വാഷിങ്ടൻ: യുഎസിലുടനീളം ആഞ്ഞടിക്കുന്ന അതിശക്തമായ ഹിമക്കാറ്റിനെത്തുടർന്ന് രാജ്യം സ്തംഭനാവസ്ഥയിലേക്ക്. വാരാന്ത്യത്തിൽ ഷെഡ്യൂ( ചെയ്തിരുന്ന ഒൻപതിനായിരത്തോളം വിമാന സർവീസുകളാണ് നിലവിൽ റദ്ദാക്കിയത്. കാലാവസ്ഥാ പ്രവചനം മോശമായതിനെത്തുടർന്ന് എയർ ഇന്ത്യയുടെ ജനുവരി 25, 26 തീയതികളിലെ ന്യൂയോർക്ക്, നെവാർക്ക് സർവീസുകളും പൂർണ്ണമായും റദ്ദാക്കി. യാത്രക്കാരുടെയും ജീവനക്കാരുടെയും സുരക്ഷ കണക്കിലെടുത്താണ് ഈ തീരുമാനമെന്ന് എയർ ഇന്ത്യ അറിയിച്ചു.
ചുഴലിക്കാറ്റിന് സമാനമായ ആഘാതം സൃഷ്ടിക്കുന്ന ഈ ഹിമക്കാറ്റ് പകുതിയോളം അമേരിക്കൻ സംസ്ഥാനങ്ങളെ ബാധിച്ചിരിക്കുകയാണ്. ന്യൂ മെക്സിക്കോ മുതൽ ന്യൂ ഇംഗ്ലണ്ട് വരെയുള്ള 14 കോടി ജനങ്ങൾക്ക് ജാഗ്രതാ നിർദ്ദേശം നൽകി. കെന്റക്കി ഉൾപ്പെടെയുള്ള ഇടങ്ങളിൽ അടിയന്തരാവസ്ഥ പ്രഖ്യാപിക്കുകയും വിദ്യാഭ്യാസ സ്ഥാപനങ്ങൾക്ക് അവധി നൽകുകയും ചെയ്തിട്ടുണ്ട്. മഞ്ഞുവീഴ്ച അതിരൂക്ഷമായതോടെ പള്ളികളിലെ ഞായറാഴ്ച ശുശ്രൂഷകൾ പോലും ഓൺലൈൻ വഴി നടത്താനാണ് നിർദ്ദേശം.
ആലിപ്പഴത്തേക്കാൾ ചെറിയ മഞ്ഞുകട്ടകൾ വീണ് കൂമ്പാരമായി മാറുന്ന അപകടകരമായ സാഹചര്യമാണ് പലയിടത്തും. ജനങ്ങൾ വീടിനുള്ളിൽ തന്നെ കഴിയണമെന്ന് ഗവർണർമാർ കർശന നിർദ്ദേശം നൽകിയിട്ടുണ്ട്. കിഴക്കൻ ടെക്സസ് മുതൽ നോർത്ത് കാരോലൈന വരെയുള്ള മേഖലകളിൽ വരും മണിക്കൂറുകളിൽ മഞ്ഞുവീഴ്ച ഇനിയും ശക്തമാകുമെന്നാണ് ദേശീയ കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
US Winter Storm: Thousands of Flights Cancelled Due to US Winter Storm
