ആൽബർട്ട: ഗ്രേറ്റർ ടൊറന്റോ ഏരിയയിൽ വർധിച്ചുവരുന്ന ജീവിതച്ചെലവുകളും താങ്ങാനാവുന്ന ഭവനങ്ങൾ ഇല്ലാത്തതും കാരണം കുടുംബങ്ങൾ കൂട്ടത്തോടെ പ്രദേശം വിടുന്നതായി റിപ്പോർട്ട്. കഴിഞ്ഞ വർഷം 35,000-ത്തിലധികം കുടുംബങ്ങളാണ് ജി.ടി.എ. വിട്ട് കാനഡയിലെ മറ്റ് ഭാഗങ്ങളിലേക്ക് മാറിയത്. ഇതിൽ പ്രവിശ്യക്ക് പുറത്ത് ഏറ്റവും കൂടുതൽ പേർ ലക്ഷ്യമിട്ടത് ആൽബെർട്ടയെയാണ്. “ഒരു ഹാംസ്റ്റർ വീലിൽ കുടുങ്ങിയത് പോലെ”യാണ് ജി.ടി.എയിലെ ജീവിതം എന്ന് മനസ്സിലാക്കിയപ്പോഴാണ് മാറാൻ തീരുമാനിച്ചതെന്ന് ജെസ്സിക്ക ജെറോം എന്ന യുവതി പറയുന്നു. ഗതാഗതക്കുരുക്കിലും ഉയർന്ന ചെലവിലും വീടില്ലാതെ മുന്നോട്ട് പോകാൻ കഴിയാതെ വന്നതോടെയാണ് താൻ ഈ തീരുമാനമെടുത്തതെന്നും അവർ കൂട്ടിച്ചേർത്തു.
താങ്ങാനാവുന്ന ഭവനങ്ങളും കൂടുതൽ സ്ഥലവുമാണ് ആളുകളെ ആൽബർട്ടയിലേക്ക് ആകർഷിക്കുന്ന പ്രധാന ഘടകങ്ങൾ. സ്റ്റാറ്റിസ്റ്റിക്സ് കാനഡയുടെ കണക്കുകൾ പ്രകാരം 2025-ന്റെ ആദ്യ രണ്ട് പാദങ്ങളിൽ മാത്രം പ്രവിശ്യകൾ തമ്മിലുള്ള കുടിയേറ്റത്തിലൂടെ 12,880 പുതിയ താമസക്കാരെയാണ് ആൽബർട്ടയിലേക്ക് നേടിയത്. ഇതേ കാലയളവിൽ ഒന്റാറിയോയ്ക്ക് 11,474 താമസക്കാരെ മറ്റ് പ്രവിശ്യകളിലേക്ക് നഷ്ടമായി. ഇതിന്റെ ഭാഗമായി ആൽബർട്ട ഗവൺമെന്റ് ഒന്റാരിയോയെ ലക്ഷ്യമിട്ട് “You’re hired,” “Hey Hamilton, what is North America’s most livable city? Calgary” തുടങ്ങിയ ആകർഷകമായ പരസ്യവാചകങ്ങളോടെ വൻ മാർക്കറ്റിംഗ് കാമ്പയിനും നടത്തിയിരുന്നു.
300,000 മുതൽ 400,000 ഡോളറിനുള്ളിൽ ഒരു വീട് വാങ്ങാൻ ശ്രമിച്ചെങ്കിലും ജി.ടി.എ.യിൽ അത് അപ്രാപ്യമായി തുടർന്നതോടെയാണ് ജെസ്സിക്കയും കുടുംബവും ലോയ്ഡ്മിൻസ്റ്ററിലേക്ക് മാറിയത്. “ഞങ്ങൾ എത്ര പണം സ്വരൂപിച്ചാലും ജി.ടി.എയിൽ ഒരു വീട് വാങ്ങാൻ അത് മതിയാകില്ലായിരുന്നു,” ജെസ്സിക്ക പറയുന്നു. നിലവിൽ 300,000-350,000 ഡോളറിന് നാല് കിടപ്പുമുറികളുള്ള വീട് വാങ്ങാൻ തങ്ങൾക്ക് ഇവിടെ സാധിക്കുമെന്നും അവർ വ്യക്തമാക്കി.
അതേസമയം, ജി.ടി.എയിൽ ഒരു ഒറ്റപ്പെട്ട വീടിന്റെ ശരാശരി വില $1,403,800 ആയി ഉയർന്നു. എന്നാൽ കാൽഗറിയിൽ ഇത് $744,400 മാത്രമാണ്. ജോലിയുള്ളവർക്ക് ശമ്പളത്തിൽ മാറ്റമില്ലാതെ കുറഞ്ഞ വിലയിൽ വീട് ലഭിക്കുമെന്നതാണ് ആൽബർട്ടയുടെ മുഖ്യ ആകർഷണം.
തുടർച്ചയായ ഈ പുറത്തേക്ക് പോക്ക് ദീർഘകാല പ്രത്യാഘാതങ്ങൾ ഉണ്ടാക്കുമെന്ന് വിദഗ്ദ്ധർ മുന്നറിയിപ്പ് നൽകുന്നു. കാനഡയിലെ ഏറ്റവും വലിയ നിർമ്മാണ വ്യവസായ അസോസിയേഷനായ ബി.ഐ.എൽ.ഡി.യുടെ (BILD) സി.ഒ.ഒ. ജസ്റ്റിൻ ഷെർവുഡ് പറയുന്നതനുസരിച്ച്, ആൽബെർട്ടയുമായി താരതമ്യം ചെയ്യുമ്പോൾ ഒന്റാരിയോയിൽ ഭവന നിർമ്മാണത്തിന് ചെലവ് കൂടുതലാണ്.
സർക്കാർ ഫീസുകളും പുതിയ ഭവന പദ്ധതികൾക്ക് അംഗീകാരം ലഭിക്കാൻ ജി.ടി.എയിൽ എടുക്കുന്ന കാലതാമസവുമാണ് പ്രധാന പ്രശ്നം. “നമ്മൾ ആശ്രയിക്കുന്ന തൊഴിലാളികളെ, അവർക്ക് ഇവിടെ ജീവിക്കാൻ കഴിയാത്തതിനാൽ കയറ്റുമതി ചെയ്യുകയാണ്” എന്ന് സിവിക് ആക്ഷൻ സിഇഒ ലെസ്ലി വൂ അഭിപ്രായപ്പെട്ടു. താങ്ങാനാവുന്ന ജീവിതച്ചെലവും അവസരങ്ങളും ഒരുമിക്കാതെ വരുമ്പോൾ ഇത്തരം കുടിയൊഴിഞ്ഞ് പോകലുകൾ വർധിക്കുമെന്നും വിദഗ്ധർ പറയുന്നു.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Tired of life on the ‘hamster wheel’; 35,000 families ‘seek refuge’ in Alberta
