ബീജിംഗ്: ആയോധനകലയെയും നർമ്മത്തെയും സമന്വയിപ്പിച്ച് സിനിമാലോകത്ത് തന്റേതായ സാമ്രാജ്യം കെട്ടിപ്പടുത്ത പ്രതിഭയാണ് ജാക്കി ചാൻ. എഴുപത്തിയൊന്നുകാരനായ അദ്ദേഹം ദശകങ്ങളായി ലോകമെമ്പാടുമുള്ള ആരാധകരെ തന്റെ സാഹസികമായ ആക്ഷൻ രംഗങ്ങളിലൂടെ വിസ്മയിപ്പിച്ചു കൊണ്ടിരിക്കുകയാണ്. കേവലം ഒരു ആക്ഷൻ ഹീറോ എന്നതിലുപരി, ഡ്യൂപ്പുകളെ ഉപയോഗിക്കാതെ അപകടകരമായ സ്റ്റണ്ടുകൾ ചെയ്യുന്നതിൽ അദ്ദേഹം കാണിക്കുന്ന ധൈര്യം സമാനതകളില്ലാത്തതാണ്.
ഇപ്പോൾ, തന്റെ മരണശേഷം മാത്രം ലോകത്തിന് സമർപ്പിക്കാനായി പ്രത്യേക ഗാനം റെക്കോർഡ് ചെയ്തിരിക്കുകയാണ് ആക്ഷൻ താരം ജാക്കി ചാൻ. ബീജിംഗിൽ നടന്ന തന്റെ പുതിയ ചിത്രമായ ‘അൺഎക്സ്പെക്റ്റഡ് ഫാമിലി’യുടെ പ്രീമിയർ ചടങ്ങിൽ സംസാരിക്കവെയാണ് എഴുപത്തിയൊന്നുകാരനായ താരം ഈ അപ്രതീക്ഷിത പ്രഖ്യാപനം നടത്തിയത്. ലോകത്തോടുള്ള തന്റെ അവസാന സന്ദേശമായാണ് ഈ വീഡിയോയെ താരം വിശേഷിപ്പിച്ചത്.
താൻ ഇപ്പോൾ ചിന്തിക്കുന്ന കാര്യങ്ങൾ ഉടൻ തന്നെ പറയണമെന്നും ചെയ്യേണ്ട കാര്യങ്ങൾ വേഗത്തിൽ പൂർത്തിയാക്കണമെന്നും തോന്നിയതിനാലാണ് ഇത്തരമൊരു ഗാനം ഒരുക്കിയതെന്ന് അദ്ദേഹം പറഞ്ഞു. തന്റെ കുടുംബത്തിനോ മാനേജ്മെന്റിനോ ഈ ഗാനം ഇപ്പോൾ പുറത്തുവിടാൻ താൽപ്പര്യമില്ലാത്തതിനാലാണ് മരണശേഷം റിലീസ് ചെയ്യാൻ തീരുമാനിച്ചത്. ഇത് ആരാധകർക്കിടയിൽ വൈകാരികമായ ചർച്ചകൾക്ക് വഴിവെച്ചിട്ടുണ്ട്.
വർഷങ്ങളായി താൻ നിലനിർത്തുന്ന ആക്ഷൻ ഹീറോ ഇമേജിൽ നിന്ന് വ്യത്യസ്തമായ വേഷമാണ് പുതിയ ചിത്രത്തിലേതെന്നും ജാക്കി ചാൻ വ്യക്തമാക്കി. ‘അൺഎക്സ്പെക്റ്റഡ് ഫാമിലി’ എന്ന സിനിമയിൽ അൽഷിമേഴ്സ് രോഗബാധിതനായ ഒരു വൃദ്ധനായാണ് അദ്ദേഹം അഭിനയിക്കുന്നത്. ഒരു ആക്ഷൻ താരം എന്നതിലുപരി കുങ്ഫു അറിയുന്ന മികച്ചൊരു നടനായി അറിയപ്പെടാനാണ് താൻ ആഗ്രഹിക്കുന്നതെന്നും അദ്ദേഹം കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Jackie Chan's last message to the world; Special song to be released after his death; Actor reveals
