ഇനി ദൂരപരിധി തടസ്സമല്ല; പക്ഷാഘാത ചികിത്സയിൽ ചരിത്രമെഴുതി റോബോട്ടിക് ശസ്ത്രക്രിയ; വൈദ്യശാസ്ത്രത്തിൽ വിപ്ലവകരമായ മാറ്റത്തിനൊരുങ്ങി കാനഡ

ടൊറന്റോ: കിലോമീറ്ററുകൾ അകലെയുള്ള രോഗിക്ക് ഇന്റർനെറ്റ് കണക്ഷന്റെയും റോബോട്ടിന്റെയും സഹായത്തോടെ വിദഗ്ധ ചികിത്സ നൽകി വൈദ്യശാസ്ത്രരംഗത്ത് പുതിയ ചരിത്രമെഴുതുകയാണ് ടൊറന്റോയിലെ സെന്റ് മൈക്കിൾസ് ഹോസ്പിറ്റലിലെ ഡോക്ടർമാർ. ഡോ. വിറ്റർ മെൻഡസ് പെരേരയുടെ നേതൃത്വത്തിലുള്ള സംഘം റോബോട്ടിക് സാങ്കേതികവിദ്യയിലൂടെ 10 മസ്തിഷ്ക ആൻജിയോഗ്രാം (Brain Angiogram) പരിശോധനകൾ വിജയകരമായി പൂർത്തിയാക്കി.

ഫൈബർ ഒപ്റ്റിക് ഇന്റർനെറ്റ് കണക്ഷൻ ഉപയോഗിച്ച് നിയന്ത്രിക്കാവുന്ന റോബോട്ട് വഴിയാണ് ഡോക്ടർമാർ ഈ നേട്ടം കൈവരിച്ചത്. ആദ്യഘട്ടത്തിൽ ശസ്ത്രക്രിയ മുറിയിൽ നിന്ന് റോബോട്ടിനെ നിയന്ത്രിച്ച ഡോക്ടർമാർ, പിന്നീട് 12 മീറ്ററും ഒടുവിൽ ആറ് കിലോമീറ്റർ അകലെയുള്ള മറ്റൊരു ആശുപത്രിയിലിരുന്നും വിജയകരമായി പരിശോധനകൾ പൂർത്തിയാക്കി. ഇതോടെ അതിവേഗ ചികിത്സ ആവശ്യമുള്ള പക്ഷാഘാതം (Stroke) പോലുള്ള രോഗാവസ്ഥകളിൽ ദൂരപരിധി ഒരു തടസ്സമാകില്ലെന്ന് തെളിയിക്കപ്പെട്ടിരിക്കുകയാണ്.

ആൻജിയോഗ്രാമുകൾക്ക് പിന്നാലെ, 500 കിലോമീറ്റർ അകലെയുള്ള സൂ സെന്റ് മേരിയിലെ (Sault Ste. Marie) രോഗിക്ക് റോബോട്ട് വഴി ശസ്ത്രക്രിയ നടത്താനാണ് ഡോക്ടർമാരുടെ തീരുമാനം. മസ്തിഷ്കത്തിലെ രക്തക്കുഴലുകളിലെ തടസ്സം നീക്കം ചെയ്യുന്ന ‘എൻഡോവാസ്കുലർ ത്രോംബെക്ടമി’ (Endovascular Thrombectomy) എന്ന സങ്കീർണ്ണ ശസ്ത്രക്രിയയാണ് ഇതിലൂടെ ലക്ഷ്യമിടുന്നത്. ഹെൽത്ത് കാനഡയുടെ അനുമതി ലഭിച്ചാൽ ലോകത്തിലാദ്യമായാകും ഇത്രയും ദൂരത്തിരുന്ന് ഒരാൾക്ക് വിദഗ്ധ ശസ്ത്രക്രിയ നടത്തുന്നത്.

വിദഗ്ധ ഡോക്ടർമാരുടെ സേവനം ലഭ്യമല്ലാത്ത ഗ്രാമീണ മേഖലകളിൽ ഈ സാങ്കേതികവിദ്യ വലിയ മാറ്റമുണ്ടാക്കും. നിലവിൽ സൂ സെന്റ് മേരി പോലുള്ള സ്ഥലങ്ങളിൽ പക്ഷാഘാതം സംഭവിക്കുന്ന രോഗികളെ വിമാനമാർഗ്ഗം മണിക്കൂറുകൾ യാത്ര ചെയ്യിച്ചാണ് വിദഗ്ധ ചികിത്സാ കേന്ദ്രങ്ങളിൽ എത്തിക്കുന്നത്. ഇത്തരം യാത്രകൾക്കിടയിൽ പലപ്പോഴും നിർണ്ണായകമായ സമയം നഷ്ടപ്പെടാറുണ്ട്. എന്നാൽ റോബോട്ട് എത്തുന്നതോടെ പ്രാദേശിക ആശുപത്രികളിൽ വച്ചുതന്നെ ടൊറന്റോയിലെ വിദഗ്ധ ഡോക്ടർമാർക്ക് ശസ്ത്രക്രിയ നടത്താൻ സാധിക്കും.

ശസ്ത്രക്രിയയ്ക്കിടെ ഇന്റർനെറ്റ് ബന്ധം വിച്ഛേദിക്കപ്പെട്ടാൽ എന്ത് ചെയ്യും എന്ന ആശങ്ക ഉയരുന്നുണ്ടെങ്കിലും, അത്തരം സാഹചര്യങ്ങൾ നേരിടാനുള്ള സുരക്ഷാ സംവിധാനങ്ങൾ റോബോട്ടിൽ സജ്ജീകരിച്ചിട്ടുണ്ടെന്ന് അധികൃതർ വ്യക്തമാക്കി. ഏകദേശം പത്ത് മുതൽ മുപ്പത് ലക്ഷം ഡോളർ വരെയാണ് ശസ്ത്രക്രിയ റോബോട്ടിന്റെ വില. കൂടാതെ ഓരോ ശസ്ത്രക്രിയയ്ക്കും ഉപയോഗിക്കുന്ന ഉപകരണങ്ങൾക്കും വലിയ ചെലവ് വരും. എങ്കിലും, കൃത്യസമയത്ത് ചികിത്സ ലഭിക്കുന്നതിലൂടെ രോഗിയുടെ വൈകല്യങ്ങൾ കുറയ്ക്കാനും അതുവഴി ഭാവിയിലെ ചികിത്സാച്ചെലവുകൾ ലാഭിക്കാനും സാധിക്കുമെന്ന് ഡോ. പെരേര ചൂണ്ടിക്കാട്ടുന്നു. ഭാവിയിൽ ലോകമെമ്പാടുമുള്ള പക്ഷാഘാത ചികിത്സാ രംഗത്ത് വലിയൊരു വിപ്ലവമായി ഈ റോബോട്ടിക് ശസ്ത്രക്രിയ മാറുമെന്നാണ് വിദഗ്ധരുടെ വിലയിരുത്തൽ.

remote-robotic-procedure

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82