ഹെൽത്ത് കാർഡ് ഇല്ലാത്തവർക്കും ഇനി ചികിത്സ; നയാഗ്രയിലെ സാധാരണക്കാർക്കായി മൊബൈൽ ക്ലിനിക്കുകൾ വരുന്നു

സെന്റ് കാതറിൻസ്: നയാഗ്ര മേഖലയിൽ സാമ്പത്തികമായും സാമൂഹികമായും പിന്നാക്കം നിൽക്കുന്നവർക്കും ഭവനരഹിതർക്കും മെച്ചപ്പെട്ട ആരോഗ്യസേവനം ഉറപ്പാക്കാൻ പുതിയ കർമ്മപദ്ധതിയുമായി ‘ക്വസ്റ്റ്’ കമ്മ്യൂണിറ്റി ഹെൽത്ത് സെന്റർ (Quest Community Health Centre). വരും വർഷങ്ങളിൽ മേഖലയിൽ പാർശ്വവൽക്കരിക്കപ്പെട്ടവരുടെ എണ്ണത്തിൽ വലിയ വർധനവുണ്ടാകുമെന്ന കണ്ടെത്തലിനെത്തുടർന്നാണ് അടുത്ത നാല് വർഷത്തേക്കുള്ള തന്ത്രപ്രധാനമായ പദ്ധതിക്ക് രൂപം നൽകിയത്.

കഴിഞ്ഞ ദിവസം നടന്ന ചടങ്ങിൽ സെന്റർ എക്സിക്യൂട്ടീവ് ഡയറക്ടർ നാൻസി ഗാർനറാണ് പുതിയ പദ്ധതിരേഖ പുറത്തിറക്കിയത്. ഒരു വർഷത്തിലധികം നീണ്ട പഠനങ്ങൾക്കും വിവിധ കമ്മ്യൂണിറ്റി പങ്കാളികളുമായുള്ള ചർച്ചകൾക്കും ശേഷമാണ് ഈ ഗൈഡ്‌ലൈൻ തയ്യാറാക്കിയിരിക്കുന്നത്. നയാഗ്രയിലെ മാറിക്കൊണ്ടിരിക്കുന്ന ജനസംഖ്യാ ഘടനയും സാമൂഹിക സാഹചര്യങ്ങളും കണക്കിലെടുത്താണ് പദ്ധതി ആവിഷ്കരിച്ചിരിക്കുന്നത്.

ഭക്ഷണലഭ്യതയിലെ കുറവ്, ഭവനരഹിതരുടെ എണ്ണത്തിലുണ്ടാകുന്ന വർധനവ്, കുടിയേറ്റം എന്നിവ മേഖലയിലെ ആരോഗ്യരംഗത്ത് വലിയ സമ്മർദ്ദം ചെലുത്തുന്നുണ്ടെന്ന് നാൻസി ഗാർനർ ചൂണ്ടിക്കാട്ടി. സാധാരണക്കാരേക്കാൾ കൂടുതൽ ആരോഗ്യപരിരക്ഷ ആവശ്യമുള്ളവരാണ് ദാരിദ്ര്യരേഖയ്ക്ക് താഴെയുള്ളവരും ലഹരിപാനീയങ്ങൾക്ക് അടിമപ്പെട്ടവരും. എന്നാൽ പലപ്പോഴും ഇവർക്ക് കൃത്യമായ ചികിത്സ ലഭിക്കുന്നില്ല. ഈ വിടവ് നികത്തുകയാണ് ഞങ്ങളുടെ ലക്ഷ്യമെന്ന് അവർ വ്യക്തമാക്കി.

കൃത്യമായ തിരിച്ചറിയൽ രേഖകളോ ഒഎച്ച്‌ഐപി (OHIP) കാർഡുകളോ ഇല്ലാത്തതിനാൽ ചികിത്സ നിഷേധിക്കപ്പെടുന്നവർക്കായി പ്രത്യേക സേവനങ്ങൾ ക്വസ്റ്റ് വാഗ്ദാനം ചെയ്യുന്നുണ്ട്. ക്വീൻസ്റ്റൺ സ്ട്രീറ്റ് കേന്ദ്രീകരിച്ച് പ്രവർത്തിക്കുന്ന മൊബൈൽ ഹെൽത്ത് ക്ലിനിക്കുകൾ വഴി ഇത്തരം ആളുകളിലേക്ക് നേരിട്ടെത്തി ചികിത്സ നൽകാനാണ് തീരുമാനം.കൂടാതെ, മുതിർന്ന പൗരന്മാർക്കായി കുറഞ്ഞ ചിലവിൽ ദന്തചികിത്സ ഉറപ്പാക്കുന്ന പ്രത്യേക പദ്ധതിയും ഇതിന്റെ ഭാഗമാണ്. യാത്രാസൗകര്യമില്ലാത്തവർക്കായി മൊബൈൽ ഡെന്റൽ യൂണിറ്റുകൾ വഴി റിട്ടയർമെന്റ് ഹോമുകളിലും ലോംഗ് ടേം കെയർ സെന്ററുകളിലും സേവനം എത്തിക്കും.

സെന്റ് കാതറിൻസിലെ ക്വീൻസ്റ്റൺ സ്ട്രീറ്റിൽ പ്രവർത്തിക്കുന്ന ഈ ലാഭേച്ഛയില്ലാത്ത സംഘടന, വിവിധ പ്രാദേശിക ഏജൻസികളുമായി ചേർന്നാണ് പ്രവർത്തിക്കുന്നത്. ഡോക്ടർമാർ, നഴ്സുമാർ, ഡയറ്റീഷ്യൻമാർ, തെറാപ്പിസ്റ്റുകൾ എന്നിവരടങ്ങുന്ന വിദഗ്ധ സംഘത്തിന്റെ സേവനം ഒരൊറ്റ കുടക്കീഴിൽ ലഭ്യമാക്കും എന്നതാണ് ഇതിന്റെ പ്രത്യേകത. ഹാമിൽട്ടൺ നയാഗ്ര ഹാൾഡിമാൻഡ് ബ്രാന്റ് (HNHB) ലോക്കൽ ഹെൽത്ത് ഇന്റഗ്രേഷൻ നെറ്റ്‌വർക്കിന്റെ സഹായത്തോടെയാണ് ഇതിനാവശ്യമായ ഫണ്ട് കണ്ടെത്തുന്നത്. നയാഗ്രയുടെ വരാനിരിക്കുന്ന സാമൂഹിക മാറ്റങ്ങളെ നേരിടാൻ ഈ പദ്ധതി പ്രാപ്തമാണെന്നും കാലാനുസൃതമായ മാറ്റങ്ങൾ ഇതിൽ വരുത്തുമെന്നും അധികൃതർ അറിയിച്ചു.

niagara-quest-health-care-communit

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt