തിയറ്ററുകളിലെ സ്വകാര്യ നിമിഷങ്ങൾ സൈബർ പോൺ ചന്തയിൽ! ഞെട്ടിച്ച് അന്വേഷണം; കേരളത്തിലെ തിയറ്ററുകളിൽ നിന്നും ദൃശ്യങ്ങൾ ചോർന്നു?

തിരുവനന്തപുരം: സുരക്ഷയ്ക്കായി സ്ഥാപിച്ചിട്ടുള്ള സിസിടിവി ക്യാമറകൾ ഉപയോഗിച്ച് സിനിമ തിയറ്ററുകൾക്കുള്ളിലെ സ്വകാര്യ ദൃശ്യങ്ങൾ ചോർത്തി സൈബർ പോൺ മാർക്കറ്റിൽ വിൽക്കുന്നുവെന്ന ഞെട്ടിക്കുന്ന വിവരങ്ങൾ പുറത്ത്. ഒരു മാധ്യമം നടത്തിയ അന്വേഷണത്തിലാണ് ഞെട്ടിക്കുന്ന വിവരങ്ങൾ പുറത്തുവന്നത്. തിയറ്ററുകൾ, വീടുകൾ, ഹോസ്റ്റലുകൾ, ആശുപത്രികൾ എന്നിവിടങ്ങളിൽ നിന്നുള്ള ദൃശ്യങ്ങൾ വരെ ഈ രഹസ്യ വിപണിയിൽ വിൽക്കപ്പെടുന്നുണ്ട്.

ദൃശ്യങ്ങൾ ചോർന്നത് കേരളത്തിലെ സർക്കാർ തിയറ്ററുകളിൽ നിന്ന്

ഈ നിയമവിരുദ്ധ വ്യാപാരത്തിനായി ഉപയോഗിച്ച നൂറുകണക്കിന് സിസിടിവി ദൃശ്യങ്ങളിൽ ചിലത് കേരളത്തിലെ സർക്കാർ ഉടമസ്ഥതയിലുള്ള തിയറ്ററുകളിൽ നിന്നുള്ളതാണെന്ന് മാധ്യമം നടത്തിയ അന്വേഷണത്തിൽ കണ്ടെത്തി. തിരുവനന്തപുരം നഗരത്തിലെ കേരള സംസ്ഥാന ചലച്ചിത്ര വികസന കോർപ്പറേഷന് (KSFDC) കീഴിലുള്ള ശ്രീ (Sree), കൈരളി (Kairali), നീല (Nila) എന്നീ തിയറ്റർ കോംപ്ലക്സുകളിൽ നിന്നുള്ള ദൃശ്യങ്ങളാണ് ചോർന്നവയിൽ ചിലത്. തിയറ്റർ സീറ്റുകളിലെ ചിഹ്നങ്ങളും ഹാളിൻ്റെ ലേഔട്ടും തിരിച്ചറിയാനുള്ള മറ്റ് സൂചനകളും ഉപയോഗിച്ചാണ് ദൃശ്യങ്ങൾ കേരളത്തിലെ തിയറ്ററുകളിൽ നിന്നുള്ളതാണെന്ന് സ്ഥിരീകരിച്ചത്. സംഭവം സംബന്ധിച്ച് തിയറ്റർ അധികൃതർക്ക് പരാതികളൊന്നും ലഭിച്ചിട്ടില്ലെന്നും ദൃശ്യങ്ങൾ ചോർന്നതിനെക്കുറിച്ച് അറിവില്ലെന്നുമാണ് അധികൃതർ പ്രതികരിച്ചത്.

രഹസ്യ ദൃശ്യവ്യാപാരം നടക്കുന്നത് ഇങ്ങനെ

സുരക്ഷക്കായി സ്ഥാപിച്ച സിസിടിവി ക്യാമറകൾ സൂം ചെയ്താണ് ദമ്പതികളുടെ സ്വകാര്യ നിമിഷങ്ങൾ പകർത്തുന്നത്. ദൃശ്യങ്ങൾ ഒരു ‘ഡാർക്ക് ഇൻഡസ്ട്രി’യുടെ ഭാഗമായി വലിയൊരു ഓൺലൈൻ വിപണിയിൽ വിൽപ്പനയ്ക്ക് വെച്ചിരിക്കുകയാണ്. ദൃശ്യങ്ങളുടെ ഏതാനും സെക്കൻഡ് മാത്രം ദൈർഘ്യമുള്ള ക്ലിപ്പുകൾ എക്സ് (X / Twitter) പോലുള്ള സോഷ്യൽ മീഡിയ പ്ലാറ്റ്‌ഫോമുകളിൽ പ്രചരിപ്പിച്ച്, ആളുകളെ ടെലിഗ്രാം ചാനലുകളിലേക്ക് ആകർഷിക്കുകയാണ് തന്ത്രം. ടെലിഗ്രാം ചാനലുകൾ വഴി പണം ഈടാക്കിയാണ് ദൃശ്യങ്ങളുടെ മുഴുവൻ പതിപ്പുകളും വിൽക്കുന്നത്. ഒറ്റ ചാനലിൽ മാത്രം 20,000-ത്തിലധികം വീഡിയോകൾ വിൽപ്പനയ്ക്ക് വെച്ചതായി അന്വേഷണത്തിൽ കണ്ടെത്തി.

ദൃശ്യങ്ങൾ ചോരുന്നത് രണ്ട് വഴിക്ക്

ഇൻസൈഡർ ലീക്ക്: തിയറ്ററുകളിലെ പി.വി.ആർ. (PVR) പോലുള്ള ദൃശ്യങ്ങൾ കൈകാര്യം ചെയ്യുന്ന ജീവനക്കാർ, അല്ലെങ്കിൽ മാനേജർമാർ പണത്തിനുവേണ്ടി ദൃശ്യങ്ങൾ ചോർത്തി നൽകുന്നുണ്ട്.

ഹാക്കിംഗ്: ഇന്റർനെറ്റുമായി ബന്ധിപ്പിച്ച സിസിടിവി ക്യാമറകളുടെ ഡിഫോൾട്ട് പാസ്‌വേഡുകൾ (ഉദാഹരണത്തിന്: admin12345 അല്ലെങ്കിൽ password12345) മാറ്റാത്തതാണ് ഹാക്കർമാർക്ക് നുഴഞ്ഞുകയറാൻ അവസരം നൽകുന്നത്. ‘ഷോഡൻ’ (Shodan) പോലുള്ള ടൂളുകൾ ഉപയോഗിച്ച് ഇന്റർനെറ്റിൽ ഓപ്പൺ ആയി കിടക്കുന്ന ഐ.പി. ക്യാമറകൾ കണ്ടെത്തുന്നത് ഹാക്കർമാർക്ക് എളുപ്പമാണ്.

സ്വയം എങ്ങനെ സുരക്ഷിതരാകാം?

നിങ്ങളുടെ സ്വകാര്യത സംരക്ഷിക്കാൻ സിസിടിവി ഉപയോഗിക്കുന്നവർ ശ്രദ്ധിക്കേണ്ട കാര്യങ്ങൾ:

പാസ്‌വേർഡ് മാറ്റുക: സിസിടിവി സ്ഥാപിച്ച ഉടൻ തന്നെ കമ്പനി നൽകുന്ന ഡിഫോൾട്ട് പാസ്‌വേഡുകൾ മാറ്റി, ശക്തമായ ആൽഫാന്യൂമെറിക് പാസ്‌വേർഡുകൾ ഉപയോഗിക്കുക.

ശക്തമായ Wi-Fi: നിങ്ങളുടെ Wi-Fi പാസ്‌വേർഡും റൗട്ടർ പാസ്‌വേർഡും ദുർബലമല്ലെന്ന് ഉറപ്പാക്കുക.

പ്രത്യേക നെറ്റ്വർക്ക്: സിസിടിവി പോലുള്ള ഡിജിറ്റൽ ഉപകരണങ്ങൾക്കായി നിങ്ങളുടെ പ്രധാന ഉപകരണങ്ങളിൽ നിന്ന് വ്യത്യസ്തമായ ഒരു നെറ്റ്വർക്ക് സജ്ജീകരിക്കുക.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Movie theatre CCTV clips are being sold as soft porn