ഒട്ടാവ: കാനഡ–യുണൈറ്റഡ് സ്റ്റേറ്റ്സ്–മെക്സിക്കോ വ്യാപാര ഉടമ്പടി (CUSMA) റദ്ദാക്കപ്പെടുന്ന സാഹചര്യമുണ്ടായാൽ, രാജ്യങ്ങൾ തമ്മിൽ വേർതിരിച്ചുള്ള പ്രത്യേക വ്യാപാര കരാറുകളിൽ ഏർപ്പെടുന്നതാണ് ഉചിതമെന്ന് അന്താരാഷ്ട്ര വ്യാപാര നിയമവിദഗ്ധൻ ലോറൻസ് ഹെർമൻ. കാനഡയും മെക്സിക്കോയുമായി പ്രത്യേകം വ്യാപാര ചർച്ചകൾ നടത്തുന്ന കാര്യം അമേരിക്കൻ ഭരണകൂടം പരിഗണിക്കുന്നുവെന്ന റിപ്പോർട്ടുകൾക്കിടെ മാധ്യമങ്ങളോട് സംസാരിക്കുകയായിരുന്നു കാസിഡി ലെവി കെന്റ് എൽ.എൽ.പിയിലെ ട്രേഡ് ലോയറായ അദ്ദേഹം. നിലവിലെ ത്രികക്ഷി കരാറിന് പകരമായി ഓരോ രാജ്യവുമായും വ്യക്തിഗത കരാറുകൾ രൂപീകരിക്കുന്നത് പ്രായോഗികമാണെന്നും നിലവിലെ പല വ്യവസ്ഥകളും ഇതിനായി ഉപയോഗിക്കാമെന്നും ഹെർമൻ ചൂണ്ടിക്കാട്ടി.
വരാനിരിക്കുന്ന ചർച്ചകൾ കടുത്തതായിരിക്കുമെന്നും അമേരിക്കയെപ്പോലെ ശക്തനായ ഒരു പങ്കാളിയെ നേരിടുമ്പോൾ കാനഡ സ്വന്തം താല്പര്യങ്ങൾ സംരക്ഷിക്കാൻ വ്യക്തമായ മുൻഗണനകൾ നിശ്ചയിക്കണമെന്നും അദ്ദേഹം പറഞ്ഞു. ജൂലൈ ഒന്നിന് പുനഃപരിശോധനയ്ക്ക് വിധേയമാകുന്ന സി.യു.എസ്.എം.എ കരാറിൽ നിന്ന് അമേരിക്ക പിന്മാറാൻ സാധ്യതയുണ്ടെന്ന് യു.എസ് ട്രേഡ് പ്രതിനിധി ജെയ്മിസൺ ഗ്രീർ നേരത്തെ സൂചിപ്പിച്ചിരുന്നു. ഈ അനിശ്ചിതത്വം ഒഴിവാക്കുക എന്നതാകണം കാനഡയുടെ ലക്ഷ്യം. അമേരിക്കയിലെ പല വൻകിട കമ്പനികളും കാനഡയുമായുള്ള വ്യാപാരത്തെ ആശ്രയിച്ചാണ് നിലനിൽക്കുന്നത് എന്നതിനാൽ ഒരു കരാറുമില്ലാത്ത സാഹചര്യം ഉണ്ടാകാൻ സാധ്യതയില്ലെന്നും അദ്ദേഹം വിലയിരുത്തി.
അമേരിക്കൻ വിപണിയെ കാനഡ അമിതമായി ആശ്രയിക്കുന്നത് ബിസിനസ് പരമായി വെല്ലുവിളിയാണെന്ന് ഹെർമൻ ഓർമ്മിപ്പിച്ചു. ഒരു ഉപഭോക്താവിനെ മാത്രം ആശ്രയിക്കുന്നത് അപകടകരമാണെന്നും മറ്റു വിപണികളിലേക്ക് വ്യാപാരം വ്യാപിപ്പിക്കണമെന്നും അദ്ദേഹം നിർദ്ദേശിച്ചു. അതേസമയം, അമേരിക്കയുമായുള്ള കരാർ പരാജയപ്പെട്ടാലും മെക്സിക്കോയുമായി കാനഡയ്ക്ക് നിലവിൽ ട്രാൻസ്-പസഫിക് പാർട്ണർഷിപ്പ് (TPP) വഴി വ്യാപാര ബന്ധമുണ്ടെന്നും അദ്ദേഹം ചൂണ്ടിക്കാട്ടി. ത്രികക്ഷി കരാർ തകരുകയാണെങ്കിൽ കാനഡയും അമേരിക്കയും തമ്മിലുള്ള നേരിട്ടുള്ള ഉഭയകക്ഷി ഉടമ്പടിയാകും ഇരുരാജ്യങ്ങൾക്കും ഗുണകരമാവുകയെന്നും അദ്ദേഹം കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canada faces 'Plan B' if CUSMA is canceled; Experts offer crucial suggestion on trade agreement
