കാൽഗറി : ലെത്ത്ബ്രിഡ്ജ് ട്രേഡ് ആൻഡ് കൺവെൻഷൻ സെന്ററിൽ മാർച്ച് 12 മുതൽ 14 വരെ ഹോം ഗാർഡൻ ആൻഡ് ലെയ്ഷർ ഷോ സംഘടിപ്പിക്കുന്നു. മുന്നൂറിലധികം കമ്പനികളും വിവിധ സംഘടനകളും വ്യവസായ വിദഗ്ധരും മേളയുടെ ഭാഗമാകുമെന്ന് സംഘാടകർ അറിയിച്ചു. പാചക വിദഗ്ധ ‘റോണീസ് കിച്ചൺ’, ഉദ്യാന പരിപാലന രംഗത്തെ വിദഗ്ധൻ ലൈഡൻ പെന്നർ എന്നിവർ ഇത്തവണ പ്രത്യേക അതിഥികളായി എത്തും. ഹാലോ എയർ ആംബുലൻസാണ് മേളയുടെ ചാരിറ്റി സ്പോൺസർ.
പുതിയ വീട് സ്വന്തമാക്കാനുള്ള അവസരമാണ് ഈ വർഷത്തെ പ്രദർശനത്തിന്റെ പ്രധാന സവിശേഷത. സേഫിലെ രഹസ്യകോഡ് കണ്ടെത്തുന്ന വിജയിക്ക് 5,89,000 ഡോളർ വിലമതിക്കുന്ന വീട് സമ്മാനമായി ലഭിക്കും. പ്രാദേശിക ബിസിനസ് മേഖലയ്ക്ക് വലിയ പിന്തുണ നൽകുന്ന മേള, ഓരോ വർഷവും കൂടുതൽ വളർച്ച കൈവരിക്കുകയാണെന്ന് സംഘാടകർ വ്യക്തമാക്കി.
പ്രാദേശിക സംരംഭകർക്ക് തങ്ങളുടെ ഉൽപ്പന്നങ്ങൾ വലിയൊരു വിഭാഗം ജനങ്ങളിലേക്ക് എത്തിക്കാൻ ഇത്തരം പരിപാടികൾ സഹായിക്കുമെന്ന് ബിൽഡ് ലെത്ത്ബ്രിഡ്ജ് (BILD Lethbridge) എക്സിക്യൂട്ടീവ് ഓഫീസർ ബ്രിഡ്ജറ്റ് മെർൺസ് പറഞ്ഞു. മികച്ച വിപണന സാധ്യതകൾക്കൊപ്പം സാധാരണ ഗതിയിൽ ജനശ്രദ്ധ ലഭിക്കാത്ത ചെറുകിട ബിസിനസുകൾക്കും മേള വലിയ അവസരമൊരുക്കുമെന്നും അവർ കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Lethbridge Home Garden and Leisure Show in March; Over 300 businesses to participate
