ഒട്ടാവ: കാനഡയുടെ ദേശീയ അടിയന്തര മരുന്നുശേഖരത്തിൽ (National Emergency Stockpile) നിന്നും 20 മില്യൺ ഡോളർ (ഏകദേശം 160-200 കോടി രൂപ) വിലമതിക്കുന്ന മരുന്നുകൾ നശിച്ച സംഭവത്തിൽ ദുരൂഹതയേറുന്നു. 2024 ഡിസംബറിലുണ്ടായ ഈ വൻ സാമ്പത്തിക നഷ്ടത്തിന് പിന്നിൽ വിദേശ ഇടപെടലുകൾ ഉണ്ടോ എന്ന കാര്യത്തിൽ പബ്ലിക് ഹെൽത്ത് ഏജൻസി ഓഫ് കാനഡ (PHAC) വിശദീകരണം നൽകി. മരുന്നുകൾ സൂക്ഷിച്ചിരുന്ന ഫ്രീസറിന്റെ വാതിൽ അബദ്ധത്തിൽ തുറന്നുപോയതാണ് മരുന്നുകൾ നശിക്കാൻ കാരണമായതെന്നാണ് ഔദ്യോഗിക വിശദീകരണമെങ്കിലും, ഇതിന് തൊട്ടുമുൻപ് നടന്ന ഒരു സുരക്ഷാ ലംഘന ശ്രമം കനേഡിയൻ പാർലമെന്ററി കമ്മിറ്റിയിൽ ചർച്ചയായി.
സുരക്ഷാ ഏജൻസികളെ മുൾമുനയിൽ നിർത്തിയ ‘സന്ദർശകൻ’
മരുന്നുകൾ നശിക്കുന്നതിന് ഒരു മാസം മുൻപ്, അതായത് 2024 നവംബറിൽ, മരുന്നുശേഖരം സൂക്ഷിച്ചിരിക്കുന്ന വെയർഹൗസിൽ അറ്റകുറ്റപ്പണിക്കെന്ന വ്യാജേന ഒരു വിദേശ പൗരൻ പ്രവേശിക്കാൻ ശ്രമിച്ചതായി വിവരങ്ങൾ പുറത്തുവന്നു. ഒരു സ്വകാര്യ വെണ്ടർ വഴിയാണ് ഇയാൾ വെയർഹൗസിലേക്ക് കടക്കാൻ ശ്രമിച്ചത്. എന്നാൽ അധികൃതർ പ്രവേശനാനുമതി നിഷേധിക്കുകയും സംഭവം ദേശീയ സുരക്ഷാ ഏജൻസികളെ അറിയിക്കുകയും ചെയ്തു. ഈ സുരക്ഷാ ലംഘന ശ്രമവും പിന്നീട് നടന്ന മരുന്ന് നഷ്ടവും തമ്മിൽ ബന്ധമില്ലെന്ന് പി.എച്ച്.എ.സി (PHAC) വക്താവ് അന്ന മാഡിസൺ പ്രസ്താവനയിൽ അറിയിച്ചു. മരുന്നുകൾ നശിച്ച ഫ്രീസറുകളല്ല ഈ വിദേശി പരിശോധിക്കാൻ ലക്ഷ്യമിട്ടിരുന്നതെന്നും ഏജൻസി കൂട്ടിച്ചേർത്തു.
പാർലമെന്ററി സമിതിക്ക് മുന്നിൽ തിരുത്തലുമായി ഏജൻസി
നേരത്തെ പാർലമെന്ററി കമ്മിറ്റിക്ക് മുൻപാകെ ഏജൻസി ഡയറക്ടർ ജനറൽ സ്റ്റേസി മൻത നൽകിയ മൊഴിയിൽ ചില ആശയക്കുഴപ്പങ്ങൾ ഉണ്ടായതായി ഏജൻസി സമ്മതിച്ചു. അറ്റകുറ്റപ്പണിക്കായി എത്തിയ വ്യക്തി വിദേശിയാണോ എന്ന കാര്യത്തിൽ ഇപ്പോൾ സ്ഥിരീകരണമില്ലെന്നാണ് പുതിയ വിശദീകരണം. ഫ്രീസറുകളുടെ വാർഷിക പരിശോധനയ്ക്ക് പുറമെ ഒരു അധിക അറ്റകുറ്റപ്പണിക്കായി എത്തിയവർ നോർത്ത് അമേരിക്കയ്ക്ക് പുറത്തുള്ളവരാണെന്ന് സംശയം തോന്നിയതിനാലാണ് സുരക്ഷാ ഉദ്യോഗസ്ഥർ ഇവരെ തടഞ്ഞത്. ദേശീയ സുരക്ഷാ പ്രാധാന്യമുള്ള വിഷയമായതിനാൽ സമിതിയുടെ പല ചർച്ചകളും രഹസ്യമായാണ് നടന്നത്. വരും ദിവസങ്ങളിൽ സംഭവത്തിൽ കൂടുതൽ വ്യക്തത വരുത്തുമെന്ന് കൺസർവേറ്റീവ് എം.പി ഡാൻ മസിയർ പറഞ്ഞു.
ottawa-says-national-security-incident-error-at-emergency-stockpile-unrelated
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
