ബ്രേക്ക് ഇല്ലാതെ കാപ്പി വില: ദീർഘകാലത്തേക്ക് മാറ്റമില്ലാതെ വിപണി; ആശങ്കയിൽ ഉപഭോക്താക്കൾ

ഒട്ടാവ: കാനഡയിൽ കാപ്പി വില 2020 മുതൽ ഇരട്ടിയിലധികം വർധിച്ചതായി റിപ്പോർട്ട്. ഈ വില വർദ്ധനവ് അടുത്തൊന്നും താഴോട്ട് വരാൻ സാധ്യതയില്ലെന്നാണ് അക്കാദമിക് വിദഗ്ധർ അഭിപ്രായപ്പെടുന്നത്. സ്റ്റാറ്റിസ്റ്റിക്‌സ് കാനഡയുടെ കണക്കുകൾ പ്രകാരം, 340 ഗ്രാം കോഫിയുടെ ശരാശരി പ്രതിമാസ റീട്ടെയിൽ വില 2020-ൽ $5.36 ആയിരുന്നത് 2025-ൽ $9.30 ആയി ഉയർന്നു എന്നാണ്. ഇത് വെറും അഞ്ച് വർഷത്തിനുള്ളിൽ 73.5 ശതമാനത്തിന്റെ വർദ്ധനവാണ് സൂചിപ്പിക്കുന്നത്. കഴിഞ്ഞ വർഷത്തെ അപേക്ഷിച്ച് ഓഗസ്റ്റ് മാസത്തിൽ മാത്രം കടകളിൽ നിന്ന് വാങ്ങുന്ന കാപ്പിക്ക് കനേഡിയൻ ഉപഭോക്താക്കൾ 28 ശതമാനം അധികമാണ് നൽകിയത്. 1979 മുതൽ 2024 വരെയുള്ള കണക്കുകൾ പരിശോധിക്കുമ്പോൾ കാപ്പി വിലയുടെ വാർഷിക ശരാശരി വർധന 81.3 ശതമാനമാണ്.

കോഫിക്ക് ഉപഭോക്താക്കൾക്കിടയിലുള്ള ശക്തമായ ഡിമാൻഡ് കാരണം വിൽപ്പനക്കാർ വില കുറയ്ക്കാൻ സാധ്യതയില്ലെന്ന് ടൊറന്റോ മെട്രോപൊളിറ്റൻ യൂണിവേഴ്‌സിറ്റിയിലെ ഗ്ലോബൽ മാനേജ്‌മെന്റ് സ്റ്റഡീസ് അസോസിയേറ്റ് പ്രൊഫസർ വിക് സിംഗ് പറയുന്നു. “ഇതിൽ നിന്ന് ഒരു മാറ്റം ഞാൻ കാണുന്നില്ല. ഇപ്പോഴത്തെ പോലെ വില ഉയർന്നുപോകാതിരിക്കാൻ സാധ്യതയുണ്ടെന്നേ പറയാൻ സാധിക്കൂ,” അദ്ദേഹം കൂട്ടിച്ചേർത്തു. സ്റ്റാർബക്‌സ് പോലുള്ള ഏതാനും ചില റീട്ടെയിലർമാർ വിപണിയെ നിയന്ത്രിക്കുന്ന സാഹചര്യത്തിൽ അവർക്ക് വില കുറയ്‌ക്കേണ്ട ആവശ്യം വരുന്നില്ലെന്നും സിംഗ് ചൂണ്ടിക്കാട്ടുന്നു.കാലാവസ്ഥാ മാറ്റങ്ങൾ കാരണം പ്രധാന കാപ്പി ഉൽപാദക രാജ്യങ്ങളായ ബ്രസീലിലും വിയറ്റ്നാമിലും കഴിഞ്ഞ വർഷങ്ങളിൽ വിളവെടുപ്പ് കുറഞ്ഞു. ഇത് കാപ്പിയുടെ വിതരണത്തിൽ വലിയ കുറവുണ്ടാക്കിയതായി ടൊറന്റോ യൂണിവേഴ്സിറ്റി മാർക്കറ്റിംഗ് പ്രൊഫസർ ഡേവിഡ് സോബർമാൻ പറയുന്നു.

കോഫി ഷോപ്പുകൾ അവരുടെ പ്രത്യേക രുചിക്ക് അനുസരിച്ചുള്ള കാപ്പിപ്പരിപ്പുകളാണ് ഉപയോഗിക്കുന്നത്. അതുകൊണ്ട്, വിതരണക്കാരെ പെട്ടെന്ന് മാറ്റാൻ അവർക്ക് കഴിയില്ല. എന്നാൽ, നിലവിലെ കാലാവസ്ഥാ മാറ്റങ്ങൾ കാരണം ഉൽപാദകർക്ക് പുതിയ കൃഷി രീതികൾ സ്വീകരിക്കേണ്ടി വരും. ഇത് ഉൽപാദനത്തിൽ കൂടുതൽ കാര്യക്ഷമത കൊണ്ടുവരാൻ സഹായിച്ചേക്കാം എന്ന് സോബർമാൻ കരുതുന്നു.

ഈ വിലവർദ്ധനവിന്റെ സമയത്ത്, കാപ്പി ഷോപ്പുകളിൽ നിന്ന് വാങ്ങുന്നതിന് പകരം വീട്ടിൽ കാപ്പി ഉണ്ടാക്കി പണം ലാഭിക്കാൻ കനേഡിയൻ ഉപഭോക്താക്കളോട് അദ്ദേഹം ഉപദേശിക്കുന്നു. കാപ്പിയെ ഒരു അവശ്യവസ്തുവായി കാണുന്നതിനാൽ, വില കൂടിയാലും ആളുകൾ അത് വാങ്ങുന്നത് നിർത്താൻ സാധ്യതയില്ല. “ദീർഘകാലം നോക്കിയാൽ, കാപ്പി വില എപ്പോഴും കൂടിക്കൊണ്ടേയിരിക്കും,” വിക് സിംഗ് കൂട്ടിച്ചേർത്തു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Coffee prices without a break: Market unchanged for a long time; Consumers concerned