പത്മഭൂഷൺ പുരസ്കാര നിറവിൽ നിൽക്കുന്ന മെഗാസ്റ്റാർ മമ്മൂട്ടിക്ക് ‘പദയാത്ര’യുടെ സെറ്റിൽ ഹൃദ്യമായ സ്വീകരണം. മൂന്ന് പതിറ്റാണ്ടുകൾക്ക് ശേഷം മമ്മൂട്ടിയും മാസ്റ്റർ ഡയറക്ടർ അടൂർ ഗോപാലകൃഷ്ണനും വീണ്ടും ഒന്നിക്കുന്ന ചിത്രത്തിന്റെ ലൊക്കേഷനിലാണ് സിനിമാ ലോകത്തെ ഈ അമൂല്യ നേട്ടം ആഘോഷിക്കപ്പെട്ടത്. മമ്മൂട്ടിയെ പൂച്ചെണ്ട് നൽകി സ്വീകരിച്ച അടൂർ ഗോപാലകൃഷ്ണൻ, പൊന്നാട അണിയിച്ച് അദ്ദേഹത്തെ ആദരിച്ചു. ലൊക്കേഷനിലെത്തിയ താരത്തെ അണിയറ പ്രവർത്തകരും സഹപ്രവർത്തകരും ചേർന്നാണ് ആവേശത്തോടെ വരവേറ്റത്.
ചിത്രത്തിലെ പ്രധാന വേഷങ്ങൾ കൈകാര്യം ചെയ്യുന്ന ഇന്ദ്രൻസ്, ഗ്രേസ് ആന്റണി എന്നിവരും മറ്റു സാങ്കേതിക പ്രവർത്തകരും ചടങ്ങിൽ സന്നിഹിതരായിരുന്നു. ഇതിന്റെ ഭാഗമായി ലൊക്കേഷനിൽ കേക്ക് മുറിക്കുകയും സന്തോഷം പങ്കുവെക്കുകയും ചെയ്തു. അനന്തരം, മതിലുകൾ, വിധേയൻ എന്നീ വിശ്വപ്രസിദ്ധമായ ചലച്ചിത്രങ്ങൾക്ക് ശേഷം അടൂർ-മമ്മൂട്ടി കൂട്ടുകെട്ടിൽ പിറക്കുന്ന നാലാമത്തെ ചിത്രമാണിത്. അടൂർ സംവിധാനം ചെയ്ത ചിത്രങ്ങളിലൂടെ മമ്മൂട്ടി ഇതിനുമുൻപ് രണ്ട് തവണ മികച്ച നടനുള്ള ദേശീയ പുരസ്കാരം സ്വന്തമാക്കിയിട്ടുണ്ട് എന്നതും ഈ ഒത്തുചേരലിന്റെ പ്രാധാന്യം വർധിപ്പിക്കുന്നു.
മമ്മൂട്ടി കമ്പനിയുടെ എട്ടാമത്തെ നിർമ്മാണ സംരംഭമായ പദയാത്രയുടെ തിരക്കഥ ഒരുക്കിയിരിക്കുന്നത് അടൂർ ഗോപാലകൃഷ്ണനും കെ.വി. മോഹൻകുമാറും ചേർന്നാണ്. 32 വർഷത്തെ നീണ്ട ഇടവേളയ്ക്ക് ശേഷം ഈ പ്രതിഭകൾ ഒന്നിക്കുമ്പോൾ വലിയ പ്രതീക്ഷയിലാണ് ചലച്ചിത്ര ലോകം. ദുൽഖർ സൽമാന്റെ വേഫെറർ ഫിലിംസാണ് ചിത്രം തിയേറ്ററുകളിൽ എത്തിക്കുന്നത്. പത്മഭൂഷൺ പുരസ്കാരത്തിന്റെ പശ്ചാത്തലത്തിൽ പദയാത്രയുടെ ലൊക്കേഷനിൽ നടന്ന ഈ ആഘോഷം ആരാധകർക്കിടയിലും സമൂഹമാധ്യമങ്ങളിലും ഇതിനോടകം വലിയ തരംഗമായിക്കഴിഞ്ഞു.
mammootty-shines-with-padma-bhushan-adoor-gopalakrishnan-honors-him-with-a-gold-medal-at-the-padayatra-location
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
