ജയിലിൽ കഴിയുന്ന പാകിസ്താൻ മുൻ പ്രധാനമന്ത്രിയും ക്രിക്കറ്റ് ഇതിഹാസവുമായ ഇമ്രാൻ ഖാന് അന്തസ്സായ സാഹചര്യങ്ങളും മതിയായ വൈദ്യസഹായവും ഉറപ്പാക്കണമെന്ന് ആവശ്യപ്പെട്ട് ഇന്ത്യയുടെ കപിൽ ദേവ്, സുനിൽ ഗവാസ്കർ എന്നിവരുൾപ്പെടെ 14 മുൻ അന്താരാഷ്ട്ര ക്രിക്കറ്റ് ക്യാപ്റ്റന്മാർ രംഗത്തെത്തി. പാകിസ്താൻ സർക്കാരിന് നൽകിയ സംയുക്ത കത്തിലാണ് മുൻ താരങ്ങൾ ഈ ആവശ്യം ഉന്നയിച്ചത്. ഇമ്രാൻ ഖാന് അർഹമായ മാനുഷിക പരിഗണനയും നീതിയുക്തമായ നിയമനടപടികളും ലഭ്യമാക്കണമെന്ന് കത്തിൽ വ്യക്തമാക്കുന്നു.

ഓസ്‌ട്രേലിയൻ മുൻ ക്യാപ്റ്റൻ ഗ്രെഗ് ചാപ്പൽ തയ്യാറാക്കിയ കത്തിൽ സുനിൽ ഗവാസ്കർ, കപിൽ ദേവ് എന്നിവർക്ക് പുറമെ ഇയാൻ ചാപ്പൽ, അലൻ ബോർഡർ, സ്റ്റീവ് വോ, കിം ഹ്യൂസ്, ബെലിൻഡ ക്ലർക്ക് (ഓസ്‌ട്രേലിയ), മൈക്കൽ അതേർട്ടൻ, നാസർ ഹുസൈൻ, മൈക്കൽ ബ്രിയർലി, ഡേവിഡ് ഗോവർ (ഇംഗ്ലണ്ട്), ക്ലൈവ് ലോയ്ഡ് (വെസ്റ്റ് ഇൻഡീസ്), ജോൺ റൈറ്റ് (ന്യൂസിലൻഡ്) എന്നിവരാണ് ഒപ്പുവെച്ചിരിക്കുന്നത്. കളിമുറ്റത്തെ വൈരത്തിനപ്പുറം മാനുഷിക മൂല്യങ്ങൾക്കും നീതിക്കും മുൻഗണന നൽകിയാണ് ഇത്തരമൊരു നീക്കമെന്ന് ഒപ്പിട്ടവർ അറിയിച്ചു.

തടവിൽ കഴിയുന്ന ഇമ്രാൻ ഖാന്റെ ആരോഗ്യനില വഷളാകുന്നതായി റിപ്പോർട്ടുകളുണ്ട്. കൃത്യമായ ചികിത്സ ലഭിക്കാത്തതിനാൽ തന്റെ വലതുകണ്ണിന്റെ കാഴ്ചശക്തി 85 ശതമാനത്തോളം നഷ്ടപ്പെട്ടതായി 73-കാരനായ ഇമ്രാൻ ഖാൻ അഭിഭാഷകനോട് വെളിപ്പെടുത്തിയതായി വാർത്തകൾ പുറത്തുവന്നിരുന്നു. എന്നാൽ ഈ ആരോപണം പാക് സർക്കാർ തള്ളി. അന്താരാഷ്ട്ര മാനദണ്ഡങ്ങൾ അനുസരിച്ചുള്ള തടങ്കൽ സാഹചര്യങ്ങളും കുടുംബാംഗങ്ങളെ കാണാനുള്ള അനുവാദവും അദ്ദേഹത്തിന് നൽകണമെന്ന് കത്തിൽ ആവശ്യപ്പെടുന്നു.

ഇമ്രാൻ ഖാൻ പാകിസ്താനെ ലോകകപ്പ് വിജയത്തിലേക്ക് നയിച്ച ക്യാപ്റ്റനാണെന്നും 2018 മുതൽ 2022 വരെ ജനാധിപത്യപരമായി തിരഞ്ഞെടുക്കപ്പെട്ട പ്രധാനമന്ത്രിയാണെന്നും കത്തിൽ ചൂണ്ടിക്കാട്ടുന്നു. രാഷ്ട്രീയ നിലപാടുകൾ എന്തുതന്നെയായാലും ഒരു മുൻ രാഷ്ട്രത്തലവൻ എന്ന നിലയിലും ആഗോള കായിക ഇതിഹാസമെന്ന നിലയിലും അദ്ദേഹം മാന്യമായ പരിഗണന അർഹിക്കുന്നുണ്ടെന്ന് മുൻ ക്യാപ്റ്റന്മാർ വിലയിരുത്തി. കത്തിൽ ഉന്നയിച്ച കാര്യങ്ങളെ പിന്തുണയ്ക്കുന്നതായി കപിൽ ദേവും സൗരവ് ഗാംഗുലിയും പ്രത്യേക പ്രസ്താവനകളിൽ അറിയിച്ചു.

അഴിമതിക്കേസുകളിൽ ശിക്ഷിക്കപ്പെട്ട് 2023 ഓഗസ്റ്റ് മുതൽ തടവിൽ കഴിയുകയാണ് ഇമ്രാൻ ഖാൻ. നിലവിൽ 17 വർഷം, 14 വർഷം എന്നിങ്ങനെ രണ്ട് വ്യത്യസ്ത ശിക്ഷകളാണ് അദ്ദേഹം അനുഭവിക്കുന്നത്. എന്നാൽ രാഷ്ട്രീയ പ്രേരിതമായാണ് തനിക്കെതിരെ കേസുകൾ ചുമത്തിയതെന്ന് ഇമ്രാൻ ഖാൻ ആരോപിക്കുന്നു. ഇമ്രാൻ ഖാന് മെച്ചപ്പെട്ട ആരോഗ്യ സൗകര്യങ്ങൾ ലഭ്യമാക്കണമെന്ന് ആവശ്യപ്പെട്ട് പാകിസ്താനിലെ പ്രതിപക്ഷ സഖ്യം ഇസ്‌ലാമാബാദിൽ അഞ്ച് ദിവസമായി പ്രതിഷേധം തുടരുകയാണ്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Beyond the battles on the field; Legends unite for Imran Khan, Kapil and Gavaskar demand justice from Pakistan!