സസ്കാച്ചെവാൻ: സസ്കാച്ചെവാനിലെ ആശുപത്രികളിൽ വർധിച്ചുവരുന്ന അക്രമസംഭവങ്ങളും ആയുധങ്ങൾ ഉപയോഗിച്ചുള്ള അതിക്രമങ്ങളും കണക്കിലെടുത്ത് സുരക്ഷാ സംവിധാനങ്ങൾ കർശനമാക്കാൻ സർക്കാർ തീരുമാനിച്ചു. എമർജൻസി വിഭാഗങ്ങളിൽ ഉൾപ്പെടെ സുരക്ഷാ വീഴ്ചകൾ സംഭവിക്കുന്നു എന്ന പരാതിയെത്തുടർന്ന്, നിലവിലെ സാഹചര്യങ്ങൾ വിലയിരുത്താൻ സ്വതന്ത്ര അന്വേഷണ സമിതിയെ നിയോഗിക്കും. ആരോഗ്യ മന്ത്രാലയത്തിന്റെ നേതൃത്വത്തിൽ ഒരു തേർഡ് പാർട്ടി വിദഗ്ധ സംഘമായിരിക്കും നിലവിലെ സുരക്ഷാ ക്രമീകരണങ്ങൾ പരിശോധിക്കുക.
ആശുപത്രികളിലെ സുരക്ഷാ വിഭാഗത്തിന്റെ പ്രവർത്തനം, ജീവനക്കാരുടെ പരിശീലനം, ആധുനിക സുരക്ഷാ ഉപകരണങ്ങളുടെ ലഭ്യത എന്നിവ സമിതി പരിശോധിക്കും. ഇതിന്റെ ഭാഗമായി സസ്കാറ്റൂൺ, റീജൈന, പ്രിൻസ് ആൽബർട്ട്, നോർത്ത് ബാറ്റിൽഫോർഡ് എന്നിവിടങ്ങളിലെ എമർജൻസി വിഭാഗങ്ങളിൽ മെറ്റൽ ഡിറ്റക്ടറുകൾ സ്ഥാപിച്ചു തുടങ്ങി. സെന്റ് പോൾസ്, സസ്കാറ്റൂൺ സിറ്റി ഹോസ്പിറ്റൽ, റീജൈന ജനറൽ ഹോസ്പിറ്റൽ, പാസ്ക്വ ഹോസ്പിറ്റൽ എന്നിവിടങ്ങളിൽ ഇതിനോടകം തന്നെ പരിശോധനാ സംവിധാനങ്ങൾ നിലവിൽ വന്നു. വരും മാസങ്ങളിൽ കൂടുതൽ ആശുപത്രികളിലേക്ക് ഈ സംവിധാനം വ്യാപിപ്പിക്കുമെന്ന് സസ്കാച്ചുവൻ ഹെൽത്ത് അതോറിറ്റി (SHA) ചീഫ് എക്സിക്യൂട്ടീവ് ഓഫീസർ ആൻഡ്രൂ വിൽ അറിയിച്ചു.
അതേസമയം, സർക്കാരിന്റെ നടപടികൾ വൈകിപ്പോയെന്ന് പ്രതിപക്ഷമായ എൻഡിപി ആരോപിച്ചു. റോയൽ യൂണിവേഴ്സിറ്റി ആശുപത്രിയിൽ നിന്ന് മാരകായുധങ്ങൾ പിടിച്ചെടുത്തതും സെന്റ് പോൾസ് ആശുപത്രിയിൽ തോക്കും കത്തികളുമായി രോഗി എത്തിയതും ചൂണ്ടിക്കാട്ടിയാണ് പ്രതിപക്ഷത്തിന്റെ വിമർശനം. ആരോഗ്യ മേഖലയിലെ പ്രതിസന്ധികൾ പരിഹരിക്കുന്നതിൽ സർക്കാർ പരാജയമാണെന്നും ആരോഗ്യപ്രവർത്തകരുടെ സുരക്ഷ ഉറപ്പാക്കാൻ മതിയായ നടപടികൾ സ്വീകരിക്കുന്നില്ലെന്നും പ്രതിപക്ഷം കുറ്റപ്പെടുത്തി. നിലവിൽ റോയൽ യൂണിവേഴ്സിറ്റി ആശുപത്രിയിലും ജിം പാറ്റിസൺ ചിൽഡ്രൻസ് ആശുപത്രിയിലും പരീക്ഷണാടിസ്ഥാനത്തിൽ ഈ സുരക്ഷാ സംവിധാനങ്ങൾ പ്രവർത്തിക്കുന്നുണ്ട്.
saskatchewan-launches-independent-review-of-hospital-safety-amid-rising-security-concerns
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
