ടൊറന്റോ: ക്രിസ്മസിന് തൊട്ടുമുമ്പുള്ള ഡിസംബർ പകുതിയോടെ വടക്കുകിഴക്കൻ അമേരിക്കയിൽ കനത്ത തണുപ്പ് ഉണ്ടാകുമെന്ന് മസാചുസെറ്റ്സ് ഇൻസ്റ്റിറ്റ്യൂട്ട് ഓഫ് ടെക്നോളജിയിലെ (MIT) കാലാവസ്ഥാ വിദഗ്ധനായ ജൂദാ കോഹൻ പ്രവചിച്ചു.
ഇദ്ദേഹത്തിന്റെ വാക്കുകൾ പ്രകാരം, ‘ഭൂമിയിലെ ഏറ്റവും വലിയ ശീതക്കാറ്റ്’ കാനഡയിലും യുഎസിലും ആഞ്ഞുവീശാൻ സാധ്യതയുണ്ട്. ഈ പ്രവചനം ആളുകൾക്കിടയിൽ വലിയ ആകാംഷയുണ്ടാക്കിയിരിക്കുകയാണ്.
വിവിധ യൂണിവേഴ്സിറ്റികളിലെ ഗവേഷകർ ചേർന്നുണ്ടാക്കിയ ഒരു പ്രത്യേക എ.ഐ. (AI) കാലാവസ്ഥാ മോഡൽ ഉപയോഗിച്ചാണ് കോഹൻ ഈ പ്രവചനം നടത്തിയത്. ഈ മോഡൽ അനുസരിച്ച്, ഡിസംബർ മൂന്നാം വാരത്തിൽ, കാനഡയുടെ സമതലങ്ങൾ മുതൽ അമേരിക്കയുടെ കിഴക്കൻ തീരം വരെ ‘ഭൂമിയിലെ ഏറ്റവും വലിയ തണുപ്പ്’ അനുഭവപ്പെടാൻ സാധ്യതയുണ്ടെന്നാണ് അദ്ദേഹം സോഷ്യൽ മീഡിയയിൽ കുറിച്ചത്. ഈ ‘അതിശൈത്യം’ എന്ന പ്രയോഗമാണ് എല്ലാവരുടെയും ശ്രദ്ധ ആകർഷിച്ചിരിക്കുന്നത്.
ഒരു സ്ഥലത്ത് സാധാരണ അനുഭവപ്പെടുന്നതിനേക്കാൾ വളരെ കൂടുതലുള്ള തണുപ്പിനെ സൂചിപ്പിക്കാനാണ് കാലാവസ്ഥാ വിദഗ്ധർ ‘അതിശൈത്യം’ എന്ന വാക്ക് ഉപയോഗിക്കുന്നത്. “വരും ആഴ്ചകളിൽ കാനഡയിലോ യുഎസിലോ സൈബീരിയയിലെയോ അന്റാർട്ടിക്കയിലെയോ അത്രയും കഠിനമായ തണുപ്പ് ഉണ്ടാകുമെന്ന് താൻ പറയുന്നില്ല. പക്ഷെ, സാധാരണയുള്ളതിനേക്കാൾ ഏറ്റവും അധികം തണുപ്പായിരിക്കും ഈ സമയത്ത് അനുഭവപ്പെടുകയെന്ന് അദ്ദേഹം വ്യക്തമാക്കി.
സാധാരണയായി ധ്രുവങ്ങളിൽ കറങ്ങുന്ന ഈ തണുത്ത കാറ്റിന്റെ ചുഴിയുടെ വേഗം കുറയുമ്പോൾ, അതിലെ തണുത്ത കാറ്റ് താഴ്ന്ന പ്രദേശങ്ങളിലേക്ക് ഇറങ്ങി വരും. നിലവിൽ ധ്രുവച്ചുഴിക്ക് ഒരു റബ്ബർ ബാൻഡ് വലിച്ചു നീട്ടുന്നതുപോലെയുള്ള മാറ്റമാണ് സംഭവിക്കുന്നത്. ഇങ്ങനെ സംഭവിക്കുമ്പോൾ, ഒരു ഭാഗത്തെ തണുപ്പ് ഏഷ്യയിലേക്കും മറ്റേ ഭാഗത്തെ തണുപ്പ് വടക്കേ അമേരിക്കയിലേക്കും (കാനഡ വഴി യുഎസിലേക്കും) എത്തുന്നു. ശൈത്യകാലത്ത് ഉണ്ടാകുന്ന കടുത്ത തണുപ്പിന് പ്രധാന കാരണം ഈ ‘വലിച്ചുനീട്ടൽ’ സംഭവങ്ങളാണെന്നും, ഇത് കാനഡയിലും യുഎസിലും ശക്തമായി അനുഭവപ്പെടുമെന്നും കോഹൻ അഭിപ്രായപ്പെട്ടു.
സാധാരണയായി ജനുവരിയിലോ ഫെബ്രുവരിയിലോ കാനഡയിൽ കാണാറുള്ള കടുത്ത തണുപ്പ് ഇത്തവണ നേരത്തേ എത്തി എന്ന് എൻവയോൺമെന്റ് കാനഡയിലെ ഡേവ് ഫിലിപ്സ് പറഞ്ഞു. വളരെ കട്ടിയുള്ളതും സാന്ദ്രതയേറിയതുമായ ഈ തണുപ്പ്, വടക്ക് ഹഡ്സൺ ബേയുടെ മുകളിൽ തങ്ങിനിൽക്കുകയാണ്. അലാസ്കയിൽ നിന്നും യൂക്കോണിൽ നിന്നുമുള്ള കാറ്റാണ് ഇതിനെ ശക്തിപ്പെടുത്തുന്നത്. മഴയോ മഞ്ഞുവീഴ്ചയോ ഇല്ലാതെ കാനഡയിൽ തങ്ങിനിൽക്കുന്ന ഈ തണുപ്പ് ജനങ്ങളുടെ സാധാരണ ജീവിതത്തെ ബാധിക്കുന്നുണ്ട്. ഇത് വെറും രണ്ടോ മൂന്നോ ദിവസത്തേക്കുള്ള തണുപ്പല്ല, മറിച്ച് കുറച്ചുകാലം നീണ്ടുനിൽക്കുന്ന തണുപ്പായിരിക്കുമെന്നും ഫിലിപ്സ് അഭിപ്രായപ്പെട്ടു.
ഡിസംബറിലെ ബാക്കി ദിവസങ്ങളിൽ കാനഡയുടെ മിക്ക ഭാഗങ്ങളിലും സാധാരണയേക്കാൾ കൂടുതൽ തണുപ്പ് ഉണ്ടാകാൻ സാധ്യതയുണ്ട്. ജനുവരി, ഫെബ്രുവരി മാസങ്ങളിലും സമാനമായ തണുത്ത കാറ്റ് വീശിയേക്കാം. സാസ്കച്ചവാൻ, വിന്നിപെഗ്, ഒട്ടാവ, ക്യുബെക് സിറ്റി പോലുള്ള പ്രധാന നഗരങ്ങളിൽ വരുന്ന ആഴ്ചകളിൽ കടുപ്പമേറിയ തണുപ്പ് അനുഭവപ്പെടും. കൂടാതെ, രാജ്യത്തിന്റെ പലയിടങ്ങളിലും മഞ്ഞുവീഴ്ചയ്ക്കും, കാറ്റിനും, നിലവിൽ മുന്നറിയിപ്പുകൾ നൽകിയിട്ടുണ്ട്. അതിനാൽ, എല്ലാവരും ജാഗ്രത പാലിക്കണമെന്ന് എൻവയോൺമെന്റ് കാനഡ നിർദ്ദേശിച്ചു.
is-canada-set-to-feel-the-most-extreme-cold-on-earth/
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
