മെസ്സിക്ക് കോടികൾ, ഇന്ത്യൻ ഫുട്ബോളിന് ഒന്നുമില്ല; ഇൻസ്റ്റാഗ്രാം പോസ്റ്റിലൂടെ തുറന്നടിച്ച് സന്ദേഷ് ജിങ്കൻ

ന്യൂഡൽഹി: ഇന്ത്യൻ ഫുട്ബോൾ കടുത്ത പ്രതിസന്ധി നേരിടുമ്പോൾ വിദേശ താരങ്ങളുടെ പര്യടനത്തിനായി കോടികൾ ചെലവാക്കുന്നതിനെ വിമർശിച്ച് ദേശീയ ഫുട്ബോൾ ടീം ക്യാപ്റ്റൻ സന്ദേഷ് ജിങ്കൻ. ലയണൽ മെസ്സിയുടെ ‘ഗോട്ട്’ ഇന്ത്യൻ പര്യടനത്തിനായി വലിയ തുക ചെലവഴിക്കുന്ന സാഹചര്യത്തിലാണ്, രാജ്യത്തെ ആഭ്യന്തര ഫുട്ബോൾ സംവിധാനം തകർച്ചയുടെ വക്കിലാണെന്ന മുന്നറിയിപ്പുമായി ജിങ്കൻ രംഗത്തെത്തിയത്. ഇൻസ്റ്റാഗ്രാമിലൂടെയാണ് താരം തന്റെ ആശങ്കകൾ പങ്കുവെച്ചത്.

ലയണൽ മെസ്സിക്കൊപ്പം ലൂയിസ് സുവാരസ്, റോഡ്രിഗോ ഡി പോൾ എന്നിവർ പങ്കെടുത്ത കൊൽക്കത്ത, ഹൈദരാബാദ്, മുംബൈ, ഡൽഹി പര്യടനങ്ങൾ വലിയ ജനശ്രദ്ധ നേടിയിരുന്നു. ലക്ഷങ്ങൾ മുടക്കി മെസ്സിയെ കാണാൻ ആരാധകർ തയ്യാറാകുന്നത് സന്തോഷകരമാണെങ്കിലും, അത് ഇന്ത്യൻ ഫുട്ബോളിന് ഗുണകരമാകുന്നില്ലെന്ന് ജിങ്കൻ ചൂണ്ടിക്കാട്ടി. ഇന്ത്യക്കാർ ഫുട്ബോളിനെ സ്നേഹിക്കുന്നുണ്ടെങ്കിലും സ്വന്തം രാജ്യത്തെ താരങ്ങളെ പിന്തുണയ്ക്കാൻ താല്പര്യമില്ലാത്തത് ഖേദകരമാണെന്ന് അദ്ദേഹം വ്യക്തമാക്കി.

നിലവിൽ ഇന്ത്യൻ ഫുട്ബോൾ ചരിത്രത്തിലെ ഏറ്റവും പ്രയാസകരമായ ഘട്ടത്തിലൂടെയാണ് കടന്നുപോകുന്നത്. ഐഎസ്എൽ (ISL), ഐ-ലീഗ് മത്സരങ്ങൾ എന്ന് തുടങ്ങുമെന്ന് ഉറപ്പില്ലാത്ത അവസ്ഥയാണുള്ളത്. ഔദ്യോഗിക സംപ്രേക്ഷണ പങ്കാളികൾ പോലുമില്ലാത്ത അവസ്ഥയിൽ ആഭ്യന്തര ഫുട്ബോൾ നിശ്ചലാവസ്ഥയിലാണെന്ന് ജിങ്കൻ പറഞ്ഞു. നിക്ഷേപകർ ഇല്ലാത്തതിനാൽ എല്ലാം നിർത്തലാക്കേണ്ട സാഹചര്യമാണെന്നും അദ്ദേഹം ഇൻസ്റ്റാഗ്രാം പോസ്റ്റിൽ കുറിച്ചു.

ദേശീയ ടീമിന്റെ മോശം പ്രകടനത്തിൽ താരം ഖേദം പ്രകടിപ്പിച്ചു. ആരാധകരുടെ വിമർശനങ്ങൾ ഉൾക്കൊള്ളുന്നുവെന്നും ഉത്തരവാദിത്തം ഏറ്റെടുക്കുന്നുവെന്നും അദ്ദേഹം അറിയിച്ചു. എന്നാൽ കൃത്യമായ ഘടനയും സ്ഥിരതയും നിക്ഷേപവുമില്ലാതെ മികച്ച ഫലങ്ങൾ ഉണ്ടാകില്ലെന്ന് ജിങ്കൻ വിലയിരുത്തി. മെസ്സിയുടെ കൊൽക്കത്ത സന്ദർശനത്തിലുണ്ടായ സംഘാടന പിഴവുകളെയും താരം വിമർശിച്ചു.

ഇന്ത്യൻ ഫുട്ബോളിന്റെ നിലവിലെ സ്ഥിതിയിൽ താൻ നിരന്തരം ചോദ്യങ്ങൾ ചോദിച്ചുകൊണ്ടിരിക്കുകയാണെന്ന് ജിങ്കൻ പറഞ്ഞു. എങ്കിലും ശരിയായ നയങ്ങളും നിക്ഷേപവും ഉണ്ടായാൽ ഇന്ത്യൻ ഫുട്ബോളിന് പഴയ പ്രതാപത്തിലേക്ക് തിരിച്ചുപോകാൻ സാധിക്കുമെന്ന പ്രതീക്ഷയും അദ്ദേഹം പങ്കുവെച്ചു. ഈ സാഹചര്യത്തിൽ ഫുട്ബോൾ ആസ്വാദനത്തിനപ്പുറം കായിക മേഖലയുടെ സുസ്ഥിരമായ നിലനിലപ്പിനെക്കുറിച്ച് ചർച്ചകൾ ഉണ്ടാകണമെന്ന് അദ്ദേഹം അഭ്യർത്ഥിച്ചു.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

Messi has crores, Indian football has nothing; Sandesh Jhingan openly criticizes in Instagram post