കാനഡയുടെ വിദേശസഹായം വെട്ടിക്കുറയ്ക്കുന്നു: ആശങ്കയിൽ ആരോഗ്യ-ലിംഗസമത്വ മേഖലകൾ; ലക്ഷക്കണക്കിന് സ്ത്രീകൾ ദുരിതത്തിലാകുമെന്ന് മുന്നറിയിപ്പ്

ഒട്ടാവ: അന്താരാഷ്ട്ര വിദേശസഹായം വെട്ടിക്കുറയ്ക്കാനുള്ള കാനഡയുടെ തീരുമാനം ആഗോളതലത്തിൽ ഗുരുതരമായ പ്രത്യാഘാതങ്ങൾ ഉണ്ടാക്കുമെന്ന് മനുഷ്യാവകാശ സംഘടനകളുടെ മുന്നറിയിപ്പ്. ഗർഭച്ഛിദ്രം, പ്രസവാരോഗ്യം, എൽ.ജി.ബി.ടി.ക്യു+ (LGBTQ+) അവകാശങ്ങൾ തുടങ്ങിയ മേഖലകളിലെ ഫണ്ടിങ് നിർത്തലാക്കുന്നത് ലക്ഷക്കണക്കിന് സ്ത്രീകളുടെയും പാർശ്വവൽക്കരിക്കപ്പെട്ടവരുടെയും ജീവൻ അപകടത്തിലാക്കുമെന്ന് ഓക്സ്ഫാം കാനഡ (Oxfam Canada) ഉൾപ്പെടെയുള്ള പ്രമുഖ സംഘടനകൾ ചൂണ്ടിക്കാട്ടുന്നു.

കാനഡ തങ്ങളുടെ വിദേശനയങ്ങളിൽ നിന്ന് ‘ഫെമിനിസ്റ്റ്’ എന്ന ടാഗ് ഒഴിവാക്കുന്നതും വിദേശസഹായം ആഭ്യന്തര സാമ്പത്തിക ലാഭത്തിനായി മാറ്റാൻ ശ്രമിക്കുന്നതും ആഗോളതലത്തിൽ കാനഡയുടെ പദവിക്ക് മങ്ങലേൽപ്പിക്കുമെന്നാണ് വിലയിരുത്തൽ.
ഈ മാസം ആദ്യം പാർലമെന്റ് ഹില്ലിൽ നടന്ന ചർച്ചയിൽ ഓക്സ്ഫാം കാനഡ എക്സിക്യൂട്ടീവ് ഡയറക്ടർ ലോറൻ റാവൻ ആണ് ഈ ആശങ്കകൾ പങ്കുവെച്ചത്.

ഗട്ട്മാക്കർ ഇൻസ്റ്റിറ്റ്യൂട്ടിന്റെ (Guttmacher Institute) പഠനമനുസരിച്ച്, 2024 മാർച്ച് വരെയുള്ള കണക്കുകൾ പ്രകാരം കാനഡ നൽകിയ 7.62 കോടി ഡോളറിന്റെ സഹായം വഴി 2,110 മാതൃമരണങ്ങളും 16 ലക്ഷം അനാവശ്യ ഗർഭധാരണങ്ങളും 4.78 ലക്ഷം സുരക്ഷിതമല്ലാത്ത ഗർഭച്ഛിദ്രങ്ങളും ഒഴിവാക്കാൻ സാധിച്ചിട്ടുണ്ട്. കാനഡയുടെ സഹായധനത്തിൽ ഓരോ 10 ദശലക്ഷം ഡോളറിന്റെ കുറവുണ്ടാകുമ്പോഴും 277 മാതൃമരണങ്ങളും 63,000 സുരക്ഷിതമല്ലാത്ത ഗർഭച്ഛിദ്രങ്ങളും വർധിക്കുമെന്നും റിപ്പോർട്ട് മുന്നറിയിപ്പ് നൽകുന്നു.

വിദേശസഹായം വെട്ടിക്കുറയ്ക്കുമ്പോൾ അത് കേവലം അക്കങ്ങളിലല്ല, മറിച്ച് മനുഷ്യജീവനെയാണ് ബാധിക്കുന്നതെന്ന് ആക്ഷൻ കാനഡ (Action Canada) മേധാവി ഫ്രെഡറിക് ഷാബോ വ്യക്തമാക്കി. അമേരിക്കൻ ഭരണകൂടം ‘ജെൻഡർ ഐഡിയോളജി’ എന്ന് വിശേഷിപ്പിക്കുന്ന പദ്ധതികൾക്ക് ഫണ്ട് നിഷേധിക്കുന്ന സാഹചര്യത്തിൽ കാനഡയുടെ നിലപാട് നിർണ്ണായകമാണ്. മൊസാംബിക്കിലെ ലാംഡ (Lambda) പോലുള്ള സംഘടനകൾക്ക് ഇതിനോടകം തന്നെ തങ്ങളുടെ ബജറ്റിന്റെ 42 ശതമാനത്തോളം നഷ്ടപ്പെട്ടുകഴിഞ്ഞു.

വിദേശസഹായം വെട്ടിക്കുറച്ച് ആഭ്യന്തരമായി തൊഴിലവസരങ്ങൾ സൃഷ്ടിക്കാനും ഊർജ്ജ മേഖലകളിൽ നിക്ഷേപിക്കാനുമാണ് കാനഡയുടെ പുതിയ നീക്കം. എന്നാൽ, വികസ്വര രാജ്യങ്ങളിൽ പതിറ്റാണ്ടുകളായി നടത്തിയ പോരാട്ടങ്ങളിലൂടെ നേടിയെടുത്ത ലിംഗസമത്വവും ആരോഗ്യ സുരക്ഷയും ഇതോടെ ഇല്ലാതാകുമെന്ന് വികസന ഗ്രൂപ്പുകൾ ചൂണ്ടിക്കാട്ടുന്നു. കാനഡ ഈ നിർണ്ണായക ഘട്ടത്തിൽ പിൻവാങ്ങരുത് എന്ന ശക്തമായ ആവശ്യമാണ് ഇപ്പോൾ ഉയരുന്നത്.

foreign-aid-groups-urge-canada-to-maintain-funding-for-abortion-lgbtq-advocacy

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt