ഫ്രെഡറിക്ടൺ: ന്യൂ ബ്രൺസ്വിക്ക് പവറിന്റെ കീഴിലുള്ള പോയിന്റ് ലെപ്രാവു ആണവ നിലയത്തിലെ അടച്ചുപൂട്ടലുകൾ മൂലമുണ്ടാകുന്ന സാമ്പത്തിക പ്രതിസന്ധി പരിഹരിക്കാൻ ഒന്റാറിയോയുമായുള്ള പുതിയ കരാർ സഹായിക്കുമെന്ന് അധികൃതർ വ്യക്തമാക്കി. നിലയത്തിന്റെ പ്രവർത്തനം സുസ്ഥിരമാക്കുന്നതിലൂടെ വൈദ്യുതി നിരക്ക് കുറയ്ക്കാൻ സാധിക്കുമെന്നാണ് വിലയിരുത്തൽ. ചൊവ്വാഴ്ച നടന്ന എനർജി ആൻഡ് യൂട്ടിലിറ്റി ബോർഡ് (EUB) പൊതു തെളിവെടുപ്പിനിടെയാണ് എൻബി പവർ സീനിയർ വൈസ് പ്രസിഡന്റ് ഡാരൻ മർഫി ഇക്കാര്യം അറിയിച്ചത്. 2026-27 വർഷത്തേക്ക് 4.75 ശതമാനം നിരക്ക് വർദ്ധനവ് നടപ്പിലാക്കാനുള്ള അപേക്ഷ ബോർഡ് പരിഗണിച്ചുവരികയാണ്.
പോയിന്റ് ലെപ്രാവു നിലയം പ്രവർത്തനരഹിതമാകുന്ന ഓരോ ദിവസവും 10 ലക്ഷം മുതൽ 15 ലക്ഷം ഡോളർ വരെയാണ് എൻബി പവറിന് പകര സംവിധാനങ്ങൾക്കായി ചിലവാകുന്നത്. കഴിഞ്ഞ ഡിസംബറിൽ 15 ദിവസം നിലയം അപ്രതീക്ഷിതമായി അടച്ചിട്ടപ്പോൾ പ്രതിദിനം 40 ലക്ഷം ഡോളർ വരെ നഷ്ടം സംഭവിച്ചിരുന്നു. 2024-25 സാമ്പത്തിക വർഷത്തിൽ നിശ്ചിതവും അല്ലാത്തതുമായ തടസ്സങ്ങൾ കാരണം നിലയം വെറും 27 ശതമാനം സമയം മാത്രമാണ് പ്രവർത്തിച്ചത്. ഈ സാഹചര്യത്തിൽ, വരും വർഷങ്ങളിൽ പ്രവർത്തനക്ഷമത 90 ശതമാനമായി ഉയർത്താനാണ് അധികൃതർ ലക്ഷ്യമിടുന്നത്.
നിലയത്തിന്റെ പ്രവർത്തനം മെച്ചപ്പെടുത്തുന്നതിനായി ഒന്റാറിയോ പവർ ജനറേഷന്റെ സബ്സിഡിയറിയായ ലൗറന്റിസ് എനർജി പാർട്ണേഴ്സുമായി എൻബി പവർ കരാർ ഒപ്പിട്ടു. ഏപ്രിൽ 1 മുതൽ പ്രാബല്യത്തിൽ വരുന്ന ഈ കരാർ പ്രകാരം അടുത്ത മൂന്ന് വർഷത്തേക്ക് ഒന്റാറിയോയിൽ നിന്നുള്ള ന്യൂക്ലിയർ എഞ്ചിനീയർമാർ പോയിന്റ് ലെപ്രാവുവിൽ സേവനം അനുഷ്ഠിക്കും. വർഷം 25 ദശലക്ഷം ഡോളറാണ് കരാർ തുകയെങ്കിലും, പ്രവർത്തനത്തിൽ പുരോഗതി രേഖപ്പെടുത്തിയാൽ 80 ലക്ഷം ഡോളർ വരെ ബോണസ് നൽകാനും വ്യവസ്ഥയുണ്ട്. 2032 വരെയാണ് നിലയത്തിന് നിലവിൽ പ്രവർത്തന ലൈസൻസുള്ളത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
New agreement to reduce electricity rates; NB Power joins hands with Ontario
