പ് സുഗമമായി നടത്തുന്നതിന്റെ ഭാഗമായി കേരളത്തിലെ പ്രശ്നബാധിത ബൂത്തുകളിൽ ഇത്തവണയും കേന്ദ്രസേനയുടെ സാന്നിധ്യമുണ്ടാകും. പ്രത്യേകിച്ചും മലബാർ മേഖലയിലെ അതീവ ജാഗ്രത വേണ്ട ബൂത്തുകളിൽ സുരക്ഷ ശക്തമാക്കുന്നതിനായി കേന്ദ്രസേനയെ വിന്യസിക്കും. തിരഞ്ഞെടുപ്പ് പ്രക്രിയയുടെ സുതാര്യതയും ക്രമസമാധാനവും ഉറപ്പുവരുത്തുന്നതിനായി വിപുലമായ സജ്ജീകരണങ്ങളാണ് കമ്മീഷൻ ഒരുക്കുന്നത്.
Kerala Assembly Election Likely in Single Phase, Announcement by Tuesday
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
