ഒട്ടാവ: വിദേശയാത്രകൾക്കായി പാസ്പോർട്ട് അപേക്ഷ നൽകാൻ കാത്തിരിക്കുന്ന മലയാളികൾ ഉൾപ്പെടെയുള്ള കനേഡിയൻ നിവാസികൾക്ക് തിരിച്ചടിയായി കേന്ദ്ര സർക്കാരിന്റെ പുതിയ തീരുമാനം. രാജ്യത്തെ പാസ്പോർട്ട് നിരക്കുകളിൽ വൻ വർധനവാണ് പ്രധാനമന്ത്രി മാർക്ക് കാർണിയുടെ നേതൃത്വത്തിലുള്ള സർക്കാർ പ്രഖ്യാപിച്ചിരിക്കുന്നത്. ഉപഭോക്തൃ വിലസൂചികയുമായി പാസ്പോർട്ട് നിരക്കിനെ ബന്ധിപ്പിക്കാനുള്ള പുതിയ നയത്തിന്റെ ഭാഗമായി മാർച്ച് 31 മുതൽ പരിഷ്കരിച്ച നിരക്കുകൾ നിലവിൽ വരും.
പുതിയ ഉത്തരവ് പ്രകാരം അഞ്ചു വർഷത്തെ പാസ്പോർട്ടിന് 123.24 ഡോളറും പത്തു വർഷത്തെ പാസ്പോർട്ടിന് 164.32 ഡോളറുമായിരിക്കും കാനഡയ്ക്കകത്തുള്ളവർ നൽകേണ്ടി വരിക. കാനഡയ്ക്ക് പുറത്തുനിന്ന് അപേക്ഷിക്കുന്നവർ പത്തു വർഷത്തെ പാസ്പോർട്ടിനായി 267.02 ഡോളർ നൽകണം. നിലവിൽ 2.7 ശതമാനത്തിന്റെ വർധനവാണ് രേഖപ്പെടുത്തിയിരിക്കുന്നതെങ്കിലും, വരും വർഷങ്ങളിൽ പാസ്പോർട്ട് സേവനങ്ങളുടെ യഥാർത്ഥ ചെലവ് ഈടാക്കുന്ന രീതിയിലേക്ക് മാറുമ്പോൾ നിരക്കുകൾ ഇനിയും ഗണ്യമായി ഉയരാൻ സാധ്യതയുണ്ടെന്ന് ഇമിഗ്രേഷൻ, റെഫ്യൂജീസ് ആൻഡ് സിറ്റിസൺഷിപ്പ് കാനഡ (IRCC) വ്യക്തമാക്കി.
പാസ്പോർട്ട് വിതരണവുമായി ബന്ധപ്പെട്ട പ്രവർത്തനച്ചെലവുകൾ നിലവിലെ വരുമാനത്തേക്കാൾ 121 ദശലക്ഷം ഡോളറോളം അധികമായതാണ് ഫീസ് വർധിപ്പിക്കാൻ സർക്കാരിനെ പ്രേരിപ്പിച്ചത്. ജീവനക്കാരുടെ ശമ്പളം, ഡെലിവറി ചാർജ്, ഐടി സേവനങ്ങൾ എന്നിവയുൾപ്പെടെയുള്ള ആകെ ചെലവിന്റെ 15 ശതമാനം മാത്രമാണ് നിലവിൽ ഫീസിലൂടെ ഈടാക്കുന്നത്. ഇനിയും ഫീസ് പരിഷ്കരിക്കാത്ത പക്ഷം പാസ്പോർട്ട് സേവനങ്ങൾ സുഗമമായി മുന്നോട്ട് കൊണ്ടുപോകാൻ സാധിക്കില്ലെന്നാണ് അധികൃതരുടെ വിലയിരുത്തൽ. എന്നാൽ, കുറഞ്ഞ വരുമാനക്കാർക്കും വലിയ കുടുംബങ്ങൾക്കും ഈ വർധനവ് വലിയ സാമ്പത്തിക ഭാരമുണ്ടാക്കുമെന്ന് പ്രതിപക്ഷം വിമർശിക്കുന്നു.
അതേസമയം, പാസ്പോർട്ട് വിതരണത്തിൽ വീഴ്ച വരുത്തിയാൽ തുക മടക്കി നൽകുന്ന പദ്ധതി ഏപ്രിൽ ഒന്നു മുതൽ കർശനമാക്കാനും സർക്കാർ ആലോചിക്കുന്നുണ്ട്. നിശ്ചിത സമയപരിധിക്കുള്ളിൽ പാസ്പോർട്ട് ലഭ്യമാക്കാൻ സാധിച്ചില്ലെങ്കിൽ അപേക്ഷാ ഫീസ് പൂർണമായും തിരികെ നൽകുമെന്ന് മുൻപ് വാഗ്ദാനമുണ്ടായിരുന്നെങ്കിലും ഇത് ഇതുവരെ നടപ്പിലായിട്ടില്ല. 2022-ലെ തിരക്കിന് ശേഷം സേവന നിലവാരം മെച്ചപ്പെട്ടെങ്കിലും ഇപ്പോഴും പല അപേക്ഷകളും വൈകുന്നുവെന്ന പരാതികൾ നിലനിൽക്കുന്നുണ്ട്. സേവനങ്ങൾ കൂടുതൽ കാര്യക്ഷമമാക്കാനുള്ള നടപടികളുടെ ഭാഗമായാണ് ഈ പുതിയ സാമ്പത്തിക ക്രമീകരണമെന്നാണ് ഇമിഗ്രേഷൻ വകുപ്പിന്റെ വിശദീകരണം.
canadian-passports-more-expensive
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
