സെന്റ് ജോൺസ്: ന്യൂഫൗണ്ട്ലാൻഡ് ആൻഡ് ലാബ്രഡോർ പ്രവിശ്യയിൽ കൺസൾട്ടിങ് സ്ഥാപനം തയ്യാറാക്കിയ റിപ്പോർട്ടിൽ വീണ്ടും വ്യാജ സ്രോതസ്സുകൾ കണ്ടെത്തിയതിനെ തുടർന്ന്, പൊതുസേവനങ്ങളിൽ ആർട്ടിഫിഷ്യൽ ഇന്റലിജൻസ് (AI) ഉപയോഗിക്കുന്നതിന് കർശനമായ മാനദണ്ഡങ്ങൾ ഏർപ്പെടുത്തുമെന്ന് പുതിയ പ്രീമിയർ ടോണി വേക്ക്ഹാം ഉറപ്പുനൽകി. മുൻ ഭരണകൂടം ചുമതലപ്പെടുത്തിയ രണ്ടാമത്തെ റിപ്പോർട്ടിലാണ് വ്യാജമായ സ്രോതസ്സുകൾ കണ്ടെത്തിയത്.
കൺസൾട്ടിങ് സ്ഥാപനമായ ഡെലോയിറ്റിൻ്റെ കനേഡിയൻ വിഭാഗം തങ്ങളുടെ അന്തിമ ശുപാർശകളിൽ ഉറച്ചുനിൽക്കുമ്പോഴും, ആരോഗ്യമേഖലയിലെ ജീവനക്കാരുടെ എണ്ണത്തെക്കുറിച്ച് മെയ് മാസത്തിൽ പ്രവിശ്യാ സർക്കാരിന് സമർപ്പിച്ച 523 പേജുള്ള റിപ്പോർട്ടിൽ പിഴവുകൾ സംഭവിച്ചതായി സമ്മതിച്ചു. “റിപ്പോർട്ട് എഴുതാൻ എ.ഐ. ഉപയോഗിച്ചിട്ടില്ല; വളരെ കുറഞ്ഞ ചില ഗവേഷണ ഉദ്ധരണികളെ പിന്തുണയ്ക്കുന്നതിന് മാത്രമാണ് എ.ഐ. തിരഞ്ഞെടുത്ത രീതിയിൽ ഉപയോഗിച്ചത്,” ഡെലോയിറ്റ് വക്താവ് പ്രസ്താവനയിൽ പറഞ്ഞു. റിപ്പോർട്ടിലെ കണ്ടെത്തലുകളെ ബാധിക്കാത്ത, ചെറിയ തിരുത്തലുകൾ വരുത്തി റിപ്പോർട്ട് പരിഷ്കരിക്കുകയാണെന്നും അവർ കൂട്ടിച്ചേർത്തു.
ഈ വ്യാജ സ്രോതസ്സുകൾ ആദ്യമായി റിപ്പോർട്ട് ചെയ്തത് ന്യൂഫൗണ്ട്ലാൻഡ് ആൻഡ് ലാബ്രഡോറിനെക്കുറിച്ചുള്ള ഓൺലൈൻ വാർത്താ പ്രസിദ്ധീകരണമായ ‘ദി ഇൻഡിപെൻഡന്റ്’ ആണ്. നിലവിലില്ലാത്ത ജേണൽ പേപ്പറുകളുടെ മൂന്ന് ഉദാഹരണങ്ങളാണ് പ്രസിദ്ധീകരണം റിപ്പോർട്ട് ചെയ്തത്. “റിപ്പോർട്ടുകൾ തയ്യാറാക്കാൻ പ്രൊഫഷണൽ സ്ഥാപനങ്ങളെ ഏൽപ്പിക്കുമ്പോൾ ഇത്തരത്തിലുള്ള കാര്യങ്ങൾ ഉണ്ടാകുമെന്ന് പ്രതീക്ഷിക്കുന്നില്ലെന്ന് പ്രീമിയർ ടോണി വേക്ക്ഹാം പ്രതികരിച്ചു.
പൊതുസേവനങ്ങളിൽ എ.ഐ. ടൂളുകൾ ഉപയോഗിക്കുന്നതിന് മാർഗ്ഗനിർദ്ദേശങ്ങൾ രൂപീകരിക്കാൻ സർക്കാർ ശ്രമിക്കുമെന്ന് പ്രീമിയേഴ്സ് ഓഫീസ് അറിയിച്ചു. “എ.ഐ.യുടെ സാധ്യതയുള്ള നേട്ടങ്ങളും യഥാർത്ഥ അപകടസാധ്യതകളും ഞങ്ങളുടെ സർക്കാർ തിരിച്ചറിയുന്നു. മുന്നോട്ട് പോകുമ്പോൾ, സർക്കാരിനുള്ളിൽ എ.ഐ.യുടെ ഏതൊരു ഉപയോഗവും കർശനമായ പരിശോധന, മനുഷ്യന്റെ സ്ഥിരീകരണം, സുതാര്യമായ ഗുണനിലവാര നിയന്ത്രണങ്ങൾ എന്നിവയ്ക്ക് വിധേയമായിരിക്കുമെന്ന് തങ്ങൾ ഉറപ്പാക്കും,” പ്രീമിയേഴ്സ് ഓഫീസ് ഇമെയിലിൽ വ്യക്തമാക്കി.
1.6 ദശലക്ഷം ഡോളർ (ഏകദേശം 13.3 കോടി ഇന്ത്യൻ രൂപ) ചെലവഴിച്ചാണ് ഡെലോയിറ്റ് ഈ റിപ്പോർട്ട് തയ്യാറാക്കിയത്. ഈ പണം ഒരു വർഷത്തേക്ക് 14 മുഴുവൻ സമയ നഴ്സിങ് തസ്തികകളെ പിന്തുണയ്ക്കാൻ ഉപയോഗിക്കാമായിരുന്നു എന്ന് രജിസ്റ്റേർഡ് നഴ്സസ് യൂണിയൻ മേധാവി Yvette Coffey ചൂണ്ടിക്കാട്ടി. “ഞങ്ങളുടെ ആരോഗ്യ സംരക്ഷണ ജീവനക്കാരെക്കുറിച്ചുള്ള തീരുമാനങ്ങളെ നയിക്കാൻ ഉപയോഗിക്കുന്ന വിവരങ്ങൾ കൃത്യവും പൂർണ്ണവും യോഗ്യതയുള്ള ആളുകൾ വിലയിരുത്തിയതുമാണെന്ന് തങ്ങൾക്ക് ഉറപ്പിക്കേണ്ടതുണ്ടെന്ന് അവർ പ്രസ്താവനയിൽ പറഞ്ഞു.
ഡെലോയിറ്റ് തയ്യാറാക്കിയ ഹെൽത്ത് ഹ്യൂമൻ റിസോഴ്സസ് പ്ലാൻ അടുത്ത 10 വർഷത്തേക്കുള്ള നിയമന തീരുമാനങ്ങൾക്ക് മാർഗ്ഗനിർദ്ദേശം നൽകാൻ ലക്ഷ്യമിട്ടുള്ളതാണ്. പ്രവിശ്യയ്ക്ക് പുറത്തുനിന്നുള്ള റിക്രൂട്ട്മെൻ്റിന് പകരം പ്രവിശ്യയ്ക്കുള്ളിൽ നിന്നുള്ള ആരോഗ്യ പ്രവർത്തകരെ റിക്രൂട്ട് ചെയ്യുന്നതിൻ്റെ ചെലവും പ്രയോജനങ്ങളും പരിശോധിക്കുന്ന ഒരു ജേണൽ ലേഖനമായിരുന്നു വ്യാജമായി നൽകിയ റിപ്പോർട്ടുകളിൽ ഒന്ന്. “കാനഡയിലെ ആരോഗ്യ പ്രവർത്തകർക്കുള്ള പ്രാദേശിക റിക്രൂട്ട്മെൻ്റ്, നിലനിർത്തൽ തന്ത്രങ്ങളുടെ ചെലവ്-ഫലപ്രാപ്തി” (The cost-effectiveness of local recruitment and retention strategies for health workers in Canada) എന്ന് പേരുള്ള ഈ സ്രോതസ്സ് ഒരിക്കലും പ്രസിദ്ധീകരിച്ചിട്ടില്ല.
പ്രവിശ്യയിലെ ഒരു പ്രധാന സർക്കാർ റിപ്പോർട്ടിൽ വ്യാജ സ്രോതസ്സുകൾ കണ്ടെത്തുന്നത് ഇത് രണ്ടാം തവണയാണ്. സെപ്തംബറിൽ, എഡ്യൂക്കേഷൻ അക്കോർഡ് എൻഎൽ (Education Accord NL) ൻ്റെ അന്തിമ റിപ്പോർട്ടിൽ നിലവിലില്ലാത്ത സ്രോതസ്സുകളിൽ നിന്നുള്ള 15-ലധികം ഉദ്ധരണികൾ ഉണ്ടായിരുന്നുവെന്ന് റേഡിയോ-കാനഡ റിപ്പോർട്ട് ചെയ്തിരുന്നു.
Fake information given in government reports; AI use will now be evaluated by humans
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
