സാൽമൊണല്ല ബാക്ടീരിയയുടെ സാന്നിധ്യം; ഈ ബ്രാൻഡിന്റെ ഉൽപ്പന്നങ്ങൾ ഉപയോ​ഗിക്കരുതെന്ന് മുന്നറിയിപ്പ്

കാൽഗറി: ആൽബർട്ട, ബ്രിട്ടീഷ് കൊളംബിയ എന്നീ പ്രവിശ്യകളിൽ വിൽക്കുന്ന ‘സി ജി മെയ്’ (Si Ji Mei) ബ്രാൻഡ് മുട്ട ഉൽപ്പന്നങ്ങൾ കനേഡിയൻ ഫുഡ് ഇൻസ്പെക്ഷൻ ഏജൻസി (CFIA) തിരിച്ചുവിളിച്ചു. സാൽമൊണല്ല ബാക്ടീരിയയുടെ സാന്നിധ്യം കണ്ടെത്തിയതിനെത്തുടർന്നാണ് നടപടി. സി ജി മെയ് ബ്രാൻഡിന്റെ 580 ഗ്രാം തൂക്കമുള്ള Wuhan Egg Sheets with Glutinous Rice എന്ന ഉൽപ്പന്നമാണ് പിൻവലിച്ചത്. ഇതിന്റെ യുപിസി കോഡ് 6 977013 950971 എന്നും കാലാവധി തീരുന്ന തീയതി 12/09/2025 എന്നുമാണ് രേഖപ്പെടുത്തിയിരിക്കുന്നത്. കമ്പനി തന്നെ മുൻകൈ എടുത്താണ് ഉൽപ്പന്നങ്ങൾ വിപണിയിൽ നിന്ന് പിൻവലിക്കാൻ തുടങ്ങിയത്.

ഈ ഉൽപ്പന്നം കഴിച്ചവർക്ക് ആരോഗ്യപ്രശ്നങ്ങൾ ഉണ്ടായതായി റിപ്പോർട്ടുകൾ ലഭിച്ചിട്ടുണ്ടെന്ന് സിഎഫ്‌ഐഎ അറിയിച്ചു. ഉപഭോക്താക്കൾ തങ്ങളുടെ കൈവശമുള്ള ഉൽപ്പന്നങ്ങൾ പരിശോധിക്കണമെന്നും ഇവ ഉടനടി നശിപ്പിക്കുകയോ വാങ്ങിയ സ്ഥലത്ത് തിരികെ നൽകുകയോ ചെയ്യണമെന്നും നിർദ്ദേശമുണ്ട്. ഉൽപ്പന്നം ഉപയോഗിച്ച ശേഷം അസുഖം ബാധിച്ചതായി സംശയമുള്ളവർ ആരോഗ്യവിദഗ്ധരുടെ സഹായം തേടണമെന്നും അധികൃതർ വ്യക്തമാക്കി.

പനി, തലവേദന, ഛർദ്ദി, വയറുവേദന, വയറിളക്കം എന്നിവയാണ് സാൽമൊണല്ല ബാധയുടെ പ്രധാന ലക്ഷണങ്ങൾ. ഇത് പിന്നീട് കടുത്ത സന്ധിവാതം പോലുള്ള സങ്കീർണ്ണമായ ആരോഗ്യപ്രശ്നങ്ങളിലേക്ക് നയിച്ചേക്കാം. ചെറിയ കുട്ടികൾ, ഗർഭിണികൾ, പ്രായമായവർ, പ്രതിരോധശേഷി കുറഞ്ഞവർ എന്നിവരിൽ സാൽമൊണല്ല ബാധ ഗുരുതരമാകാൻ സാധ്യതയുണ്ടെന്ന് ആരോഗ്യവകുപ്പ് മുന്നറിയിപ്പ് നൽകി. കേടായ മണമോ നിറമോ ഇല്ലെങ്കിലും സാൽമൊണല്ല കലർന്ന ഭക്ഷണം ആരോഗ്യത്തിന് ഹാനികരമാണ്.

തിരിച്ചുവിളിച്ച ഉൽപ്പന്നങ്ങൾ വിൽക്കുന്നില്ലെന്ന് ഉറപ്പാക്കാൻ സിഎഫ്‌ഐഎ വിപണിയിൽ പരിശോധന നടത്തുന്നുണ്ട്. ഭക്ഷണത്തിന്റെ സുരക്ഷിതത്വം ഉറപ്പാക്കാൻ ഏജൻസി നടത്തുന്ന അന്വേഷണത്തിൽ കൂടുതൽ ഉൽപ്പന്നങ്ങൾ തിരിച്ചുവിളിച്ചേക്കാം. രാജ്യവ്യാപകമായി പിസ്ത ഉൽപ്പന്നങ്ങളുമായി ബന്ധപ്പെട്ട സാൽമൊണല്ല ബാധ തുടരുന്നതിനിടെയാണ് പുതിയ റിപ്പോർട്ട് പുറത്തുവരുന്നത്. പിസ്തയുമായി ബന്ധപ്പെട്ട ബാധയിൽ ഇതുവരെ 155 കേസുകളും 24 ആശുപത്രിവാസങ്ങളും റിപ്പോർട്ട് ചെയ്തിട്ടുണ്ട്.

ഇറാനിൽ നിന്നുള്ള പിസ്ത ഉൽപ്പന്നങ്ങൾ ഇറക്കുമതി ചെയ്യുന്നതിനും കാനഡയിൽ അവ ഉപയോഗിച്ച് ഭക്ഷ്യവസ്തുക്കൾ തയ്യാറാക്കുന്നതിനും സിഎഫ്‌ഐഎ താൽക്കാലിക നിരോധനം ഏർപ്പെടുത്തിയിട്ടുണ്ട്. സാൽമൊണല്ല വ്യാപനം തടയുന്നതിനായി ലൈസൻസ് നിബന്ധനകളിൽ മാറ്റം വരുത്തിയതായും ഏജൻസി അറിയിച്ചു. ഭക്ഷണസാധനങ്ങൾ ഉപയോഗിക്കുന്നതിനും വിതരണം ചെയ്യുന്നതിനും മുൻപ് ഔദ്യോഗിക അറിയിപ്പുകൾ ശ്രദ്ധിക്കണമെന്ന് അധികൃതർ പൊതുജനങ്ങളോട് അറിയിച്ചു.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

Presence of Salmonella bacteria; Warning against using this brand’s products