കുഞ്ഞുങ്ങൾ കുറയുന്നു: ഗർഭനിരോധന ഗുളികകൾക്കും കോണ്ടത്തിനും അധിക നികുതി ഏർപ്പെടുത്തി ചൈന

ബീജിംഗ്: രാജ്യത്തെ ജനനനിരക്ക് ഉയർത്തുന്നതിനുള്ള നടപടികളുടെ ഭാഗമായി ഗർഭനിരോധന ഉപാധികൾക്ക് ചൈന നികുതി ഏർപ്പെടുത്തി. ജനുവരി ഒന്നു മുതൽ പ്രാബല്യത്തിൽ വന്ന പുതിയ നികുതി പരിഷ്കരണ പ്രകാരം ഗർഭനിരോധന ഗുളികകൾ, കോണ്ടം തുടങ്ങിയവയ്ക്ക് 13 ശതമാനം വിൽപ്പന നികുതി നൽകണം. അതേസമയം, കുട്ടികളുടെ സംരക്ഷണവുമായി ബന്ധപ്പെട്ട സേവനങ്ങളെ നികുതിയിൽ നിന്ന് ഒഴിവാക്കിയിട്ടുണ്ട്.

കഴിഞ്ഞ മൂന്ന് വർഷമായി ചൈനയിലെ ജനസംഖ്യയിൽ ഇടിവ് രേഖപ്പെടുത്തുന്ന പശ്ചാത്തലത്തിലാണ് ഈ നടപടി. 1994 മുതൽ നിലനിന്നിരുന്ന നികുതി ഇളവുകളാണ് ഇപ്പോൾ എടുത്തുമാറ്റിയത്. വിവാഹ സംബന്ധമായ സേവനങ്ങൾ, വയോജന സംരക്ഷണം എന്നിവയെ മൂല്യവർദ്ധിത നികുതിയിൽ (VAT) നിന്ന് ഒഴിവാക്കിയിട്ടുണ്ട്. ജനനനിരക്ക് കുറയുന്നതും ജനസംഖ്യയിൽ പ്രായമായവരുടെ എണ്ണം കൂടുന്നതും ചൈനീസ് സമ്പദ്‌വ്യവസ്ഥയ്ക്ക് വെല്ലുവിളിയാകുന്നു എന്ന വിലയിരുത്തലിനെത്തുടർന്നാണ് സർക്കാർ ഈ മാറ്റങ്ങൾ കൊണ്ടുവരുന്നത്.

2024-ൽ ചൈനയിൽ ജനിച്ച കുട്ടികളുടെ എണ്ണം 95.4 ലക്ഷം മാത്രമാണ്. പത്ത് വർഷം മുമ്പുണ്ടായിരുന്ന ജനനനിരക്കിന്റെ പകുതി മാത്രമാണിത്. ജനനനിരക്ക് വർദ്ധിപ്പിക്കുന്നതിനായി മാതാപിതാക്കൾക്കുള്ള അവധി ദീർഘിപ്പിക്കുക, സാമ്പത്തിക സഹായങ്ങൾ നൽകുക തുടങ്ങിയ പദ്ധതികളും സർക്കാർ നടപ്പിലാക്കുന്നുണ്ട്. കുട്ടികളെ വളർത്തുന്നതിനായുള്ള അമിത ചെലവും വിദ്യാഭ്യാസ മേഖലയിലെ മത്സരവുമാണ് യുവാക്കളെ കുട്ടികളുണ്ടാകുന്നതിൽ നിന്ന് പിന്നോട്ട് വലിക്കുന്ന പ്രധാന ഘടകങ്ങൾ എന്ന് പഠനങ്ങൾ ചൂണ്ടിക്കാട്ടുന്നു.

ഗർഭനിരോധന ഉപാധികളുടെ വില വർദ്ധിക്കുന്നത് അനാവശ്യ ഗർഭധാരണങ്ങൾക്കും എച്ച്.ഐ.വി (HIV) ബാധിതരുടെ എണ്ണം കൂടുന്നതിനും കാരണമായേക്കാമെന്ന് ഒരു വിഭാഗം ആശങ്ക പ്രകടിപ്പിക്കുന്നുണ്ട്. താഴ്ന്ന വരുമാനക്കാർക്കും വിദ്യാർത്ഥികൾക്കും ഇത് തിരിച്ചടിയായേക്കുമെന്നും വിലയിരുത്തലുകളുണ്ട്. എന്നാൽ രാജ്യത്തെ ഭവന പ്രതിസന്ധിയും കടബാധ്യതയും നേരിടാൻ കൂടുതൽ നികുതി സമാഹരിക്കാനുള്ള സർക്കാരിന്റെ നീക്കമാണിതെന്ന് സാമ്പത്തിക വിദഗ്ധർ അഭിപ്രായപ്പെടുന്നു.

ജനസംഖ്യാ വർധനവിനായുള്ള സർക്കാർ ഇടപെടലുകൾ വ്യക്തിസ്വാതന്ത്ര്യത്തിലേക്കുള്ള കടന്നുകയറ്റമാണെന്ന വിമർശനവും ചൈനയിൽ ഉയരുന്നുണ്ട്. ദക്ഷിണ കൊറിയ, ജപ്പാൻ തുടങ്ങിയ ഏഷ്യൻ രാജ്യങ്ങളും സമാനമായ ജനസംഖ്യാ പ്രതിസന്ധി നേരിടുന്നുണ്ടെങ്കിലും, ചൈനീസ് സർക്കാരിന്റെ കർശനമായ നികുതി നയങ്ങൾ ജനങ്ങൾക്കിടയിൽ സമ്മിശ്ര പ്രതികരണമാണ് ഉണ്ടാക്കിയിരിക്കുന്നത്.

condom-tax-and-cheaper-childcare:-china’s-plan-to-boost-birth-rates

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt