‘ആവാസവ്യൂഹം’, ‘പുരുഷപ്രേതം’ എന്നീ ചിത്രങ്ങളിലൂടെ മലയാള സിനിമയിൽ തന്റേതായ ഇടംകണ്ടെത്തിയ സംവിധായകൻ കൃഷാന്തിന്റെ പുതിയ ചിത്രം ‘മസ്തിഷ്ക മരണം’ തിയേറ്ററുകളിലേക്ക്. 2046-ലെ കേരളത്തിന്റെ പശ്ചാത്തലത്തിൽ ഒരുങ്ങുന്ന ചിത്രത്തിന്റെ ടീസർ പുറത്തിറങ്ങി. മലയാള സിനിമയിൽ ഇന്നുവരെ പരീക്ഷിക്കപ്പെടാത്ത ‘ഡിസ്റ്റോപ്യൻ സൈബർ പങ്ക്’ ഗണത്തിൽപ്പെടുന്ന ഈ ചിത്രം ഫെബ്രുവരി 27-ന് പ്രേക്ഷകരിലെത്തും.
ഹോളിവുഡ് ചിത്രമായ ‘ബ്ലേഡ് റണ്ണർ’ പോലെ ദൃശ്യവിസ്മയങ്ങൾക്ക് പ്രാധാന്യം നൽകുന്നതാണ് ഈ ചിത്രം. അത്യാധുനിക വിഷ്വൽ ഇഫക്റ്റുകളിലൂടെ (VFX) ഭാവിയിലെ കേരളത്തെ വെള്ളിത്തിരയിൽ പുനരാവിഷ്കരിച്ചിരിക്കുകയാണ് സംവിധായകൻ. ചിത്രത്തിലെ ‘കോമള താമര’ എന്ന ഗാനവും അതിൽ നടി രജിഷ വിജയന്റെ വേറിട്ട ലുക്കും ഇതിനോടകം തന്നെ സമൂഹമാധ്യമങ്ങളിൽ തരംഗമായിക്കഴിഞ്ഞു. ആദ്യഭാഗം തിയേറ്ററിലെത്തുന്നതിന് മുൻപുതന്നെ ചിത്രത്തിന്റെ രണ്ടാം ഭാഗത്തിന്റെ ചിത്രീകരണം ഈ വർഷം ജൂലൈയിൽ ആരംഭിക്കുമെന്ന പ്രഖ്യാപനവും സിനിമാലോകത്ത് വലിയ ചർച്ചയായിട്ടുണ്ട്.
രജിഷ വിജയൻ, നിരഞ്ജ് മണിയൻപിള്ള രാജു, ജഗദീഷ്, സുരേഷ് കൃഷ്ണ, ദിവ്യ പ്രഭ എന്നിവർ പ്രധാന വേഷങ്ങളിലെത്തുന്ന ചിത്രത്തിൽ സഞ്ജു ശിവറാം അതിഥി വേഷത്തിൽ പ്രത്യക്ഷപ്പെടുന്നു. വർക്കിയുടെ സംഗീതവും പ്രയാഗ് മുകുന്ദന്റെ ഛായാഗ്രഹണവും ചിത്രത്തിന് സാങ്കേതിക തികവേകുന്നു. രഞ്ജിത്ത് കരുണാകരൻ പ്രൊജക്റ്റ് ഡിസൈനറായും ശ്രാവൺ സത്യ ആക്ഷൻ കൊറിയോഗ്രാഫറായും പ്രവർത്തിക്കുന്ന ചിത്രം ഒരു നവ്യാനുഭവമായിരിക്കുമെന്നാണ് ടീസർ നൽകുന്ന സൂചന.
kerala-in-2046-hollywood-style-making-krishanths-cyberpunk
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
