‘ഹസ്തദാനമില്ലെങ്കിൽ കളിക്കാനില്ല’; ഇന്ത്യ-പാക് പോരാട്ടത്തിന് ഐസിസിക്ക് മുന്നിൽ ഉപാധികളുമായി പാകിസ്ഥാൻ

ദുബായ്: ടി20 ലോകകപ്പിലെ നിർണ്ണായകമായ ഇന്ത്യ-പാകിസ്ഥാൻ പോരാട്ടം ബഹിഷ്‌കരിക്കുമെന്ന തീരുമാനത്തിൽ നിന്ന് പിന്മാറാൻ അന്താരാഷ്ട്ര ക്രിക്കറ്റ് കൗൺസിലിന് (ഐസിസി) മുന്നിൽ കടുത്ത ഉപാധികൾ വെച്ച് പാകിസ്ഥാൻ ക്രിക്കറ്റ് ബോർഡ് (പിസിബി). ബംഗ്ലാദേശ് ടീമിനെ ലോകകപ്പിൽ നിന്ന് ഒഴിവാക്കിയതുമായി ബന്ധപ്പെട്ട തർക്കങ്ങളാണ് നിലവിലെ പ്രതിസന്ധിക്ക് കാരണം.

ഇന്ത്യയിലേക്ക് ടീമിനെ അയക്കാൻ വിസമ്മതിച്ചതിനെത്തുടർന്ന് പുറത്താക്കപ്പെട്ട ബംഗ്ലാദേശിന് പിന്തുണയുമായാണ് പാകിസ്ഥാൻ രംഗത്തെത്തിയിരിക്കുന്നത്. ബംഗ്ലാദേശിന്റെ ക്രിക്കറ്റ് അടിസ്ഥാന സൗകര്യ വികസനത്തിനും പുതിയ പ്രതിഭകളെ വളർത്തുന്നതിനും ഐസിസി പ്രത്യേക സഹായം നൽകണമെന്നാണ് പിസിബിയുടെ പ്രധാന വാദം.

ഐസിസിയുടെ വാർഷിക വരുമാന വിഹിതത്തിൽ വർധനവ് വരുത്തണമെന്നതാണ് പാകിസ്ഥാന്റെ മറ്റൊരു പ്രധാന ആവശ്യം. നിലവിൽ ലഭിക്കുന്ന 34.5 ദശലക്ഷം ഡോളറിനേക്കാൾ കൂടുതൽ തുക വേണമെന്നാണ് പിസിബി ചെയർമാൻ മൊഹ്‌സിൻ നഖ്‌വി ആവശ്യപ്പെടുന്നത്. ഇതിന് പുറമെ, ലോകകപ്പിൽ നിന്ന് പുറത്തായെങ്കിലും ടൂർണമെന്റ് തയ്യാറെടുപ്പുകൾക്കായി വലിയ തുക ചെലവാക്കിയ ബംഗ്ലാദേശിന് നൽകേണ്ട ‘പാർട്ടിസിപ്പേഷൻ ഫീ’ ഐസിസി ഉറപ്പാക്കണമെന്നും ഭാവിയിൽ ഏതെങ്കിലും ഐസിസി ടൂർണമെന്റിന് ആതിഥേയത്വം വഹിക്കാനുള്ള അവകാശം ബംഗ്ലാദേശിന് നൽകണമെന്നും പാകിസ്ഥാൻ ആവശ്യപ്പെടുന്നു.

ഇന്ത്യയുമായുള്ള ക്രിക്കറ്റ് ബന്ധം പുനഃസ്ഥാപിക്കുന്ന കാര്യത്തിലും പാകിസ്ഥാൻ ചില നിബന്ധനകൾ മുന്നോട്ടുവെച്ചിട്ടുണ്ട്. രാഷ്ട്രീയ കാരണങ്ങളാൽ ദീർഘകാലമായി മുടങ്ങിക്കിടക്കുന്ന ഇന്ത്യ-പാക് ദ്വിരാഷ്ട്ര പരമ്പരകൾ പുനരാരംഭിക്കാൻ ഐസിസി ഇടപെടണമെന്നതാണ് ഇതിൽ പ്രധാനം. കൂടാതെ, മത്സരത്തിന് മുന്നോടിയായി ഇന്ത്യൻ താരങ്ങൾ ഹസ്തദാനം (Handshake) ചെയ്യാൻ തയ്യാറാവണമെന്നും പിസിബി ആവശ്യപ്പെട്ടു. നിലവിൽ ഇരു ടീമുകളിലെയും താരങ്ങൾ തമ്മിൽ മൈതാനത്ത് ഔദ്യോഗികമായി ഹസ്തദാനം നടത്താറില്ല. ഇത് മാറ്റണമെന്നാണ് പാകിസ്ഥാൻ ഉന്നയിക്കുന്ന വിചിത്രമായ ഉപാധികളിലൊന്ന്.

ഫെബ്രുവരി 15-ന് കൊളംബോയിൽ നടക്കേണ്ട ഇന്ത്യ-പാക് മത്സരത്തിന്റെ കാര്യത്തിൽ അനിശ്ചിതത്വം തുടരുകയാണ്. തങ്ങൾ മുന്നോട്ടുവെച്ച ആവശ്യങ്ങളിൽ ഐസിസി എന്ത് നിലപാട് സ്വീകരിക്കും എന്നതിനെ ആശ്രയിച്ചിരിക്കും പാകിസ്ഥാന്റെ പങ്കാളിത്തം. നിലവിൽ പാകിസ്ഥാൻ നിലപാടിൽ ഉറച്ചുനിൽക്കുന്നതിനാൽ ലോകകപ്പിലെ ഏറ്റവും വലിയ പോരാട്ടം നടക്കുമോ എന്ന ആശങ്കയിലാണ് ക്രിക്കറ്റ് ലോകം. വിഷയത്തിൽ ഐസിസിയുടെ അന്തിമ തീരുമാനം ഉടനുണ്ടാകുമെന്നാണ് പ്രതീക്ഷിക്കുന്നത്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

‘No handshake, no game’; Pakistan issues conditions to ICC for India-Pak clash