കാൽഗറി :ജഡ്ജിമാരുടെ നിയമനത്തിൽ പ്രവിശ്യയ്ക്ക് കൂടുതൽ അധികാരം ലഭിക്കാനായി കോടതി ഫണ്ട് തടയുമെന്ന് ഭീഷണിപ്പെടുത്തിയത് വെറുമൊരു ചർച്ചാ തന്ത്രം മാത്രമാണെന്ന് പ്രീമിയർ ഡാനിയേൽ സ്മിത്ത് വ്യക്തമാക്കി. ശനിയാഴ്ച നടന്ന ഒരു റേഡിയോ പരിപാടിയിലാണ് പ്രീമിയർ ഇക്കാര്യം വ്യക്തമാക്കിയത്. നിയമന പ്രക്രിയയിൽ തുല്യതയും നീതിയും ഉറപ്പാക്കുന്ന ഒരു ധാരണയിലെത്താനാണ് താൻ ആഗ്രഹിക്കുന്നതെന്ന് സ്മിത്ത് അറിയിച്ചു.
ജഡ്ജിമാരുടെ നിയമനത്തിൽ ആൽബർട്ടയ്ക്ക് കൂടുതൽ അധികാരം നൽകണമെന്ന് ആവശ്യപ്പെട്ട് പ്രധാനമന്ത്രി മാർക്ക് കാർണിക്ക് സ്മിത്ത് കഴിഞ്ഞ ആഴ്ച കത്തയച്ചിരുന്നു. നിലവിൽ ആൽബർട്ടയിലെ സുപ്പീരിയർ കോടതികളിലേക്കുള്ള നിർദ്ദേശക സമിതിയിൽ ഒരു പ്രവിശ്യാ പ്രതിനിധിയും മൂന്ന് ഫെഡറൽ പ്രതിനിധികളുമാണുള്ളത്. ഇതിന് പകരം രണ്ട് തലങ്ങളിൽ നിന്നും തുല്യ പ്രതിനിധികളുള്ള പുതിയ സമിതി രൂപീകരിക്കണമെന്നാണ് പ്രീമിയറുടെ നിർദ്ദേശം. ഈ ആവശ്യം അംഗീകരിച്ചില്ലെങ്കിൽ കോടതികൾക്കുള്ള സാമ്പത്തിക വിഹിതം തടയുമെന്നും കത്തിൽ മുന്നറിയിപ്പുണ്ട്.
പ്രീമിയറുടെ നീക്കം നീതിന്യായ വ്യവസ്ഥയുടെ സ്വതന്ത്രമായ പ്രവർത്തനത്തെ ബാധിക്കുമെന്നും ജഡ്ജിമാരുടെ വിശ്വാസ്യതയെ ചോദ്യം ചെയ്യുന്നതാണെന്നും അഭിഭാഷക സംഘടനകൾ വിമർശനം ഉന്നയിച്ചു. കാനഡയിലെ 40,000-ത്തോളം നിയമവിദഗ്ധരുടെ സംഘടനയായ കനേഡിയൻ ബാർ അസോസിയേഷൻ സ്മിത്തിന്റെ നിർദ്ദേശങ്ങളിൽ ആശങ്ക രേഖപ്പെടുത്തിയിട്ടുണ്ട്. എന്നാൽ നിലവിലെ സ്വതന്ത്ര നിയമന പ്രക്രിയയിൽ തനിക്ക് വിശ്വാസമുണ്ടെന്നും അത് നിലനിർത്തുമെന്നും ഫെഡറൽ നീതിന്യായ മന്ത്രി സീൻ ഫ്രേസർ വ്യക്തമാക്കി.
ക്യുബെക്കിന് ഫെഡറൽ സർക്കാർ നൽകുന്ന അതേ പരിഗണന ആൽബർട്ടയ്ക്കും ലഭിക്കണമെന്നാണ് തന്റെ നിലപാടെന്ന് സ്മിത്ത് വിശദീകരിച്ചു. സുപ്രീം കോടതിയിലെ ഒൻപത് സീറ്റുകളിൽ മൂന്നെണ്ണം ക്യൂബെക്കിനായി നിശ്ചയിച്ചിട്ടുള്ള കാര്യം അവർ ചൂണ്ടിക്കാട്ടി. കൂടാതെ, സുപ്രീം കോടതി ജഡ്ജിമാർക്ക് ഫ്രഞ്ച്, ഇംഗ്ലീഷ് ഭാഷകളിൽ പ്രവർത്തനപരിജ്ഞാനം വേണമെന്ന നിർബന്ധം ആൽബർട്ടയിലെ ജഡ്ജിമാർക്ക് വിവേചനമുണ്ടാക്കുന്നുവെന്നും അവർ വിലയിരുത്തൽ നടത്തി.
സ്മിത്തിന്റെ രാഷ്ട്രീയ ശൈലിയെ മുൻ യുഎസ് പ്രസിഡന്റ് ഡൊണാൾഡ് ട്രംപിനോട് ഉപമിച്ച വിമർശകർക്കെതിരെ പ്രീമിയറുടെ വക്താവ് സാം ബ്ലാക്കറ്റ് രംഗത്തെത്തി. ഇത്തരം താരതമ്യങ്ങൾ അസംബന്ധമാണെന്നും യഥാർത്ഥ പ്രശ്നങ്ങളിൽ നിന്ന് ശ്രദ്ധ തിരിക്കാനാണ് ഇത്തരം നീക്കങ്ങൾ നടത്തുന്നതെന്നും അദ്ദേഹം ഇമെയിലിലൂടെ പ്രതികരിച്ചു. ജഡ്ജിമാരുടെ നിയമനത്തിൽ പ്രവിശ്യകൾക്ക് അർഹമായ പങ്കാളിത്തം നൽകുന്നത് നീതിന്യായ വ്യവസ്ഥയിലുള്ള ജനവിശ്വാസം വർദ്ധിപ്പിക്കുമെന്നും വക്താവ് കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Justice reform in Alberta: Premier Daniel Smith takes a firm stand
