മാനിറ്റോബ: മാനിറ്റോബയിലുള്ള നർസിസ് സ്നേക്ക് ഡെൻസിൽ വീണ്ടും വസന്തകാലത്തെ അത്ഭുതക്കാഴ്ചകൾ ആരംഭിച്ചു. ലോകത്തിലെ ഏറ്റവും വലിയ പാമ്പ് സങ്കേതം എന്നറിയപ്പെടുന്ന ഇവിടെ കഠിനമായ മഞ്ഞുകാലത്തിന് ശേഷം ഒരു ലക്ഷത്തിലധികം ‘റെഡ്-സൈഡഡ് ഗാർട്ടർ’ പാമ്പുകളാണ് ഭൂമിക്കടിയിലെ ഗുഹകളിൽ നിന്നും കൂട്ടമായി പുറത്തേക്ക് വരുന്നത്. ഭൂമിക്കടിയിലെ സ്വാഭാവികമായ ചുണ്ണാമ്പുകല്ല് ഗുഹകളിലാണ് ഈ പാമ്പുകൾ ശൈത്യകാലം ചെലവഴിക്കുന്നത്. കാനഡയിലെ അതിശൈത്യത്തിൽ താപനില മൈനസ് 30 ഡിഗ്രി സെൽഷ്യസ് വരെ താഴുമെങ്കിലും, ഈ ഗുഹകൾക്കുള്ളിൽ താപനില പൂജ്യത്തിന് താഴെ പോകാറില്ല എന്നതാണ് പാമ്പുകളെ ഇവിടെ എത്തിക്കുന്നത്. സെപ്റ്റംബർ അവസാനത്തോടെ ഗുഹകളിൽ അഭയം പ്രാപിക്കുന്ന ഇവ ഏകദേശം അഞ്ചോ ആറോ മാസത്തോളം അവിടെ സുഷുപ്തിയിലായിരിക്കും.
വസന്തകാലം എത്തുന്നതോടെ ആയിരക്കണക്കിന് പാമ്പുകൾ ഒരേസമയം പുറത്തേക്ക് വരുന്നത് സഞ്ചാരികളെ വിസ്മയിപ്പിക്കുന്ന കാഴ്ചയാണ്. ഇണചേരുന്നതിനായി നൂറുകണക്കിന് പാമ്പുകൾ പരസ്പരം പിണഞ്ഞു കിടക്കുന്ന ‘മേറ്റിംഗ് ബോൾ’ എന്ന പ്രതിഭാസം കാണാൻ നിരവധി ആളുകളാണ് ഇവിടെ തടിച്ചുകൂടുന്നത്. മനുഷ്യർക്ക് ഒട്ടും ഉപദ്രവകാരിയല്ലാത്ത ഈ പാമ്പുകൾക്ക് വിഷമില്ല എന്നതാണ് മറ്റൊരു പ്രത്യേകത. കറുപ്പും തവിട്ടും കലർന്ന ശരീരത്തിൽ മഞ്ഞ വരകളും വശങ്ങളിൽ ചുവന്ന പാടുകളുമുള്ള ഇവ സാധാരണയായി മൂന്ന് മുതൽ നാല് അടി വരെ നീളം വെക്കുന്നു. മുട്ടയിടുന്നതിന് പകരം കുഞ്ഞുങ്ങളെ നേരിട്ട് പ്രസവിക്കുന്ന ഇവയുടെ പ്രധാന ഭക്ഷണം തവളകളും ചെറിയ പുഴുക്കളുമാണ്. വസന്തകാലത്തെ ഈ ഒത്തുചേരലിന് ശേഷം ഭക്ഷണത്തിനായി അടുത്തുള്ള ചതുപ്പ് നിലങ്ങളിലേക്ക് ചേക്കേറുന്ന പാമ്പുകൾ, അടുത്ത മഞ്ഞുകാലം എത്തുന്നതോടെ വീണ്ടും ഇതേ ഗുഹകളിലേക്ക് തന്നെ മടങ്ങിയെത്തും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
World’s largest snake den in Canada: Over 100,000 red-sided garter snakes come alive every spring
