ഒന്റാരിയോ: തെക്കുപടിഞ്ഞാറൻ ഒന്റാരിയോയിൽ അതിശൈത്യം തുടരുന്ന സാഹചര്യത്തിൽ പരിസ്ഥിതി മന്ത്രാലയം ജാഗ്രതാ നിർദ്ദേശം നീട്ടി. വാട്ടർലൂ റീജിയൻ, ഗ്വിൾഫ്, വെല്ലിംഗ്ടൺ കൗണ്ടി, ബ്രാൻഫോർഡ്, സ്ട്രാറ്റ്ഫോർഡ്, ടൊറന്റോ തുടങ്ങി പ്രവിശ്യയുടെ ഭൂരിഭാഗം മേഖലകളിലും ഞായറാഴ്ചയും കോൾഡ് വാണിംഗ് നിലവിലുണ്ടായിരുന്നു. കാറ്റിനൊപ്പം അനുഭവപ്പെടുന്ന തണുപ്പ് -25 മുതൽ -30 ഡിഗ്രി സെൽഷ്യസ് വരെയാകുമെന്ന് എൻവയോൺമെന്റ് കാനഡ മുന്നറിയിപ്പ് നൽകി.
കഠിനമായ തണുപ്പ് മൂലം മിനിറ്റുകൾക്കുള്ളിൽ ഫ്രോസ്റ്റ്ബൈറ്റ് ഏൽക്കാൻ സാധ്യതയുള്ളതിനാൽ പുറത്തിറങ്ങുന്നവർ ശരീരം പൂർണ്ണമായും മറയ്ക്കുന്ന വസ്ത്രങ്ങൾ ധരിക്കണമെന്ന് അധികൃതർ നിർദ്ദേശിച്ചു. ഞായറാഴ്ച രാത്രിയോടെ -25 ഡിഗ്രി സെൽഷ്യസ് തണുപ്പ് തുടരുമെങ്കിലും തിങ്കളാഴ്ച ഉച്ചയോടെ താപനില -13 ഡിഗ്രി സെൽഷ്യസിലേക്ക് ഉയരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ വിലയിരുത്തൽ. തിങ്കളാഴ്ച രാവിലെ നടക്കുന്ന വൈയർട്ടൺ വില്ലിയുടെ പ്രവചനത്തോടെ വരാനിരിക്കുന്ന വസന്തകാലത്തെക്കുറിച്ചുള്ള കൂടുതൽ സൂചനകൾ ലഭിക്കുമെന്നും റിപ്പോർട്ടുകൾ വ്യക്തമാക്കുന്നു.
തുടർച്ചയായി രണ്ട് മണിക്കൂറോ അതിലധികമോ സമയം താപനില -30 ഡിഗ്രി സെൽഷ്യസിന് താഴെ തുടരുമ്പോഴാണ് എക്സ്ട്രീം കോൾഡ് വാണിംഗ് പുറപ്പെടുവിക്കുന്നത്. തണുത്ത കാറ്റ് നേരിട്ട് ഏൽക്കുന്നത് കൈകൾ, പാദങ്ങൾ, ചെവി, മൂക്ക് എന്നിവിടങ്ങളിലെ കോശങ്ങൾ മരവിക്കുന്നതിനും ഗുരുതരമായ ആരോഗ്യപ്രശ്നങ്ങൾക്കും കാരണമാകും. ചർമ്മം മഞ്ഞയോ വെളുപ്പോ നിറമാകുന്നത് ഫ്രോസ്റ്റ്ബൈറ്റിന്റെ പ്രാഥമിക ലക്ഷണമാണെന്നും ഇത്തരം സാഹചര്യങ്ങളിൽ അടിയന്തര വൈദ്യസഹായം തേടണമെന്നും ആരോഗ്യവിദഗ്ധർ അറിയിച്ചു.
അതിശൈത്യത്തിൽ നിന്ന് സംരക്ഷണം നൽകുന്നതിനായി വിവിധ നഗരസഭകളുടെ നേതൃത്വത്തിൽ വോർമിംഗ് സെന്ററുകൾ തുറന്നു. വാട്ടർലൂ റീജിയണിലെ കേംബ്രിഡ്ജ്, കിച്ചനർ, നോർത്ത് ഡംഫ്രീസ് എന്നിവടങ്ങളിലും ഗ്വിൾഫ്, സ്ട്രാറ്റ്ഫോർഡ്, ബ്രാൻഫോർഡ് എന്നിവിടങ്ങളിലും താമസസൗകര്യമില്ലാത്തവർക്കും മറ്റുള്ളവർക്കും അഭയം പ്രാപിക്കാനുള്ള സൗകര്യങ്ങൾ ഒരുക്കിയിട്ടുണ്ട്. ഈ കേന്ദ്രങ്ങളെക്കുറിച്ചുള്ള വിവരങ്ങൾ അതത് നഗരസഭകളുടെ വെബ്സൈറ്റുകളിൽ ലഭ്യമാണെന്ന് അധികൃതർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Frostbite alert; Cold weather intensifies in Ontario, Ministry of Environment extends cold warning
