എഡ്മന്റൺ: ആൽബർട്ടയിലെ ആശുപത്രികൾ നേരിടുന്ന കടുത്ത തിരക്കും ആരോഗ്യപ്രതിസന്ധിയും ചർച്ച ചെയ്യാൻ നിയമസഭാ സമ്മേളനം അഞ്ച് ആഴ്ച നേരത്തെ വിളിച്ചുചേർക്കണമെന്ന് പ്രതിപക്ഷമായ എൻഡിപി ആവശ്യപ്പെട്ടു. എഡ്മന്റണിലെ ആശുപത്രിയിൽ ചികിത്സ കാത്തിരുന്ന രോഗി മരിച്ച പശ്ചാത്തലത്തിൽ, പ്രീമിയർ ഡാനിയേൽ സ്മിത്തിന്റെ സർക്കാർ ഉത്തരവാദിത്തം ഏറ്റെടുക്കണമെന്ന് എൻഡിപി നേതാവ് നഹീദ് നെൻഷി ചൊവ്വാഴ്ച അറിയിച്ചു. നിലവിൽ പ്രധാന ആശുപത്രികൾ 102 ശതമാനം ശേഷിയിലാണ് പ്രവർത്തിക്കുന്നതെന്നും ഈ സാഹചര്യം സാധാരണ നിലയിലാകുന്നതുവരെ പ്രവിശ്യയിൽ സ്റ്റേറ്റ് ഓഫ് എമർജൻസി പ്രഖ്യാപിക്കണമെന്നും അദ്ദേഹം ആവശ്യപ്പെട്ടു.
എമർജൻസി വാർഡുകളിലെ നീണ്ട കാത്തിരിപ്പിനെത്തുടർന്ന് ആൽബർട്ടയിലെ ആശുപത്രികളിൽ കുറഞ്ഞത് ആറ് മരണങ്ങളെങ്കിലും സംഭവിച്ചതായി സിടിവി ന്യൂസ് പുറത്തുവിട്ട രേഖകൾ വ്യക്തമാക്കുന്നു. എഡ്മന്റണിലെ എമർജൻസി വിഭാഗത്തിൽ എട്ടു മണിക്കൂറോളം കാത്തിരുന്ന വ്യക്തി കഴിഞ്ഞ മാസം മരിച്ച സംഭവത്തിന് പിന്നാലെയാണ് സർക്കാരിന് മേൽ സമ്മർദ്ദം ശക്തമായത്. എമർജൻസി വാർഡുകളിലെ ഇടനാഴികളും കാത്തിരിപ്പ് കേന്ദ്രങ്ങളും അതീവ അപകടാവസ്ഥയിലാണെന്ന് ചൂണ്ടിക്കാട്ടി ഡോക്ടർമാർ സർക്കാരിന് കത്തയച്ചു. ഒഴിവാക്കാമായിരുന്ന മരണങ്ങളും രോഗികളുടെ ദുരിതവും വിവരിക്കുന്ന റിപ്പോർട്ടാണ് ഡോക്ടർമാർ കൈമാറിയത്.
ആരോപണങ്ങൾ ഗൗരവകരമാണെന്നും എന്നാൽ ഇവ ഒറ്റപ്പെട്ട സംഭവങ്ങളാണെന്നുമാണ് ആശുപത്രി മന്ത്രി മാറ്റ് ജോൺസിന്റെ വിലയിരുത്തൽ. പ്രതിവർഷം നടക്കുന്ന 20 ലക്ഷത്തോളം എമർജൻസി സന്ദർശനങ്ങളിൽ 0.07 ശതമാനം മരണങ്ങളാണ് സംഭവിക്കുന്നതെന്ന് അദ്ദേഹം ചൂണ്ടിക്കാട്ടി.
അജ്ഞാതരായ വ്യക്തികൾ നൽകുന്ന ഇത്തരം റിപ്പോർട്ടുകൾ പ്രവിശ്യയിലെ ആരോഗ്യരംഗത്തെ പ്രൊഫഷണലുകൾ നൽകുന്ന സേവനത്തിന്റെ യഥാർത്ഥ പ്രതിഫലനമല്ലെന്ന് അദ്ദേഹം പറഞ്ഞു. എങ്കിലും റിപ്പോർട്ടുകൾ പരിശോധിക്കുമെന്നും ആവശ്യമായ നടപടികൾ സ്വീകരിക്കുമെന്നും മന്ത്രി അറിയിച്ചു.
ആശുപത്രികളിൽ നിന്ന് ഡിസ്ചാർജ് ചെയ്യപ്പെടുന്ന രോഗികളെ സ്വീകരിക്കുന്നതിനായി ലോങ്ങ് ടേം കെയർ സെന്ററുകളിൽ സായാഹ്നങ്ങളിലും വാരാന്ത്യങ്ങളിലും കൂടുതൽ ജീവനക്കാരെ നിയോഗിക്കുന്നത് പരിഗണനയിലാണെന്ന് മന്ത്രി വ്യക്തമാക്കി.
കാൽഗറിയിലെ പീറ്റർ ലൗഗീഡ് സെന്ററിൽ 151 മില്യൺ ഡോളറിന്റെ വികസന പ്രവർത്തനങ്ങൾ പൂർത്തിയായതായും ഫെബ്രുവരി അവസാനത്തോടെ 97 പുതിയ കിടക്കകൾ സജ്ജമാകുമെന്നും അദ്ദേഹം അറിയിച്ചു. കൂടാതെ, എമർജൻസി വാർഡുകളിലെ ചികിത്സ വേഗത്തിലാക്കാൻ ഫെബ്രുവരി ഒന്ന് മുതൽ ട്രിയാഷ് ലെയ്സൺ ഫിസിഷ്യൻ പ്രോഗ്രാം ആരംഭിക്കുമെന്നും സർക്കാർ അറിയിച്ചിട്ടുണ്ട്.
മുൻപ് നിലവിലുണ്ടായിരുന്ന ആൽബർട്ട ഹെൽത്ത് സർവീസസിനെ സ്മിത്ത് സർക്കാർ വിഭജിച്ചതോടെ കേന്ദ്രീകൃത നിയന്ത്രണ സംവിധാനം തകർന്നതാണ് ഇപ്പോഴത്തെ പ്രതിസന്ധിക്ക് കാരണമെന്ന് നഹീദ് നെൻഷി കുറ്റപ്പെടുത്തി. സൗത്ത് എഡ്മന്റണിലെ പുതിയ ആശുപത്രിയുടെ നിർമ്മാണം 2024-ൽ നിർത്തിവെച്ചില്ലായിരുന്നുവെങ്കിൽ ഇപ്പോൾ അത് പ്രവർത്തനസജ്ജമാകുമായിരുന്നുവെന്നും എൻഡിപി ചൂണ്ടിക്കാട്ടി. എന്നാൽ പ്രവിശ്യയിൽ അടിയന്തരാവസ്ഥ പ്രഖ്യാപിക്കേണ്ട സാഹചര്യമില്ലെന്നും നിലവിലുള്ള സംവിധാനങ്ങൾ ഏകോപിപ്പിച്ച് പ്രതിസന്ധി പരിഹരിക്കാൻ സാധിക്കുമെന്നുമാണ് മന്ത്രി മാറ്റ് ജോൺസിന്റെ നിലപാട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Hospital crisis in Alberta deepens; Opposition calls for emergency legislative session
