എഡ്മന്റണിൽ ചികിത്സ കിട്ടാതെ മലയാളി മരിച്ച സംഭവം; കാനഡയിലെ ആരോഗ്യമേഖലയിലെ പ്രതിസന്ധി ചർച്ചയാകുന്നു

ആൽബർട്ട: എഡ്മന്റണിലെ ആശുപത്രിയിൽ എട്ട് മണിക്കൂർ കാത്തിരുന്നിട്ടും അടിയന്തര ചികിത്സ ലഭിക്കാതെ മലയാളിയായ പ്രശാന്ത് ശ്രീകുമാർ (44) മരിച്ച സംഭവത്തിൽ കാനഡയിലെ ആരോഗ്യ സംവിധാനത്തിനെതിരെ വ്യാപക വിമർശനം. ഡോക്ടർമാരുടെ രൂക്ഷമായ ക്ഷാമവും ആശുപത്രികളിലെ നീണ്ട കാത്തിരിപ്പും രാജ്യത്തെ ആരോഗ്യമേഖലയെ പ്രതിസന്ധിയിലാക്കുന്നതായി റിപ്പോർട്ടുകൾ വ്യക്തമാക്കുന്നു.

അക്കൗണ്ടന്റായ പ്രശാന്ത് ശ്രീകുമാറിന് ഡിസംബർ 22-ന് ജോലിസ്ഥലത്ത് വെച്ച് നെഞ്ചുവേദന അനുഭവപ്പെട്ടതിനെ തുടർന്നാണ് എഡ്മന്റണിലെ ഗ്രേ നൺസ് കമ്മ്യൂണിറ്റി ഹോസ്പിറ്റലിൽ പ്രവേശിപ്പിച്ചത്. ആശുപത്രിയിലെ വെയിറ്റിംഗ് റൂമിൽ എട്ട് മണിക്കൂറിലധികം കാത്തിരുന്നിട്ടും വേദനസംഹാരികൾ മാത്രമാണ് ഇദ്ദേഹത്തിന് നൽകിയതെന്ന് ബന്ധുക്കൾ ആരോപിച്ചു. തുടർന്ന് ചികിത്സാ കേന്ദ്രത്തിലേക്ക് മാറ്റുന്നതിനിടെ പ്രശാന്ത് കുഴഞ്ഞുവീഴുകയായിരുന്നു. ഹൃദയസ്തംഭനമാണ് മരണകാരണമെന്നാണ് പ്രാഥമിക നിഗമനം. ഭാര്യയും മൂന്ന് മക്കളും അടങ്ങുന്നതാണ് ഇദ്ദേഹത്തിന്റെ കുടുംബം.

കാനഡയിലെ എമർജൻസി കെയർ സംവിധാനത്തിന്റെ പരാജയമാണ് ഈ സംഭവത്തിലൂടെ പുറത്തുവരുന്നതെന്ന് വിലയിരുത്തപ്പെടുന്നു. നിലവിൽ കാനഡയിൽ 1,000 പേർക്ക് 2.8 ഡോക്ടർമാർ എന്ന നിരക്ക് മാത്രമാണുള്ളതെന്ന് റിപ്പോർട്ടുകൾ വ്യക്തമാക്കുന്നു. ഇത് ഒഇസിഡി (OECD) രാജ്യങ്ങളിലെ ശരാശരിയായ 3.7-നേക്കാൾ വളരെ കുറവാണ്. രാജ്യത്ത് ഏകദേശം 59 ലക്ഷം പേർക്ക് സ്ഥിരമായ പ്രാഥമിക ആരോഗ്യ സേവനങ്ങൾ ലഭ്യമാകുന്നില്ലെന്ന് കനേഡിയൻ മെഡിക്കൽ അസോസിയേഷന്റെ പഠനങ്ങൾ ചൂണ്ടിക്കാട്ടുന്നു.

ജനുവരിയിൽ പുറത്തിറങ്ങിയ ഫെഡറൽ ഗവൺമെന്റ് റിപ്പോർട്ട് പ്രകാരം കാനഡയിലെ തൊഴിൽ വിപണിയിൽ 23,000 ഫാമിലി ഡോക്ടർമാരുടെ കുറവുണ്ട്. കൂടാതെ 28,000 രജിസ്റ്റേർഡ് നഴ്‌സുമാരുടെയും 14,000 ലൈസൻസ്ഡ് പ്രാക്ടിക്കൽ നഴ്‌സുമാരുടെയും കുറവ് രാജ്യം നേരിടുന്നു. നഴ്‌സിംഗ് തസ്തികകളിൽ കഴിഞ്ഞ അഞ്ച് വർഷത്തിനിടെ 147 ശതമാനം വർദ്ധനവാണ് രേഖപ്പെടുത്തിയിരിക്കുന്നത്. നിലവിൽ 42,045 നഴ്‌സിംഗ് ഒഴിവുകൾ നികത്തപ്പെടാതെ കിടക്കുകയാണ്.

വിദേശത്ത് നിന്ന് പഠനം പൂർത്തിയാക്കിയ പതിനായിരക്കണക്കിന് ആരോഗ്യ പ്രവർത്തകർ കാനഡയിൽ ഉണ്ടായിട്ടും സങ്കീർണ്ണമായ ലൈസൻസിംഗ് നടപടികൾ കാരണം അവർക്ക് ഈ മേഖലയിൽ ജോലി ചെയ്യാൻ സാധിക്കുന്നില്ല. രോഗിക്ക് കടുത്ത ശാരീരിക ബുദ്ധിമുട്ടുകൾ ഉണ്ടാകുന്ന ആദ്യത്തെ ഒരു മണിക്കൂർ അടിയന്തര ചികിത്സ ലഭ്യമാക്കേണ്ടത് അത്യന്താപേക്ഷിതമാണെന്ന് വിദഗ്ധർ ചൂണ്ടിക്കാട്ടുന്നു. പ്രശാന്ത് ശ്രീകുമാറിന്റെ കേസിൽ എട്ട് മണിക്കൂർ നീണ്ട കാത്തിരിപ്പ് ഉണ്ടായത് കാനഡയിലെ മെഡിക്കെയർ സംവിധാനത്തിന്റെ ഗുരുതരമായ വീഴ്ചയായാണ് വിലയിരുത്തപ്പെടുന്നത്.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

The incident of a Malayali man dying without receiving treatment in Edmonton; The crisis in the healthcare sector in Canada is being discussed