ഒട്ടാവ: കാനഡയും ചൈനയും തമ്മിലുള്ള വ്യാപാര തർക്കങ്ങൾക്ക് പരിഹാരമായതോടെ കനോല കയറ്റുമതിയിൽ വൻ ഉണർവ്. ഇറക്കുമതി തീരുവ കുറയ്ക്കാൻ ചൈന തയ്യാറായതോടെ ലക്ഷക്കണക്കിന് ടൺ കനോലയുമായി കപ്പലുകൾ ചൈനീസ് തീരത്തേക്ക് യാത്ര തിരിച്ചു കഴിഞ്ഞു. പ്രധാനമന്ത്രി മാർക്ക് കാർണിയും സസ്കാച്ചവൻ പ്രീമിയർ സ്കോട്ട് മോയും അടുത്തിടെ നടത്തിയ ചൈന സന്ദർശനമാണ് മാസങ്ങളായി നീണ്ടുനിന്ന പ്രതിസന്ധിക്ക് പരിഹാരമുണ്ടാക്കിയത്. ഏകദേശം 6 ലക്ഷം ടൺ കനോല നിലവിൽ ചൈനയിലേക്ക് കയറ്റി അയച്ചുകൊണ്ടിരിക്കുകയാണെന്ന് പ്രവിശ്യാ ഭരണകൂടം വ്യക്തമാക്കി.
ചൈനീസ് നിർമ്മിത ഇലക്ട്രിക് വാഹനങ്ങൾക്ക് കാനഡ ഏർപ്പെടുത്തിയ നികുതി കുറയ്ക്കുന്നതിന് പകരമായി കനോല ഉൾപ്പെടെയുള്ള കാർഷിക ഉൽപ്പന്നങ്ങളുടെ തീരുവ കുറയ്ക്കാമെന്ന് ബീജിംഗ് സമ്മതിക്കുകയായിരുന്നു. നിലവിൽ 84 ശതമാനമായിരുന്ന തീരുവ വരും മാസങ്ങളിൽ 15 ശതമാനത്തിലേക്ക് താഴും. വിളവെടുപ്പിന് ശേഷം കനോല വില കുത്തനെ ഇടിഞ്ഞത് കാനഡയിലെ കർഷകരെ കടുത്ത സാമ്പത്തിക പ്രതിസന്ധിയിലാക്കിയിരുന്നു. ചൈനീസ് വിപണി വീണ്ടും തുറന്നതോടെ കനോലയ്ക്ക് മികച്ച വില ലഭിച്ചു തുടങ്ങിയെന്നും ഇത് കർഷകർക്ക് വലിയ ആശ്വാസമാണെന്നും സസ്കാച്ചവനിലെ ബാല്കാറെസ് സ്വദേശിയായ കർഷകൻ ജോൺ കോട്ടിലാക്ക് പറഞ്ഞു.
നിലവിലെ കരാർ 2026 ഡിസംബർ വരെ മാത്രമാണെന്നത് കർഷകർക്കിടയിൽ നേരിയ ആശങ്കയുണ്ടാക്കുന്നുണ്ട്. അതിനാൽ വരും വർഷങ്ങളിലും തീരുവ ഉയരാതിരിക്കാൻ ഇരു രാജ്യങ്ങളും തമ്മിൽ ദീർഘകാല കരാറിൽ ഏർപ്പെടണമെന്നാണ് കാർഷിക രംഗത്തെ വിദഗ്ധരുടെ അഭിപ്രായം. കനോലയ്ക്ക് പുറമെ കടൽ വിഭവങ്ങൾ, ധാന്യങ്ങൾ, ബീഫ് എന്നിവയുടെ കയറ്റുമതിയിലും പുരോഗതിയുണ്ടെന്ന് പ്രീമിയർ സ്കോട്ട് മോ അറിയിച്ചു. പന്നിയിറച്ചി, എണ്ണ എന്നിവയുടെ കയറ്റുമതി സംബന്ധിച്ച ചർച്ചകൾ തുടരുകയാണ്. പുതിയ സംഭവവികാസങ്ങൾ വരാനിരിക്കുന്ന കൃഷി സീസണിലും കർഷകർക്ക് മികച്ച ആത്മവിശ്വാസം നൽകും.
relief-felt-in-saskatchewan-as-canola-exports-to-china-increase
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
