ന്യൂഡൽഹി: അന്തരീക്ഷ മലിനീകരണം രൂക്ഷമായതിനെ തുടർന്ന് ഇന്ത്യയുടെ വടക്കൻ നഗരങ്ങളിലുള്ള തങ്ങളുടെ പൗരന്മാർക്ക് യുണൈറ്റഡ് കിംഗ്ഡം (യുകെ), കാനഡ, സിംഗപ്പൂർ എന്നീ രാജ്യങ്ങൾ യാത്രാ മുന്നറിയിപ്പുകൾ നൽകി. തലസ്ഥാനമായ ഡൽഹിയിൽ അന്തരീക്ഷ ഗുണനിലവാര സൂചിക (Air Quality Index – AQI) 500-നടുത്ത് എത്തി ‘അപകടകരമായ’ (Severe) വിഭാഗത്തിൽ തുടരുന്ന സാഹചര്യത്തിലാണ് വിദേശ രാജ്യങ്ങളുടെ ഈ സുപ്രധാന നീക്കം.
ഡൽഹിയിലെ ആനന്ദ് വിഹാർ (493), ജഹാംഗീർപുരി (498) ഉൾപ്പെടെയുള്ള സ്റ്റേഷനുകളിൽ എ.ക്യു.ഐ. 500-നോട് അടുത്ത് എത്തി. പൂജ്യം മുതൽ 50 വരെ ‘നല്ലത്’ ആയി കണക്കാക്കുമ്പോൾ, 401 മുതൽ 500 വരെയുള്ളത് ‘അപകടകരം’ എന്ന വിഭാഗത്തിലാണ് ഉൾപ്പെടുന്നത്. കനത്ത മൂടൽമഞ്ഞും പുകയും നഗരത്തെ മൂടിയതോടെ കാഴ്ചാപരിധി കുത്തനെ കുറഞ്ഞു. ഇത് ഇന്ദിരാഗാന്ധി അന്താരാഷ്ട്ര വിമാനത്താവളത്തിലെ (IGI) വിമാന സർവീസുകളെ സാരമായി ബാധിക്കുകയും നിരവധി വിമാനങ്ങൾ റദ്ദാക്കുകയോ വൈകിക്കുകയോ ചെയ്യേണ്ടി വരികയും ചെയ്തു.
ഇന്ത്യൻ സെൻട്രൽ പൊല്യൂഷൻ കൺട്രോൾ ബോർഡ് (CPCB) ഗ്രേഡഡ് റെസ്പോൺസ് ആക്ഷൻ പ്ലാനിൻ്റെ (GRAP) നാലാം ഘട്ടം നടപ്പാക്കിയ കാര്യം സിംഗപ്പൂർ ഹൈക്കമ്മീഷൻ തങ്ങളുടെ പൗരന്മാർക്ക് നൽകിയ മുന്നറിയിപ്പിൽ എടുത്തുപറഞ്ഞു. വിമാന സർവീസുകളിലെ തടസ്സങ്ങൾ കാരണം യാത്രികർ തങ്ങളുടെ ഫ്ലൈറ്റ് സ്റ്റാറ്റസ് നിരീക്ഷിക്കണമെന്നും അവർ നിർദ്ദേശിച്ചു.
ശ്വസന-ഹൃദയ സംബന്ധമായ അസുഖങ്ങളുള്ളവരും ഗർഭിണികളും ഇന്ത്യയിലേക്ക് യാത്ര പുറപ്പെടുന്നതിന് മുൻപ് ഡോക്ടറെ സമീപിക്കണമെന്ന് യുകെയും കാനഡയും സംയുക്തമായി ഉപദേശിച്ചു. പ്രത്യേകിച്ച് ഒക്ടോബർ മുതൽ ഫെബ്രുവരി വരെയുള്ള മാസങ്ങളിൽ അന്തരീക്ഷ മലിനീകരണം ഒരു വലിയ ആരോഗ്യപ്രശ്നമാണെന്ന് മുന്നറിയിപ്പിൽ പറയുന്നു. പൗരന്മാർ എയർ ക്വാളിറ്റി ലെവലുകൾ പതിവായി നിരീക്ഷിക്കണമെന്നും, ആവശ്യമാണെങ്കിൽ പുറത്തുള്ള പ്രവർത്തനങ്ങൾ കുറയ്ക്കണമെന്നും ഇരു രാജ്യങ്ങളും നിർദ്ദേശിച്ചു. ഗ്രാമപ്രദേശങ്ങളിലെ കൃഷി അവശിഷ്ടങ്ങൾ കത്തിക്കുന്നതും പൊടിക്കാറ്റുകളും വായുവിൻ്റെ ഗുണനിലവാരത്തെ മോശമായി ബാധിക്കുമെന്നും മുന്നറിയിപ്പിൽ പറയുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Severe air pollution in Delhi; Canada issues warning to citizens in North India
