ചെന്നൈ: തൊണ്ണൂറുകളിൽ തെന്നിന്ത്യൻ സിനിമാ ലോകത്തെ ഇളക്കിമറിച്ച നടി ഷക്കീല ആത്മീയതയുടെ പുതിയ പാതയിലേക്ക്. ഉംറ നിർവഹിക്കുന്നതിനായി നടി മക്കയിലേക്ക് യാത്ര തിരിച്ചു. ചെന്നൈ വിമാനത്താവളത്തിൽ വെച്ച് സുഹൃത്തുക്കൾ ഷക്കീലയെ യാത്രയാക്കുന്ന വീഡിയോ സോഷ്യൽ മീഡിയയിൽ വൈറലായതോടെയാണ് ഈ വാർത്ത പുറംലോകമറിഞ്ഞത്.
ഷക്കീലയുടെ അടുത്ത സുഹൃത്തായ സതീഷ് ക്രിസ്റ്റഫറാണ് യാത്രയുടെ ദൃശ്യങ്ങൾ പങ്കുവെച്ചത്. “സന്തോഷകരമായ യാത്ര നേരുന്നു അമ്മേ, നിങ്ങളുടെ സ്വപ്നങ്ങൾ യാഥാർത്ഥ്യമാകുന്നു” എന്ന കുറിപ്പോടെയാണ് സതീഷ് വീഡിയോ പോസ്റ്റ് ചെയ്തത്. സുഹൃത്തുക്കൾക്കും പ്രിയപ്പെട്ടവർക്കും ഒപ്പമാണ് ഷക്കീല വിമാനത്താവളത്തിലെത്തിയത്. പർദ്ദ ധരിച്ചാണ് താരം യാത്ര തിരിച്ചത്.
കുറച്ചു നാളുകൾക്ക് മുമ്പ് നടി മുംതാസുമായി ഷക്കീല നടത്തിയ ആത്മീയ സംഭാഷണം വലിയ ചർച്ചയായിരുന്നു. താൻ ജീവിതത്തിൽ വലിയ തെറ്റുകൾ ചെയ്തെന്നും അതിൽ നിന്നും പുറത്തുകടക്കാൻ ആഗ്രഹമുണ്ടെന്നും അന്ന് ഷക്കീല തുറന്നു പറഞ്ഞിരുന്നു. “അല്ലാഹു നിങ്ങളെ സഹായിക്കും, പ്രാർത്ഥന കൈവിടരുത്” എന്നായിരുന്നു അന്ന് മുംതാസ് നൽകിയ മറുപടി. ഈ വാക്കുകൾ ഷക്കീലയെ ആഴത്തിൽ സ്വാധീനിച്ചിട്ടുണ്ടാകാം എന്നാണ് ആരാധകർ കരുതുന്നത്.
മലയാളം ഉൾപ്പെടെയുള്ള തെന്നിന്ത്യൻ ഭാഷകളിൽ ഒരു കാലത്ത് സൂപ്പർതാരങ്ങൾക്കൊപ്പം തിളങ്ങിയ നടിയാണ് ഷക്കീല. എന്നാൽ ഇപ്പോൾ സിനിമകളിൽ നിന്ന് വിട്ടുനിൽക്കുന്ന താരം സോഷ്യൽ മീഡിയയിലും റിയാലിറ്റി ഷോകളിലും സജീവമാണ്. ‘കുക്ക് വിത്ത് കോമാളി’ എന്ന ഷോയിലൂടെ പുതിയൊരു മുഖമാണ് മലയാളി പ്രേക്ഷകർക്ക് മുന്നിൽ ഷക്കീല കാഴ്ചവെച്ചത്. ട്രാൻസ്ജെൻഡർ യുവതിയെ ദത്തെടുത്ത് മാതൃകയായ താരം ഇപ്പോൾ ആത്മീയമായ സമാധാനത്തിനായുള്ള യാത്രയിലാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Actress Shakeela has embarked on an Umrah pilgrimage to Mecca, a significant spiritual journey for her.
