കുടിയേറ്റ നിയന്ത്രണവും കുറയുന്ന ജനനനിരക്കും തിരിച്ചടിയാവുന്നു; കാനഡയിൽ ജനനനിരക്ക് റെക്കോർഡ് തകർച്ചയിലേക്കെന്ന് റിപ്പോർട്ട്

ഒട്ടാവ: കഴിഞ്ഞ കുറച്ചു വർഷങ്ങളായി റെക്കോർഡ് വളർച്ച രേഖപ്പെടുത്തിയിരുന്ന കാനഡയുടെ ജനസംഖ്യാ നിരക്ക് 2026-ഓടെ സ്തംഭനാവസ്ഥയിലേക്ക് നീങ്ങുന്നതായി റിപ്പോർട്ട്. ഫെഡറൽ പാർലമെന്ററി ബജറ്റ് ഓഫീസർ (PBO) പുറത്തുവിട്ട ഏറ്റവും പുതിയ കണക്കുകൾ പ്രകാരം, തുടർച്ചയായ രണ്ടാം വർഷവും രാജ്യത്തെ ജനസംഖ്യാ വളർച്ചാ നിരക്ക് താഴ്ന്ന നിലയിൽ തന്നെ തുടരും. പ്രധാനമന്ത്രി മാർക്ക് കാർണിയുടെ നേതൃത്വത്തിലുള്ള ലിബറൽ സർക്കാർ കുടിയേറ്റ നയങ്ങളിൽ വരുത്തിയ കർശനമായ നിയന്ത്രണങ്ങളും രാജ്യത്ത് കുത്തനെ ഇടിയുന്ന ജനനനിരക്കുമാണ് ഈ മാറ്റത്തിന് പ്രധാന കാരണമായി ചൂണ്ടിക്കാണിക്കപ്പെടുന്നത്.

ജനസംഖ്യാ വളർച്ചയിലെ ഈ ഇടിവ് രാജ്യത്തിന്റെ സാമ്പത്തിക മേഖലയെ എങ്ങനെ ബാധിക്കുമെന്ന ആശങ്കയിലാണ് വിദഗ്ധർ. 1950-കളിൽ ഒരു സ്ത്രീക്ക് ശരാശരി 5.6 കുട്ടികൾ എന്നതായിരുന്നു കാനഡയിലെ ജനനനിരക്കെങ്കിൽ, നിലവിൽ അത് റെക്കോർഡ് തകർച്ചയോടെ 1.3-ൽ എത്തിനിൽക്കുകയാണെന്ന് വെസ്റ്റേൺ യൂണിവേഴ്സിറ്റിയിലെ സ്റ്റാറ്റിസ്റ്റിക്സ് കാനഡ റിസർച്ച് ഡാറ്റ സെന്റർ ഡയറക്ടർ പ്രൊഫസർ മൈക്കൽ ഹാൻ വ്യക്തമാക്കുന്നു. കുട്ടികളെ വളർത്തുന്നതിനുണ്ടാകുന്ന അമിതച്ചെലവും മാറുന്ന സാമൂഹിക സാഹചര്യങ്ങളുമാണ് ദമ്പതികളെ കുട്ടി എന്ന തീരുമാനത്തിൽ നിന്നും പിന്നോട്ട് വലിക്കുന്നത്.

മുൻ പ്രധാനമന്ത്രി ജസ്റ്റിൻ ട്രൂഡോയുടെ കാലത്ത് നടപ്പിലാക്കിയ അമിതമായ കുടിയേറ്റം രാജ്യത്തെ ഭവന മേഖലയിലും പൊതുസേവനങ്ങളിലും വലിയ സമ്മർദ്ദം ചെലുത്തിയിരുന്നു. ഇത് പരിഹരിക്കാനാണ് നിലവിലെ സർക്കാർ കുടിയേറ്റക്കാരുടെ എണ്ണം പരിമിതപ്പെടുത്താൻ തീരുമാനിച്ചത്. എന്നാൽ, സ്വാഭാവിക ജനനനിരക്ക് വർദ്ധിക്കാത്ത സാഹചര്യത്തിൽ കുടിയേറ്റം പൂർണ്ണമായും നിയന്ത്രിക്കുന്നത് ഭാവിയിൽ കടുത്ത തൊഴിലാളി ക്ഷാമത്തിന് വഴിതെളിക്കുമെന്ന് വിദഗ്ധർ മുന്നറിയിപ്പ് നൽകുന്നു.

പ്രായമായവരുടെ എണ്ണം കൂടുന്ന കാനഡയിൽ, അവരെ പരിചരിക്കാനും തൊഴിൽ മേഖലകളിൽ സജീവമാകാനും യുവാക്കളുടെ കുറവ് വരും വർഷങ്ങളിൽ വലിയ വെല്ലുവിളിയാകും. നിലവിലെ പ്രതിസന്ധി മറികടക്കാൻ ജനനനിരക്ക് കുറഞ്ഞത് 2.1 ശതമാനമെങ്കിലും എത്തേണ്ടതുണ്ട്. എന്നാൽ സമീപഭാവിയിലൊന്നും ഇതിന് സാധ്യതയില്ലെന്നാണ് വിലയിരുത്തൽ.

സിംഗപ്പൂർ, ജപ്പാൻ, ഇറ്റലി തുടങ്ങിയ രാജ്യങ്ങൾക്ക് സമാനമായി കാനഡയും കുറഞ്ഞ ജനനനിരക്ക് നേരിടുന്ന സാഹചര്യത്തിൽ, ആഗോളതലത്തിൽ തന്നെ വിദഗ്ധ തൊഴിലാളികൾക്കായി വലിയ മത്സരമുണ്ടാകാൻ സാധ്യതയുണ്ട്. ജനസംഖ്യാ വളർച്ചയിലെ ഈ മന്ദഗതിക്കനുസരിച്ച് പൊതുസേവനങ്ങളുടെ ഗുണനിലവാരം ഉറപ്പുവരുത്തുകയും സാമ്പത്തിക ഭദ്രത നിലനിർത്തുകയുമാകും വരും വർഷങ്ങളിൽ കാനഡയ്ക്ക് മുന്നിലുള്ള പ്രധാന ദൗത്യം.

it-was-way-too-much-experts-weigh-in-on-canadas-fluctuating-population-growth

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt