ഒട്ടാവ: കനേഡിയൻ പൗരന്മാർ ചാരിറ്റി സംഭാവനകൾ നൽകുന്നതിൽ മുൻപത്തേക്കാൾ താല്പര്യക്കുറവ് കാണിക്കുന്നതായി പുതിയ പഠനം. കാനഡയിലെ പൊതു നയങ്ങളെക്കുറിച്ച് പഠനം നടത്തുന്ന തിങ്ക് ടാങ്കായ ഫ്രേസർ ഇൻസ്റ്റിറ്റ്യൂട്ട് പുറത്തിറക്കിയ റിപ്പോർട്ടിലാണ് ഈ കണ്ടെത്തൽ. റിപ്പോർട്ട് അനുസരിച്ച്, 2023-ൽ ചാരിറ്റിക്ക് സംഭാവന നൽകിയ കനേഡിയൻ പൗരന്മാരുടെ എണ്ണം കഴിഞ്ഞ രണ്ട് പതിറ്റാണ്ടിനിടയിലെ ഏറ്റവും താഴ്ന്ന നിലയിലാണെന്നാണ്. രാജ്യത്തെ ചാരിറ്റികൾക്ക് ആവശ്യമായ വിഭവങ്ങൾ കണ്ടെത്തുന്നതിന് ഇത് വെല്ലുവിളിയാകുന്നു എന്നും പഠനം ചൂണ്ടിക്കാണിക്കുന്നു.
ഈ പ്രവണത രാജ്യത്തെ ചാരിറ്റികൾക്ക് കടുത്ത വെല്ലുവിളിയാണ് ഉയർത്തുന്നതെന്ന് ഫ്രേസർ ഇൻസ്റ്റിറ്റ്യൂട്ടിലെ ഫിസ്കൽ സ്റ്റഡീസ് ഡയറക്ടറും പഠനത്തിന്റെ സഹ-രചയിതാവുമായ ജേക്ക് ഫസ് ചൂണ്ടിക്കാട്ടി. “ആവശ്യക്കാരെ സഹായിക്കാൻ ചാരിറ്റികളെ ആശ്രയിക്കുന്നവർക്ക് ഇത് ‘മോശം വാർത്തയാണ്,” എന്നും അദ്ദേഹം കൂട്ടിച്ചേർത്തു. നികുതി കഴിഞ്ഞുള്ള വരുമാനത്തിൽ വരുന്ന വർദ്ധനവ് സംഭാവനകളെ സ്വാധീനിക്കുന്ന ഒരു പ്രധാന ഘടകമാണെന്നും ഫസ് ചൂണ്ടിക്കാട്ടി അഭിപ്രായപ്പെട്ടു.
കൂടാതെ, സംഭാവന നൽകുന്നതിലെ കുറവ് രാജ്യത്തെ എല്ലാ പ്രവിശ്യകളിലും പ്രദേശങ്ങളിലും വ്യാപകമാണെന്നും റിപ്പോർട്ട് അടിവരയിടുന്നു. കൂടാതെ, ചാരിറ്റബിൾ സംഭാവനകളുടെ കാര്യത്തിൽ കാനഡയുടെ ‘ഔദാര്യത്തിൻ്റെ ആഴം’ (Depth of Generosity) കഴിഞ്ഞ ദശകങ്ങളായി അമേരിക്കയേക്കാൾ വളരെ കുറവാണ് എന്നും പഠനം കണ്ടെത്തുകയുണ്ടായി. 2022-ലെ നികുതി വർഷത്തെ കണക്കുകൾ പ്രകാരം, യുഎസിലെ 37 സംസ്ഥാനങ്ങൾ തങ്ങളുടെ ആകെ വരുമാനത്തിന്റെ, കനേഡിയൻ പ്രവിശ്യകളേക്കാൾ ഉയർന്ന ശതമാനം ചാരിറ്റിക്ക് സംഭാവനയായി നൽകി. കാനഡയിൽ സംഭാവന നൽകുന്നതിൽ ഉണ്ടായിട്ടുള്ള ഈ കുറവ്, രാജ്യത്തെ ചാരിറ്റികൾക്ക് സമൂഹത്തിൽ മെച്ചപ്പെട്ട സേവനങ്ങൾ എത്തിക്കാനുള്ള കഴിവിനെ പരിമിതപ്പെടുത്തുമെന്നും ഫ്രേസർ ഇൻസ്റ്റിറ്റ്യൂട്ട് റിപ്പോർട്ട് മുന്നറിയിപ്പ് നൽകുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Record drop in charitable giving in Canada: Fraser Institute study
