കാൽഗറി: നഗരത്തിലെ പൊതുഗതാഗത സംവിധാനമായ കാൽഗറി ട്രാൻസിറ്റിലെ ട്രാൻസ്ഫർ സമയപരിധി വർധിപ്പിക്കാൻ കാൽഗറി നഗരസഭ. നിലവിലുള്ള 90 മിനിറ്റ് സമയപരിധി രണ്ട് മണിക്കൂറായി നീട്ടുന്നതിനുള്ള നടപടികൾ ആരംഭിക്കാൻ ചൊവ്വാഴ്ച ചേർന്ന നഗരസഭാ യോഗം തീരുമാനിച്ചു.
കൗൺസിലർ മൈക്ക് ജെയിംസൺ അവതരിപ്പിച്ച പ്രമേയം 4-നെതിരെ 11 വോട്ടുകൾക്കാണ് പാസായത്. നഗരം വികസിക്കുന്നതിനനുസരിച്ച് യാത്രാദൂരം വർധിക്കുന്നതും, മോശം കാലാവസ്ഥയും ഗതാഗതക്കുരുക്കും കാരണം യാത്രകൾ വൈകുന്നതും കണക്കിലെടുത്താണ് ഈ തീരുമാനം. നിലവിൽ 90 മിനിറ്റിനുള്ളിൽ യാത്ര പൂർത്തിയാക്കാൻ കഴിയാത്തവർ വീണ്ടും ടിക്കറ്റ് എടുക്കേണ്ടി വരുന്നത് ഒഴിവാക്കാൻ പുതിയ മാറ്റം സഹായിക്കും. ടൊറന്റോ, മോൺട്രിയൽ തുടങ്ങിയ നഗരങ്ങളിലെ മാതൃകയിലാണ് കാൽഗറിയിലും ഈ പരിഷ്കാരം നടപ്പിലാക്കുന്നത്.
വാർഡ് 12 കൗൺസിലറായ മൈക്ക് ജെയിംസൺ, ശീതകാലത്ത് ബസുകൾ വൈകുന്നത് മൂലം യാത്രക്കാർ നേരിടുന്ന സാമ്പത്തിക ബുദ്ധിമുട്ടുകൾ ചൂണ്ടിക്കാട്ടിയാണ് പ്രമേയം അവതരിപ്പിച്ചത്. മേയർ ജെറോമി ഫാർകാസ് ഈ നീക്കത്തെ പിന്തുണച്ചു. ഇത് കൂടുതൽ ന്യായമായ ഒരു യാത്രാ സംവിധാനം ഉറപ്പാക്കുമെന്നും എന്നാൽ സേവനത്തിന്റെ കാര്യക്ഷമത വർധിപ്പിക്കുന്നതിനായി കൂടുതൽ പഠനങ്ങൾ ആവശ്യമാണെന്നും അദ്ദേഹം പറഞ്ഞു.
അതേസമയം, സാമ്പത്തിക പ്രത്യാഘാതങ്ങളെക്കുറിച്ച് കൂടുതൽ വിവരങ്ങൾ ശേഖരിച്ച ശേഷം തീരുമാനമെടുക്കണമെന്ന് വാർഡ് 10 കൗൺസിലർ ആൻഡ്രേ ഷാബോ ആവശ്യപ്പെട്ടെങ്കിലും അത് തള്ളപ്പെട്ടു. ഈ മാറ്റം നവംബറിലെ ബജറ്റിൽ നികുതി വർധനവിന് കാരണമായേക്കാമെന്ന ആശങ്കയും അദ്ദേഹം പങ്കുവെച്ചു. എന്നാൽ ട്രാൻസ്ഫർ സമയം നീട്ടുന്നത് വഴി കൂടുതൽ യാത്രക്കാർ പൊതുഗതാഗതത്തിലേക്ക് എത്തുമെന്നും ഇത് സാമ്പത്തിക നഷ്ടം നികത്തുമെന്നുമാണ് അനുകൂലിക്കുന്നവരുടെ വാദം.
പുതുക്കിയ നിരക്ക് നയവും (Fare Policy), ബൈലോ ഭേദഗതികളും ഉൾപ്പെടുത്തിയുള്ള വിശദമായ റിപ്പോർട്ട് ഏപ്രിൽ 28-നകം നഗര ഭരണകൂടം കൗൺസിലിന് സമർപ്പിക്കും. ഇതിന് ശേഷമായിരിക്കും പുതിയ സമയപരിധി ഔദ്യോഗികമായി നിലവിൽ വരിക.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Calgary transit time increases; council decides to limit transfer time to two hours
