ചെലവ് കുറച്ച്, സൗകര്യങ്ങൾ കൂട്ടി; ഗ്രിംസ്ബിയുടെ സ്വപ്ന പദ്ധതി ‘പീച്ച് കിംഗ് സെന്റർ’ ജനങ്ങൾക്കായി തുറന്നു

ഗ്രിംസ്ബി: നയാഗ്ര മേഖലയിലെ ഗ്രിംസ്ബി (Grimsby) നിവാസികളുടെ ദീർഘകാല സ്വപ്നമായിരുന്ന ‘മേജർ റെഫ്രിജറേഷൻ പീച്ച് കിംഗ് സെന്റർ’ കഴിഞ്ഞ ശനിയാഴ്ച ഔദ്യോഗികമായി പ്രവർത്തനമാരംഭിച്ചു. നഗരസഭയുടെ പാർക്സ് & റീക്രിയേഷൻ ഡെവലപ്മെന്റ് രംഗത്തെ നിർണ്ണായക നാഴികക്കല്ലായ ഈ പദ്ധതി, ഏകദേശം 300-ഓളം വരുന്ന പ്രദേശവാസികളുടെ സാന്നിധ്യത്തിലാണ് ഉദ്ഘാടനം ചെയ്തത്. 12,075 ചതുരശ്ര മീറ്റർ വിസ്തീർണ്ണത്തിൽ അത്യാധുനിക സൗകര്യങ്ങളോടെ പണിതീർത്ത ഈ കേന്ദ്രം, പ്രതീക്ഷിച്ചതിലും കുറഞ്ഞ ചെലവിൽ പൂർത്തിയാക്കാൻ സാധിച്ചു എന്നത് ഭരണകൂടത്തിന് വലിയ നേട്ടമായി. ഏകദേശം 3.67 കോടി ഡോളർ (36.7 Million) ചെലവിട്ടാണ് നഗരത്തിന്റെ 2019-ലെ മാസ്റ്റർ പ്ലാനിന്റെ ഭാഗമായ ഈ വലിയ പദ്ധതി യാഥാർത്ഥ്യമാക്കിയത്.

ലിവിംഗ്സ്റ്റൺ അവന്യൂവിലെ പഴയ അരീനയോട് അനുബന്ധിച്ചാണ് ഈ പുതിയ കെട്ടിടം നിർമ്മിച്ചിരിക്കുന്നത്. രണ്ട് വലിയ ജിംനേഷ്യങ്ങൾ, ഫിറ്റ്‌നസ് സെന്റർ, ഇൻഡോർ വോക്കിംഗ് ട്രാക്ക്, യുവാക്കൾക്കായുള്ള പ്രത്യേക കേന്ദ്രം, കമ്മ്യൂണിറ്റി മീറ്റിംഗുകൾക്കായി വിവിധ ആവശ്യങ്ങൾക്ക് ഉപയോഗിക്കാവുന്ന മുറികൾ എന്നിവ ഇവിടെ ഒരുക്കിയിട്ടുണ്ട്. ഗ്രിംസ്ബി ബാസ്കറ്റ്‌ബോൾ അസോസിയേഷൻ ഉൾപ്പെടെ ഇരുപതിലധികം പ്രാദേശിക സംഘടനകളുടെ പ്രധാന പ്രവർത്തന കേന്ദ്രമായി ഇനി പീച്ച് കിംഗ് സെന്റർ മാറും. പുതിയ കോർട്ടുകൾ ലഭിച്ചതോടെ ഗ്രിംസ്ബിയിലെ ബാസ്കറ്റ്‌ബോൾ രംഗത്ത് വലിയ ഉണർവുണ്ടാകുമെന്നും ഓന്റാറിയോ ബാസ്കറ്റ്‌ബോൾ ലീഗ് മത്സരങ്ങൾക്കും ചാമ്പ്യൻഷിപ്പുകൾക്കും ഇവിടെ വേദിയൊരുങ്ങുമെന്നും കായിക പ്രേമികൾ പ്രതീക്ഷിക്കുന്നു.

ബാസ്കറ്റ്‌ബോളിന് പുറമെ പിക്കിൾ ബോൾ, വോളിബോൾ താരങ്ങൾക്കും മുതിർന്ന പൗരന്മാർക്കും ഒരുപോലെ പ്രയോജനപ്പെടുന്ന രീതിയിലാണ് ഈ കേന്ദ്രം വിഭാവനം ചെയ്തിരിക്കുന്നത്. പിക്കിൾബോൾ കളിക്കാൻ മാത്രമായി ആറ് പുതിയ കോർട്ടുകൾ ഇവിടെ സജ്ജീകരിച്ചിട്ടുണ്ട്. ഗ്രിംസ്ബിയിലെ 55 വയസ്സിന് മുകളിലുള്ളവരുടെ ആക്റ്റീവ് ലിവിംഗ് ക്ലബ്ബിന് പഴയതിനേക്കാൾ മൂന്നിരട്ടി സ്ഥലം ഇവിടെ ലഭിച്ചതോടെ ആർട്സ്, ക്രാഫ്റ്റ്സ്, ഫിറ്റ്‌നസ് ക്ലാസുകൾ എന്നിവയിൽ കൂടുതൽ പേരെ ഉൾപ്പെടുത്താൻ സാധിക്കും.

നിലവിലുള്ള അരീനയിൽ പുതിയ പെയിന്റിംഗും ഫ്ലോറിംഗും നടത്തി കൂടുതൽ ആകർഷകമാക്കിയിട്ടുണ്ട്. പ്രാദേശിക കമ്പനിയായ മേജർ റെഫ്രിജറേഷൻ പത്തു വർഷത്തേക്ക് നൽകിയ സ്പോൺസർഷിപ്പിന്റെ ഭാഗമായാണ് കേന്ദ്രത്തിന് ഈ പേര് നൽകിയത്. ഇതിനകം തന്നെ നാട്ടുകാർക്കിടയിൽ ‘ദ ഫ്രിഡ്ജ്’ (The Fridge) എന്ന ഓമനപ്പേരിലാണ് ഈ കേന്ദ്രം അറിയപ്പെടുന്നത്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Grimsby's dream project 'Peach King Centre' opens to the public