വിന്നിപെഗ്,: കുടുംബങ്ങളുടെയും തദ്ദേശീയ നേതാക്കളുടെയും വർഷങ്ങളായുള്ള ശക്തമായ ആവശ്യങ്ങൾക്കൊടുവിൽ, വിന്നിപെഗിനടുത്തുള്ള ബ്രാഡി ലാൻഡ്ഫില്ലിൽ (മാലിന്യ നിക്ഷേപ കേന്ദ്രം) കാണാതായ രണ്ട് തദ്ദേശീയ വനിതകളുടെ അവശിഷ്ടങ്ങൾക്കായുള്ള പുതിയ തിരച്ചിൽ ആരംഭിച്ചു. ഡിസംബർ ഒന്നിന് തുടങ്ങിയ ഈ തിരച്ചിൽ, ആശ്ലീ ഷിംഗൂസ്, ടാനിയ നെപിനാക്ക് എന്നീ സ്ത്രീകളെ സംബന്ധിച്ച എന്തെങ്കിലും തെളിവ് കണ്ടെത്താനായി മാലിന്യ നിക്ഷേപ കേന്ദ്രത്തിലെ പ്രത്യേക പ്രദേശങ്ങളെ ലക്ഷ്യമിട്ടാണ് നടക്കുന്നത്.
സെന്റ് തെരേസ പോയിന്റ് അനിഷിനെവ് നേഷൻ സ്വദേശിയായ ഷിംഗൂസിനെ 2022 മാർച്ചിലാണ് കാണാതായത്. വിന്നിപെഗ് മേഖലയിലെ തദ്ദേശീയ വനിതകളെ ലക്ഷ്യമിട്ട പരമ്പരക്കൊലയാളി ജെറമി സ്കിബിക്കിയുടെ ആദ്യ ഇര ഷിംഗൂസ് ആണെന്നാണ് കരുതുന്നത്. 2011-ൽ കാണാതായ പൈൻ ക്രീക്ക് ഫസ്റ്റ് നേഷൻ സ്വദേശിയായ നെപിനാക്കിന് മറ്റൊരു കൊലയാളി ഷോൺ ലാംബുമായി ബന്ധമുണ്ട്. ഇയാൾ മറ്റ് രണ്ട് തദ്ദേശീയ വനിതകളുടെ കൊലപാതകത്തിൽ കുറ്റസമ്മതം നടത്തിയ വ്യക്തിയാണ്.
പ്രിയപ്പെട്ടവരെ കണ്ടെത്തുന്നതിലെ സുപ്രധാനമായ അടുത്ത ഘട്ടത്തെ അടയാളപ്പെടുത്തിക്കൊണ്ട്, കുടുംബാംഗങ്ങളെ പങ്കെടുപ്പിച്ചുകൊണ്ട് ബ്രാഡി ലാൻഡ്ഫില്ലിൽ വെച്ച് ഒരു ‘പൈപ്പ് സെറിമണി’യോടെയാണ് (പാരമ്പര്യ ചടങ്ങ്) തിരച്ചിൽ ആരംഭിച്ചത്. ഈ തിരച്ചിലിനായി ശക്തമായി വാദിച്ചത് അസംബ്ലി ഓഫ് മാനിറ്റോബ ചീഫ്സ് (AMC) ആണ്. വളരെക്കാലമായി തങ്ങളുടെ സ്ത്രീകളെ തള്ളിക്കളയുകയും അവഗണിക്കുകയും അവരുടെ ജീവിതത്തിന് ഒരു വിലയുമില്ലാത്തതുപോലെ കണക്കാക്കുകയും ചെയ്തു. അതിന് ഇവിടെ അറുതിയാകുന്നുവെന്ന് AMC ഗ്രാൻഡ് ചീഫ് കൈറ വിൽസൺ പറഞ്ഞു.
സ്കിബിക്കി എന്ന പ്രതിയെ 2024-ൽ ഷിംഗൂസിന്റെയും 2022-ലെ വസന്തകാലത്ത് കാണാതായ മറ്റ് മൂന്ന് സ്ത്രീകളുടെയും കൊലപാതകത്തിൽ ഫസ്റ്റ്-ഡിഗ്രി കൊലപാതകത്തിൽ ശിക്ഷിക്കപ്പെട്ടിരുന്നു. മോർഗൻ ഹാരിസ്, മെഴ്സെഡസ് മൈറാൻ എന്നിവരുടെ (ഇരുവരും ലോംഗ് പ്ലെയിൻ ഫസ്റ്റ് നേഷൻ സ്വദേശികൾ) അവശിഷ്ടങ്ങൾ വിന്നിപെഗിനടുത്തുള്ള പ്രയറി ഗ്രീൻ ലാൻഡ്ഫില്ലിൽ നിന്നും കണ്ടെത്തിയിരുന്നു. റെബേക്ക കോൺടോയിസിന്റെ (ഓ-ചി ചക് കോ സിപി ഫസ്റ്റ് നേഷൻ) ഭാഗികമായ അവശിഷ്ടങ്ങൾ ബ്രാഡി ലാൻഡ്ഫില്ലിൽ നിന്ന് കണ്ടെത്തിയിരുന്നു.
കാണാതായവരെയും കൊലചെയ്യപ്പെട്ടവരെയും കുറിച്ചുള്ള ഈ വിഷയത്തിൽ, സ്കിബിക്കി നാല് സ്ത്രീകളെ കൊന്നതായി സമ്മതിച്ച ശേഷമാണ് ഷിംഗൂസിന് ‘ബഫല്ലോ വുമൺ’ എന്ന ഓണററി പേര് നൽകിയത്. ഷിംഗൂസിന്റെ അവശിഷ്ടങ്ങൾ ഇതുവരെ കണ്ടെത്തിയിട്ടില്ലെങ്കിലും, സ്കിബിക്കിയുമായി ബന്ധമുള്ള വസ്ത്രങ്ങളിൽ നിന്ന് ലഭിച്ച ഡിഎൻഎ വഴി അധികാരികൾക്ക് അവരെ തിരിച്ചറിയാൻ സാധിച്ചു. നെപിനാക്കിന്റെ കൊലപാതകത്തിൽ ലാംബിനെതിരെ കേസെടുത്തിരുന്നെങ്കിലും, തെളിവുകളുടെ അഭാവം മൂലം പിന്നീട് നടപടികൾ നിർത്തിവെച്ചു.
ലാംബ് പിന്നീട് കുറ്റസമ്മതത്തിലൂടെ സിൻക്ലെയറിന്റെയും ബ്ലാക്ക്സ്മിത്തിന്റെയും മരണത്തിൽ മനഃപൂർവമല്ലാത്ത നരഹത്യയ്ക്ക് (Manslaughter) കുറ്റസമ്മതം നടത്തുകയും 2013-ൽ 20 വർഷത്തെ തടവിന് ശിക്ഷിക്കപ്പെടുകയും ചെയ്തു. എന്നാൽ, കാനഡാ നിയമത്തിലെ ഒരു വ്യവസ്ഥ പ്രകാരം 13 വർഷം മാത്രം തടവനുഭവിച്ച ശേഷം നവംബർ 13-ന് അയാൾക്ക് ‘നിയമപരമായ മോചനം’ (Statutory Release) ലഭിച്ചത് പ്രതിഷേധങ്ങൾക്കിടയാക്കിയിരുന്നു.
സുരക്ഷാപരമായ അംഗീകാരങ്ങൾ, സുരക്ഷാ മാർഗ്ഗനിർദ്ദേശങ്ങൾ വികസിപ്പിക്കൽ, തിരച്ചിൽ സൗകര്യത്തിനായുള്ള കെട്ടിടം നിർമ്മിക്കൽ, ലക്ഷ്യമിട്ട പ്രദേശത്തിന് മുകളിലുള്ള വസ്തുക്കൾ നീക്കം ചെയ്യൽ എന്നിവ ഉൾപ്പെടെ മാസങ്ങൾ നീണ്ട മുന്നൊരുക്കങ്ങൾക്ക് ശേഷമാണ് ബ്രാഡി ലാൻഡ്ഫില്ലിലെ ഒരു പ്രത്യേക മേഖലയിൽ (Targeted Zone) ഉത്ഖനനം നടത്തി തിരച്ചിൽ നടത്തുന്നത്. ഈ പ്രവർത്തനങ്ങൾ സാധ്യമാക്കാൻ പ്രവർത്തിച്ച മാനിറ്റോബ പ്രവിശ്യയ്ക്കും തിരച്ചിൽ ടീമുകൾക്കും സാങ്കേതിക വിദഗ്ധർക്കും കമ്മ്യൂണിറ്റി അംഗങ്ങൾക്കും AMC നന്ദി അറിയിച്ചു.
manitoba-begins-new-landfill-search-for-missing-indigenous-women
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
