എഡ്മന്റൺ: ആൽബർട്ടയിലെ ആരോഗ്യമേഖല കടുത്ത പ്രതിസന്ധിയിലൂടെ കടന്നുപോകുമ്പോഴും പ്രീമിയർ ഡാനിയൽ സ്മിത്ത് മൂന്നാഴ്ചയായി മാധ്യമങ്ങളെ കാണാത്തതിനെതിരെ വ്യാപക വിമർശനം. സംസ്ഥാനത്തെ ആശുപത്രികളിൽ രോഗികളുടെ എണ്ണം വർദ്ധിക്കുന്നതും ചികിത്സയ്ക്കായുള്ള കാത്തിരിപ്പ് സമയം നീളുന്നതും കണക്കിലെടുത്ത് ‘ഹെൽത്ത് എമർജൻസി’ പ്രഖ്യാപിക്കണമെന്ന ഡോക്ടർമാരുടെയും നഴ്സുമാരുടെയും ആവശ്യം സർക്കാർ തള്ളിയതിന് പിന്നാലെയാണ് പ്രതിഷേധം ശക്തമായത്.
ജനുവരി 2-നാണ് പ്രീമിയർ അവസാനമായി മാധ്യമപ്രവർത്തകരുടെ ചോദ്യങ്ങൾക്ക് മറുപടി നൽകിയത്. ഇതിനുശേഷം കഴിഞ്ഞ 21 ദിവസമായി പൊതുവേദികളിൽ നിന്ന് വിട്ടുനിൽക്കുകയാണെന്ന് ആരോഗ്യ പ്രവർത്തകരുടെ സംഘടനയായ ‘ഫ്രണ്ട്സ് ഓഫ് മെഡിക്കെയർ’ കുറ്റപ്പെടുത്തി. ആരോഗ്യരംഗത്തെ അടിയന്തര സാഹചര്യങ്ങൾ ചർച്ച ചെയ്യുന്നതിന് പകരം ഊർജ്ജ മേഖലയിലെ സ്വകാര്യ ചടങ്ങുകളിൽ മാത്രമാണ് പ്രീമിയർ ശ്രദ്ധ നൽകുന്നതെന്ന് സംഘടനയുടെ പ്രസിഡന്റ് ക്രിസ് ഗാലവേ പറഞ്ഞു.
ആരോഗ്യവകുപ്പിന്റെ ചുമതലയുള്ള മന്ത്രി ദിവസങ്ങൾക്കുശേഷം പ്രതികരിച്ചെങ്കിലും പഴയ വാഗ്ദാനങ്ങൾ ആവർത്തിക്കുക മാത്രമാണ് ചെയ്തതെന്ന് വിമർശകർ ചൂണ്ടിക്കാട്ടുന്നു. കൃത്യമായ സമയപരിധിയോ സാമ്പത്തിക പദ്ധതിയോ ഇല്ലാത്ത ഇത്തരം പ്രസ്താവനകൾ നിലവിലെ പ്രതിസന്ധിക്ക് പരിഹാരമാകില്ലെന്ന് ഇവർ പറയുന്നു.
അതേസമയം, പ്രീമിയർ വിശ്രമമില്ലാതെ ജോലി ചെയ്യുകയാണെന്നും മന്ത്രിമാരുമായി നിരന്തരം ആശയവിനിമയം നടത്തുന്നുണ്ടെന്നും പ്രീമിയറുടെ ഓഫീസ് അറിയിച്ചു. റേഡിയോ പരിപാടിയിലൂടെ ജനങ്ങളെ അഭിസംബോധന ചെയ്യുമെന്നും അടുത്ത ആഴ്ച ഒട്ടാവയിൽ നടക്കുന്ന യോഗങ്ങൾക്ക് ശേഷം മാധ്യമങ്ങളെ കാണുമെന്നും ഔദ്യോഗിക വക്താക്കൾ വ്യക്തമാക്കി. എന്നാൽ, ഉത്തരവാദിത്തപ്പെട്ടവർ മൗനം പാലിക്കുന്നത് ആരോഗ്യ പ്രവർത്തകരുടെ മനോവീര്യം തകർക്കുമെന്നും സുതാര്യത ഉറപ്പാക്കാൻ സർക്കാർ തയ്യാറാകണമെന്നും രാഷ്ട്രീയ നിരീക്ഷകർ മുന്നറിയിപ്പ് നൽകുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
‘The premier is still missing in action’: watchdog group criticizes Alberta government over health-care concerns
