നയാഗ്ര: മേഖലയിൽ ഒരു മാസമായി നടന്നുവന്ന രഹസ്യ അന്വേഷണത്തിനൊടുവിൽ വൻ മയക്കുമരുന്ന് ശേഖരവുമായി അഞ്ചുപേരെ പോലീസ് അറസ്റ്റ് ചെയ്തു. തോറോൾഡ് സ്വദേശികളായ ബെലാലുദ്ദീൻ ഷഹാബുദ്ദീൻ (27), ജനെൽ മക്ലിയോഡ് (27), നയാഗ്ര ഫാൾസ് സ്വദേശി കൈ ചെഷയർ (25), സെന്റ് കാതറൈൻസ് സ്വദേശികളായ ട്രെവർ ഏവറി (58), ടെറി ഗ്രേ (54) എന്നിവരാണ് നയാഗ്ര റീജിയണൽ പോലീസിന്റെ പിടിയിലായത്.
കഴിഞ്ഞ ഫെബ്രുവരിയിൽ ക്രിമിനൽ ഇൻവെസ്റ്റിഗേറ്റീവ് ബ്രാഞ്ച് ആരംഭിച്ച നിരീക്ഷണമാണ് പ്രതികളിലേക്ക് എത്തിയത്. മേഖലയിലെ വിവിധ ഇടങ്ങളിൽ സംശയാസ്പദമായ രീതിയിൽ സഞ്ചരിക്കുകയും മയക്കുമരുന്ന് ഇടപാടുകൾ നടത്തുകയും ചെയ്ത ഒരാളെ കേന്ദ്രീകരിച്ചാണ് അന്വേഷണം തുടങ്ങിയത്. തുടർന്ന് ചൊവ്വാഴ്ച ഉച്ചയ്ക്ക് മൂന്ന് മണിയോടെ ലഹരിമരുന്ന് കൈമാറ്റം ചെയ്യുന്നതിനിടെ രണ്ടുപേരെ ഡിറ്റക്ടീവുകൾ പിടികൂടി. ഇവരിൽ നിന്ന് ലഭിച്ച വിവരത്തിന്റെ അടിസ്ഥാനത്തിൽ മൂന്ന് വീടുകളിലും ഒരു വാഹനത്തിലും നടത്തിയ പരിശോധനയിലാണ് മറ്റ് മൂന്ന് പ്രതികൾ കൂടി പിടിയിലായത്.
പരിശോധനയിൽ 35,200 ഡോളർ വിലമതിക്കുന്ന 160 ഗ്രാം ഫെന്റനിൽ, 28,000 ഡോളറിന്റെ മെത്താംഫെറ്റമിൻ, 13,700 ഡോളർ വിലയുള്ള കൊക്കെയ്ൻ എന്നിവയുൾപ്പെടെ ആകെ 78,000 ഡോളറിലധികം മൂല്യമുള്ള നിരോധിത മരുന്നുകൾ പോലീസ് കണ്ടെടുത്തു. കൂടാതെ 62 ഓക്സികോഡോൺ ഗുളികകളും എണ്ണായിരത്തിലധികം കനേഡിയൻ ഡോളറും മാരകായുധങ്ങളും പിടിച്ചെടുത്തിട്ടുണ്ട്. അറസ്റ്റിലായവരിൽ ഷഹാബുദ്ദീൻ, ചെഷയർ എന്നിവർ കസ്റ്റഡിയിലാണ്. മറ്റുള്ളവരെ കോടതിയിൽ ഹാജരാകണമെന്ന വ്യവസ്ഥയിൽ ജാമ്യത്തിൽ വിട്ടയച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Massive drug bust in Niagara: Five arrested with $78,000 worth of drugs
