ആൽബർട്ട: പ്രവിശ്യയുടെ 2026-27 സാമ്പത്തിക വർഷത്തേക്കുള്ള ബജറ്റ് ധനമന്ത്രി നേറ്റ് ഹോർനർ അവതരിപ്പിച്ചു. ആരോഗ്യ, വിദ്യാഭ്യാസ മേഖലകളിൽ വലിയ തോതിലുള്ള ചെലവ് വർദ്ധിപ്പിച്ച ബജറ്റിൽ പക്ഷേ 9.4 ബില്യൺ ഡോളറിന്റെ വൻ സാമ്പത്തിക കമ്മിയാണ് (Deficit) രേഖപ്പെടുത്തിയിരിക്കുന്നത്. കഴിഞ്ഞ വർഷം ഇത് 5.2 ബില്യൺ ഡോളറായിരുന്നു. വരും വർഷങ്ങളിലും (2027-28, 2028-29) യഥാക്രമം 7.6 ബില്യൺ, 6.9 ബില്യൺ ഡോളർ വീതം കമ്മി തുടരുമെന്നാണ് പ്രവിശ്യാ ഗവൺമെന്റിന്റെ കണക്കുകൂട്ടൽ.
ആരോഗ്യ മേഖലയ്ക്കായി 34.4 ബില്യൺ ഡോളറാണ് ഇത്തവണ നീക്കിവച്ചിരിക്കുന്നത്. ഇത് മുൻ വർഷത്തേക്കാൾ 2 ബില്യൺ ഡോളർ കൂടുതലാണ്. ഡോക്ടർമാരുടെ നിയമനത്തിനായി മാത്രം 7.7 ബില്യൺ ഡോളർ ചെലവിടും. വിദ്യാഭ്യാസ മേഖലയ്ക്ക് 10.8 ബില്യൺ ഡോളറും അനുവദിച്ചു. വർദ്ധിച്ചുവരുന്ന ജനസംഖ്യയും സേവനങ്ങളുടെ ആവശ്യകതയും പരിഗണിച്ചാണ് ഈ വർദ്ധനവ്.
പുതിയ പ്രൊവിൻഷ്യൽ സെയിൽസ് ടാക്സ് (PST) ഏർപ്പെടുത്താൻ ഉദ്ദേശിക്കുന്നില്ലെന്ന് ധനമന്ത്രി വ്യക്തമാക്കി. എന്നാൽ, എഡ്മന്റൺ ഉൾപ്പെടെയുള്ള നഗരങ്ങളിലെ താമസക്കാർക്ക് വസ്തു നികുതിയിൽ (Property Tax) ശരാശരി 13 ശതമാനം വരെ വർദ്ധനവുണ്ടാകും. വാഹന രജിസ്ട്രേഷൻ, സീനിയേഴ്സ് കെയർ ഫീസുകൾ, ട്രേഡ് സർട്ടിഫിക്കേഷൻ എന്നിവയ്ക്കും ചിലവ് കൂടും.
ഈ ബജറ്റ് ആൽബർട്ടയിലെ സാധാരണക്കാരുടെ ജീവിതച്ചെലവ് വർദ്ധിപ്പിക്കുമെന്ന് പ്രതിപക്ഷമായ എൻഡിപി (NDP) ആരോപിച്ചു. എണ്ണവില വർദ്ധിക്കുമെന്ന പ്രതീക്ഷയിൽ കൈകെട്ടിയിരിക്കുന്ന ഒരു ബജറ്റാണിതെന്നും, ജനങ്ങളുടെ യഥാർത്ഥ പ്രശ്നങ്ങൾക്ക് പരിഹാരമില്ലെന്നും എൻഡിപി നേതാവ് നഹീദ് നെൻഷി പറഞ്ഞു.
സ്വന്തം നിബന്ധനകൾ ലംഘിച്ച് തുടർച്ചയായി കമ്മി ബജറ്റുകൾ അവതരിപ്പിക്കേണ്ടി വരുന്നത് എണ്ണ ഉത്പാദനത്തിൽ നിന്നുള്ള വരുമാനത്തിലുണ്ടായ ഇടിവ് മൂലമാണെന്ന് സർക്കാർ ചൂണ്ടിക്കാട്ടുന്നു. പൊതുസേവനങ്ങളിൽ വിട്ടുവീഴ്ച ചെയ്യാൻ കഴിയില്ലെന്നും കമ്മി കുറയ്ക്കാൻ ഭാവിയിൽ നടപടികൾ സ്വീകരിക്കുമെന്നും ധനമന്ത്രി പറഞ്ഞു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
A roundup of Alberta budget discussions as deficit increases to $9.4B
