അഹമ്മദാബാദ്: ട്വന്റി20 ലോകകപ്പിലെ തകർപ്പൻ പ്രകടനത്തിലൂടെ ടൂർണമെന്റിലെ താരമായി തിരഞ്ഞെടുക്കപ്പെട്ടതിന് പിന്നാലെ, തന്റെ വിജയത്തിന് പിന്നിലെ ചാലകശക്തി വെളിപ്പെടുത്തി ഇന്ത്യൻ താരം സഞ്ജു സാംസൺ. ക്രിക്കറ്റ് ഇതിഹാസം സച്ചിൻ തെൻഡുൽക്കർ നൽകിയ മാർഗനിർദേശങ്ങളാണ് നിർണായകമായതെന്ന് സഞ്ജു പറഞ്ഞു. ലോകകപ്പ് നേട്ടത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.
കഴിഞ്ഞ കുറച്ചു മാസങ്ങളായി സച്ചിൻ സാറുമായി ഞാൻ നിരന്തരം ബന്ധപ്പെട്ടിരുന്നു. ഓസ്ട്രേലിയൻ പര്യടനത്തിൽ കളിക്കാൻ അവസരം ലഭിക്കാതെ പുറത്തിരുന്നപ്പോൾ മാനസികമായി വലിയ പ്രയാസമനുഭവിച്ചിരുന്നു. ആ ഘട്ടത്തിൽ സ്വീകരിക്കേണ്ട കൃത്യമായ ശൈലിയെക്കുറിച്ച് ചോദിക്കാനാണ് ഞാൻ അദ്ദേഹത്തെ സമീപിച്ചത്. അദ്ദേഹം നൽകിയ ഉപദേശങ്ങളും കളിയിലുണ്ടായ വ്യക്തതയും പ്രകടനത്തെ ഏറെ സ്വാധീനിച്ചു. ഫൈനൽ മത്സരത്തിന് തൊട്ടുപിന്നാലെ പോലും അദ്ദേഹം വിളിച്ച് കാര്യങ്ങൾ തിരക്കിയിരുന്നു,” സഞ്ജു വ്യക്തമാക്കി.
ലോകകപ്പിൽ കേവലം അഞ്ച് മത്സരങ്ങളിൽ നിന്ന് 80.25 ശരാശരിയിൽ 321 റൺസാണ് സഞ്ജു അടിച്ചുകൂട്ടിയത്. മൂന്ന് അർധസെഞ്ചറികൾ ഇതിൽ ഉൾപ്പെടുന്നു. ടൂർണമെന്റിലെ റൺവേട്ടക്കാരുടെ പട്ടികയിൽ മൂന്നാം സ്ഥാനത്തുള്ള സഞ്ജു, 199.38 എന്ന മിന്നുന്ന സ്ട്രൈക്ക് റേറ്റോടെ ഈ പട്ടികയിൽ രണ്ടാം സ്ഥാനത്തുമുണ്ട്.
തന്റെ കരിയറിലെ ഉയർച്ചതാഴ്ചകളെക്കുറിച്ചും സഞ്ജു മനസ്സ് തുറന്നു. 2024-ലെ ലോകകപ്പ് നേടിയ ടീമിൽ അംഗമായിരുന്നെങ്കിലും ഒരു മത്സരം പോലും കളിക്കാൻ അന്ന് സാധിച്ചിരുന്നില്ല. എന്നാൽ സ്വപ്നം കാണുന്നത് ഞാൻ അവസാനിപ്പിച്ചില്ല. ന്യൂസീലൻഡ് പരമ്പരയ്ക്ക് ശേഷം മാനസികമായി തകർന്നുപോയ നിമിഷങ്ങളുണ്ടായിരുന്നു. എല്ലാം അവസാനിച്ചുവെന്ന് കരുതിയടത്തുനിന്നാണ് ദൈവം പുതിയ വഴികൾ തുറന്നത്. നിർണായക മത്സരങ്ങളിൽ രാജ്യത്തിനായി മികച്ച പ്രകടനം പുറത്തെടുക്കാൻ സാധിച്ചതിൽ അഭിമാനമുണ്ടെന്ന് താരം കൂട്ടിച്ചേർത്തു.
sanju-samson-t20-world-cup-player-of-the-tournament-about-sachin
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
