“നീയില്ലാതെ പറ്റില്ല”; ഭാര്യയ്ക്ക് മെസേജ് അയച്ച അയൽവാസിയുടെ തല ഭർത്താവ് ചുറ്റികയ്ക്ക് അടിച്ചുതകർത്തു

ആലപ്പുഴ: ഭാര്യയ്ക്ക് മൊബൈലിൽ പ്രണയസന്ദേശം അയച്ചതിനെച്ചൊല്ലിയുള്ള തർക്കം അവസാനിച്ചത് അതിക്രൂരമായ അക്രമത്തിൽ. കൊമ്മാടി സ്വദേശിയായ ഇരുപത്തിയെട്ടുകാരനാണ് അയൽവാസിയുടെ ചുറ്റിക കൊണ്ടുള്ള മർദനമേറ്റ് ഗുരുതരാവസ്ഥയിലായത്. തലയോട്ടിക്ക് ഗുരുതരമായി പരിക്കേറ്റ യുവാവ് നിലവിൽ ആശുപത്രിയിൽ ചികിത്സയിലാണ്.

കഴിഞ്ഞദിവസം ഉച്ചയ്ക്ക് ഒന്നരയോടെയാണ് സംഭവം നടന്നത്. “നീ ഇല്ലാതെ എനിക്ക് ജീവിക്കാൻ പറ്റില്ല” എന്ന സന്ദേശം യുവാവ് അയൽവാസിയായ യുവതിക്ക് അയച്ചിരുന്നു. ഈ മെസേജ് യുവതിയുടെ ഭർത്താവിന്റെ ശ്രദ്ധയിൽപ്പെട്ടതാണ് പെട്ടെന്നുള്ള പ്രകോപനത്തിന് കാരണമായത്. സന്ദേശത്തെച്ചൊല്ലി ഇരുവരും തമ്മിൽ വാക്കുതർക്കമുണ്ടാവുകയും പിന്നാലെ ഭർത്താവ് ചുറ്റികയെടുത്ത് യുവാവിന്റെ തലയ്ക്ക് അടിക്കുകയുമായിരുന്നു.

സംഭവത്തിൽ പരിക്കേറ്റ യുവാവിന്റെ കുടുംബം നൽകിയ പരാതിയുടെ അടിസ്ഥാനത്തിൽ ആലപ്പുഴ നോർത്ത് പോലീസ് കേസെടുത്ത് അന്വേഷണം ആരംഭിച്ചു. ആക്രമണത്തിന് ശേഷം ഒളിവിൽ പോയ പ്രതിക്കായി തിരച്ചിൽ ഊർജ്ജിതമാക്കിയിട്ടുണ്ട്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Husband smashes neighbor's head with hammer for texting his wife