ന്യൂഡൽഹി: മൈക്രോ ബ്ലോഗിംഗ് പ്ലാറ്റ്ഫോമായ എക്സിലെ (X) ആർട്ടിഫിഷ്യൽ ഇൻ്റലിജൻസ് ചാറ്റ്ബോട്ടായ ‘ഗ്രോക്ക്’ (Grok) വഴി അശ്ലീല ഉള്ളടക്കങ്ങൾ നിർമ്മിക്കുന്നതിനെതിരെ കർശന നടപടിയുമായി കേന്ദ്ര സർക്കാർ. ഗ്രോക്ക് ഉപയോഗിച്ച് നിർമ്മിച്ച ലൈംഗികത പ്രകടമാക്കുന്ന ചിത്രങ്ങളും വീഡിയോകളും അടിയന്തരമായി നീക്കം ചെയ്യാൻ കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം എക്സിന് നിർദ്ദേശം നൽകി. 72 മണിക്കൂറിനുള്ളിൽ ഉള്ളടക്കം നീക്കം ചെയ്ത് സ്വീകരിച്ച നടപടികളെക്കുറിച്ച് വിശദമായ റിപ്പോർട്ട് സമർപ്പിക്കാനാണ് മന്ത്രാലയത്തിൻ്റെ അന്ത്യശാസനം.
ഗ്രോക്ക് എഐ (Grok AI) ഉപയോഗിച്ച് സ്ത്രീകളുടെ അശ്ലീല ചിത്രങ്ങൾ ഉണ്ടാക്കുന്നതും അവ പ്രചരിപ്പിക്കുന്നതും തടയണമെന്ന് ആവശ്യപ്പെട്ട് ശിവസേന എംപി പ്രിയങ്ക ചതുർവേദി ഐടി മന്ത്രി അശ്വിനി വൈഷ്ണവിന് കത്തയച്ചിരുന്നു. ഇതിന് പിന്നാലെയാണ് കേന്ദ്രത്തിൻ്റെ ഇടപെടൽ. പ്ലാറ്റ്ഫോമിലെ സുരക്ഷാ വീഴ്ചകളിൽ മന്ത്രാലയം ശക്തമായ അതൃപ്തി രേഖപ്പെടുത്തി. 2000-ലെയും 2021-ലെയും ഐടി നിയമങ്ങൾ അനുസരിച്ച് സോഷ്യൽ മീഡിയ കമ്പനികൾ പാലിക്കേണ്ട സുരക്ഷാ മുൻകരുതലുകളിൽ എക്സ് (X) വലിയ വീഴ്ച വരുത്തിയെന്ന് മന്ത്രാലയം നോട്ടീസിൽ പറഞ്ഞു.
സ്ത്രീകളെയും കുട്ടികളെയും ലക്ഷ്യം വെച്ച് ലൈംഗികത പ്രകടമാക്കുന്ന സിന്തറ്റിക് ചിത്രങ്ങളും വീഡിയോകളും നിർമ്മിക്കാൻ ഗ്രോക്ക് വ്യാപകമായി ദുരുപയോഗം ചെയ്യപ്പെടുന്നതായി മന്ത്രാലയം കണ്ടെത്തി. ഗ്രോക്കിൻ്റെ സാങ്കേതികവും ഭരണപരവുമായ ചട്ടക്കൂടുകൾ പുനഃപരിശോധിക്കണമെന്നും നിയമവിരുദ്ധ ഉള്ളടക്കം സൃഷ്ടിക്കുന്നത് തടയാൻ കർശനമായ നിയന്ത്രണങ്ങൾ ഏർപ്പെടുത്തണമെന്നും എക്സിനോട് ആവശ്യപ്പെട്ടിട്ടുണ്ട്. നിയമലംഘനം നടത്തുന്ന അക്കൗണ്ടുകൾ റദ്ദാക്കാനും നിർദ്ദേശമുണ്ട്.
നിർദ്ദിഷ്ട സമയപരിധിക്കുള്ളിൽ നടപടി സ്വീകരിക്കുന്നതിൽ പരാജയപ്പെട്ടാൽ, ഐടി നിയമത്തിലെ സെക്ഷൻ 79 പ്രകാരം പ്ലാറ്റ്ഫോമിന് ലഭിക്കുന്ന നിയമ പരിരക്ഷ (Safe Harbour Protection) നഷ്ടമാകുമെന്ന് കേന്ദ്രം മുന്നറിയിപ്പ് നൽകി. ഇതോടൊപ്പം ഭാരതീയ ന്യായ് സംഹിത (BNS), പോക്സോ (POCSO) നിയമം എന്നിവയുൾപ്പെടെയുള്ള വിവിധ ക്രിമിനൽ നിയമങ്ങൾ പ്രകാരം പ്ലാറ്റ്ഫോമിനും ഉദ്യോഗസ്ഥർക്കുമെതിരെ ശിക്ഷാനടപടികൾ സ്വീകരിക്കും.
സ്ത്രീകളുടെ സ്വകാര്യതയും അന്തസ്സും ലംഘിക്കുന്ന ഇത്തരം എഐ ദുരുപയോഗങ്ങൾ തടയേണ്ടത് അനിവാര്യമാണെന്ന് പ്രിയങ്ക ചതുർവേദി എംപി പറഞ്ഞു. ഓൺലൈനിൽ ചിത്രങ്ങൾ പങ്കുവെക്കുന്ന സ്ത്രീകളെ ലക്ഷ്യമിട്ടാണ് പ്രധാനമായും ഇത്തരം വ്യാജ ഉള്ളടക്കങ്ങൾ നിർമ്മിക്കപ്പെടുന്നത്. വിഷയത്തിൽ കേന്ദ്ര സർക്കാർ സ്വീകരിച്ച വേഗത്തിലുള്ള നടപടിയെ അവർ സ്വാഗതം ചെയ്യുകയും ഐടി മന്ത്രിക്ക് നന്ദി അറിയിക്കുകയും ചെയ്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Remove sexual content made in Grok AI; Central government gives X a 72-hour ultimatum
