ഒട്ടാവ : കടുത്ത സാമ്പത്തിക പ്രതിസന്ധി നേരിടുന്ന കാനഡ പോസ്റ്റിന് 1.01 ബില്യൺ ഡോളർ വായ്പ അനുവദിക്കാൻ ഫെഡറൽ സർക്കാർ തീരുമാനിച്ചു. സ്ഥാപനത്തിന്റെ പ്രവർത്തനം സുഗമമായി മുന്നോട്ട് കൊണ്ടുപോകുന്നതിനായി നൽകുന്ന ഈ തുക തിരിച്ചടയ്ക്കേണ്ട വായ്പയാണെന്ന് അധികൃതർ വ്യക്തമാക്കി. 2025 ജനുവരിയിൽ പ്രഖ്യാപിച്ച 1.03 ബില്യൺ ഡോളറിന്റെ സഹായത്തിന് പുറമെയാണിത്.
കാനഡ പോസ്റ്റിന്റെ സാമ്പത്തിക ഭദ്രത ഉറപ്പാക്കാൻ നിലവിലെ രീതികൾ പോരാത്ത സാഹചര്യത്തിൽ ദീർഘകാലാടിസ്ഥാനത്തിലുള്ള മാറ്റങ്ങൾ അനിവാര്യമാണെന്ന് പബ്ലിക് സർവീസസ് ആൻഡ് പ്രൊക്യുർമെന്റ് കാനഡ പ്രസ്താവനയിലൂടെ അറിയിച്ചു. മുൻപ് അനുവദിച്ച തുക 2025 അവസാനത്തോടെ തീരുമെന്നും അടുത്ത 12 മാസത്തേക്ക് ഹ്രസ്വകാല ഫണ്ടിംഗ് ആവശ്യമാണെന്നും നവംബറിൽ കാനഡ പോസ്റ്റ് സർക്കാരിനെ അറിയിച്ചിരുന്നു.
സ്ഥാപനത്തെ സാമ്പത്തികമായി സുസ്ഥിരമാക്കുന്നതിനായുള്ള പരിഷ്കരണ പദ്ധതി സർക്കാരിന് സമർപ്പിച്ചതായി കാനഡ പോസ്റ്റ് ശനിയാഴ്ച വ്യക്തമാക്കി. നിലവിൽ വലിയ സാമ്പത്തിക വെല്ലുവിളികളാണ് നേരിടുന്നതെന്നും ജനങ്ങൾക്ക് ആവശ്യമായ സേവനങ്ങൾ ഉറപ്പാക്കാൻ നിർണ്ണായക നടപടികൾ സ്വീകരിക്കുമെന്നും അവർ അറിയിച്ചു. വിപണിയിലെ മാറ്റങ്ങൾക്കനുസരിച്ച് സ്ഥാപനത്തെ ലാഭകരമാക്കാനാണ് പുതിയ പരിഷ്കരണ പദ്ധതിയിലൂടെ ലക്ഷ്യമിടുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Canada Post gets a helping hand: Government approves $1.01 billion loan
