കാൽഗറി : വിദേശ തൊഴിലാളികളുടെ ആരോഗ്യ പരിരക്ഷ വെട്ടിക്കുറയ്ക്കാനുള്ള നീക്കത്തിൽ നിന്ന് ആൽബർട്ട സർക്കാർ താൽക്കാലികമായി പിൻമാറി. കഴിഞ്ഞ മാസം നടപ്പിലാക്കിയ ഈ പരിഷ്കാരം വാർത്തയായതോടെ വലിയ ജനരോഷം ഉയർന്നിരുന്നു. ഇതേത്തുടർന്നാണ് തീരുമാനം പുനഃപരിശോധിക്കാൻ സർക്കാർ തീരുമാനിച്ചത്. ഡിപ്പാർട്ട്മെന്റ് ആലോചനയില്ലാതെ എടുത്ത നടപടിയായിരുന്നു ഇതെന്ന് മന്ത്രാലയ വക്താവ് കൈൽ വാർണർ പ്രസ്താവനയിൽ അറിയിച്ചു.
‘ഇന്റർനാഷണൽ എക്സ്പീരിയൻസ് കാനഡ’ (Type 58) വർക്ക് പെർമിറ്റുള്ളവർക്ക് ഇൻഷുറൻസ് നൽകുന്നത് അവസാനിപ്പിക്കാനുള്ള നീക്കമാണ് ഇതോടെ അനിശ്ചിതത്വത്തിലായത്. രണ്ട് വർഷം വരെ കാനഡയിൽ ജോലി ചെയ്യാനും യാത്ര ചെയ്യാനും അനുവദിക്കുന്നതാണ് ഈ പെർമിറ്റുകൾ. ബാഫ്, ലേക്ക് ലൂയിസ് തുടങ്ങിയ ടൂറിസം മേഖലകളിൽ പ്രവർത്തിക്കുന്ന വിദേശ തൊഴിലാളികളെയും ഇവരെ നിയമിക്കുന്ന തൊഴിലുടമകളെയും ഈ നിയന്ത്രണം കാര്യമായി ബാധിക്കുമെന്ന് സർക്കാർ വിലയിരുത്തി. നയം പുനഃപരിശോധിക്കുമെന്നും അതുവരെ നിലവിലെ സ്ഥിതി തുടരുമെന്നും അധികൃതർ വ്യക്തമാക്കിയിട്ടുണ്ട്.
ടൂറിസം മേഖലയെ ആശ്രയിക്കുന്ന ബോ വാലി പോലുള്ള പ്രദേശങ്ങളിലെ സാമ്പത്തിക വ്യവസ്ഥയിൽ സീസണൽ തൊഴിലാളികൾ നിർണ്ണായക പങ്കുവഹിക്കുന്നുണ്ടെന്ന് ബോ വാലി ഇമിഗ്രേഷൻ പാർട്ണർഷിപ്പിലെ ടിനെകെ വാൻ ഡെർ മെർവെ പറഞ്ഞു. വരാനിരിക്കുന്ന സമ്മർ സീസണിൽ പുതിയ ജീവനക്കാരെ നിയമിക്കാനിരിക്കെ ഇൻഷുറൻസ് സംബന്ധിച്ച അവ്യക്തത തിരിച്ചടിയാകുമെന്ന് ഇവർ ചൂണ്ടിക്കാട്ടി. പുനഃപരിശോധന എന്ന് അവസാനിക്കുമെന്നോ ഇതിനിടയിൽ എത്തുന്നവർക്ക് ഇൻഷുറൻസ് കാർഡ് പുതുക്കി നൽകുമോ എന്നതിലോ വ്യക്തത വേണമെന്നും ഇവർ ആവശ്യപ്പെട്ടു.
അതിനിടെ, ജാസ്പർ പോലുള്ള വടക്കൻ റോക്കി മേഖലയിലെ നഗരങ്ങളും ഈ തീരുമാനത്തെ പിന്തുണച്ചു. വിദേശ തൊഴിലാളികളുടെ ക്ഷേമം പ്രാദേശിക ബിസിനസുകളെയും കമ്മ്യൂണിറ്റി ആരോഗ്യത്തെയും നേരിട്ട് ബാധിക്കുമെന്ന് ജാസ്പർ മേയർ റിച്ചാർഡ് അയർലൻഡ് വെള്ളിയാഴ്ച പുറത്തിറക്കിയ പ്രസ്താവനയിൽ പറഞ്ഞു. വിദേശ തൊഴിലാളികൾക്ക് കൃത്യമായ വിവരങ്ങൾ ലഭ്യമാക്കേണ്ടത് വിനോദസഞ്ചാര മേഖലയുടെ സുഗമമായ പ്രവർത്തനത്തിന് അത്യാവശ്യമാണെന്നും അധികൃതർ വിലയിരുത്തുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Protests bear fruit; Alberta temporarily withdraws health coverage restrictions for working holiday visa holders
