ടോക്കിയോ: ജപ്പാനിൽ സ്വന്തമായി ഖബർസ്ഥാനം (സെമിത്തേരി) സ്ഥാപിക്കാനുള്ള മുസ്ലിം സമുദായത്തിന്റെ ദീർഘകാലമായുള്ള ആവശ്യം ജനപ്രതിനിധി സഭ തള്ളിക്കളഞ്ഞത് രാജ്യത്തെ മുസ്ലിംകൾക്കിടയിൽ കടുത്ത ആശങ്ക സൃഷ്ടിച്ചിരിക്കുകയാണ്. ഇനി രാജ്യത്ത് പുതിയ സെമിത്തേരികൾ അനുവദിക്കില്ലെന്നുമുള്ള ജപ്പാൻ സർക്കാരിന്റെ കർശനമായ നിലപാടാണ് ഈ വിഷയത്തിൽ മുസ്ലിം സംഘടനകൾക്ക് തിരിച്ചടിയായത്. ജപ്പാനിലെ തദ്ദേശീയ സംസ്കാരത്തിന് അനുസരിച്ചുള്ള ശവസംസ്കാര രീതിയാണ് രാജ്യത്തെ എല്ലാവരും പാലിക്കേണ്ടതെന്ന നിലപാടാണ് എല്ലാ രാഷ്ട്രീയ നേതാക്കളും ഏകകണ്ഠമായി സ്വീകരിച്ചത്.
ജപ്പാനിൽ പരമ്പരാഗതമായുള്ളതും നിലവിലുള്ളതുമായ ശവസംസ്കാര രീതി മൃതദേഹം ദഹിപ്പിക്കുക (ക്രിമേഷൻ) എന്നതാണ്. മരിച്ചവരിൽ ഏകദേശം 99 ശതമാനത്തോളം പേരെയും ദഹിപ്പിക്കുകയാണ് ഇവിടെ പതിവ്. ഈ രീതി പ്രകൃതിക്ക് സൗഹൃദപരവും വൃത്തിയുള്ളതുമാണ് എന്ന നിലപാടാണ് രാഷ്ട്രീയ നേതൃത്വം ഉയർത്തിപ്പിടിക്കുന്നത്. ജപ്പാനിലെ ശുചിത്വത്തെയും പരിസ്ഥിതിയെയും കുറിച്ചുള്ള അവരുടെ കാഴ്ചപ്പാടിൽ ക്രിമേഷൻ രീതിയാണ് ഏറ്റവും അനുയോജ്യമെന്നും, ഈ രീതിയിൽ മാറ്റം വരുത്താൻ സാധിക്കുകയില്ലെന്നുമാണ് അധികൃതർ വ്യക്തമാക്കുന്നത്.
രാജ്യത്തെ നിലവിലെ നയങ്ങൾ തദ്ദേശീയ സംസ്കാരവുമായി ബന്ധപ്പെട്ടതാണെന്നും, അതിൽ വിട്ടുവീഴ്ച സാധ്യമല്ലെന്നും ഭരണകൂടം നിലപാടെടുത്തതോടെയാണ് മുസ്ലിം സംഘടനയുടെ ആവശ്യം തള്ളപ്പെട്ടത്. ഏകദേശം 2,30,000-ത്തോളം മുസ്ലിങ്ങളാണ് നിലവിൽ ജപ്പാനിൽ താമസിക്കുന്നത്. ഇവരെ സംബന്ധിച്ചിടത്തോളം സ്വന്തം മതപരമായ ആചാരപ്രകാരം മൃതദേഹങ്ങൾ മറവുചെയ്യാൻ സാധിക്കാത്തത് അതീവ സങ്കടകരമായ അവസ്ഥയാണ്.
ഇസ്ലാമിക നിയമപ്രകാരം മൃതദേഹം ദഹിപ്പിക്കുന്നത് അനുവദനീയമല്ല. അതിനാൽ, ജപ്പാനിൽ മരണമടയുന്ന മുസ്ലിംകളുടെ മൃതദേഹങ്ങൾ ഇസ്ലാമിക രീതിയിൽ സംസ്കരിക്കുന്നതിനായി അവരുടെ ജന്മനാടുകളിലേക്ക് അയക്കേണ്ട ദുരിതകരമായ അവസ്ഥയാണ് ഇപ്പോഴുള്ളത്. ഇത് വലിയ സാമ്പത്തിക ബാധ്യതയ്ക്കും വൈകാരിക പ്രയാസങ്ങൾക്കും കാരണമാകുന്നുണ്ട്.
അതേസമയം, തൊഴിൽ ആവശ്യങ്ങൾക്കായി അടുത്ത അഞ്ച് വർഷത്തിനുള്ളിൽ 8,20,000 വിദേശ പൗരന്മാരെ രാജ്യത്തേക്ക് ആകർഷിക്കാൻ ജപ്പാൻ പദ്ധതിയിടുന്നുണ്ട്. രാജ്യത്തെ തൊഴിൽ ശക്തി വർദ്ധിപ്പിക്കാനുള്ള ഈ നീക്കം പ്രഖ്യാപിക്കുമ്പോഴും, മുസ്ലിം സമുദായത്തിന് മതപരമായ രീതിയിൽ അന്ത്യകർമ്മങ്ങൾ ചെയ്യാൻ സൗകര്യമില്ലാത്തത് കുടിയേറ്റ വിഷയത്തിൽ വലിയ ആശങ്കയുണ്ടാക്കുന്നു. തങ്ങൾക്ക് സ്വന്തം മതവിശ്വാസമനുസരിച്ച് മരണാനന്തര കർമ്മങ്ങൾ ചെയ്യാൻ സാധിക്കാത്ത ഒരിടത്തേക്ക് കുടിയേറുന്നതിനെക്കുറിച്ച് മുസ്ലിം സമൂഹം കൂടുതൽ ആലോചിക്കുകയും നിയന്ത്രണം വെക്കുകയും ചെയ്യാനാണ് സാധ്യത.
ഒരു വികസിത രാജ്യമായിരിക്കെ, മനുഷ്യന്റെ അടിസ്ഥാനപരമായ ഒരു മതാവശ്യം നിഷേധിക്കപ്പെടുന്നത് രാജ്യത്തിന്റെ ബഹുസ്വരതയെയും അന്താരാഷ്ട്ര പ്രതിച്ഛായയെയും എങ്ങനെ ബാധിക്കുമെന്ന ചോദ്യം പ്രസക്തമാവുകയാണ്. വിദേശികളെ ആകർഷിക്കാൻ ശ്രമിക്കുമ്പോൾ തന്നെ, അവരുടെ സാംസ്കാരികവും മതപരവുമായ ആവശ്യങ്ങളെ പരിഗണിക്കാതെ മുന്നോട്ട് പോകുന്ന ഈ നിലപാട്, തൊഴിലാളികളുടെ കുടിയേറ്റത്തിന് വലിയ തടസ്സമുണ്ടാക്കിയേക്കും. ഈ വിഷയത്തിൽ രാഷ്ട്രീയപരമായ ഇടപെടലുണ്ടാകുമോ എന്ന ആകാംഷയിലാണ് ജപ്പാനിലെ മുസ്ലിം സമൂഹം.
There is no ‘final resting place’ for Muslims in Japan: Government rejects demand for burial site; stance draws world attention
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
