എഡ്മണ്ടൺ: ആൽബർട്ട യൂണിയൻ ഓഫ് പ്രൊവിൻഷ്യൽ എംപ്ലോയീസ് (AUPE) പ്രതിനിധീകരിക്കുന്ന നേഴ്സിങ് കെയർ ജീവനക്കാരിൽ 98 ശതമാനവും പണിമുടക്ക് നടപടിക്ക് അനുകൂലമായി വോട്ട് ചെയ്തു. യൂണിയൻ പ്രസിഡന്റ് സാന്ദ്ര അസോകറാണ് ഈ കാര്യ പ്രഖ്യാപിച്ചത്. ഒക്ടോബർ 30 നും നവംബർ 3 നും ഇടയിൽ നടന്ന വോട്ടെടുപ്പിൽ 11,031 അംഗങ്ങൾ പങ്കെടുത്തു.
” വേതനത്തിലും തൊഴിലാളികളെയും രോഗികളെയും ആൽബർട്ടയുടെ പൊതുജനാരോഗ്യ വ്യവസ്ഥയെയും ദോഷകരമായി ബാധിക്കുന്ന സുരക്ഷിതമല്ലാത്ത തൊഴിൽ സാഹചര്യങ്ങളിലും അവർ മടുത്തതിനാലാണ് ഇത്രയധികം പേർ പണിമുടക്കിന് അനുകൂലമായി വോട്ട് ചെയ്തത്,” അസോകർ ബുധനാഴ്ച എഡ്മന്റണിൽ നടത്തിയ വാർത്താ സമ്മേളനത്തിൽ പറഞ്ഞു. 16,000 അംഗങ്ങളുള്ള ഈ ഗ്രൂപ്പിൽ ഭൂരിഭാഗവും ലൈസൻസുള്ള പ്രാക്ടിക്കൽ നേഴ്സുമാരും (LPN-കൾ) ഹെൽത്ത് കെയർ എയ്ഡുകളുമാണ്.
AUPE-യും അവരുടെ തൊഴിലുടമകളായ ആൽബർട്ട ഹെൽത്ത് സർവീസസും മറ്റ് നാല് ആരോഗ്യ സ്ഥാപനങ്ങളുമായുള്ള ചർച്ചകൾ ഏപ്രിലിൽ പരാജയപ്പെട്ടിരുന്നു. വ്യാഴാഴ്ച മധ്യസ്ഥതയ്ക്കായി ചർച്ചകൾ പുനരാരംഭിക്കാൻ ഇരിക്കുകയാണ്. യൂണിയൻ നവംബർ 17 ന് തന്നെ പണിമുടക്ക് നോട്ടീസ് നൽകാൻ സാധ്യതയുണ്ട്. “ഞങ്ങളുടെ അംഗങ്ങൾക്ക് ജോലി ചെയ്യുന്നതാണ് താൽപ്പര്യം, പക്ഷേ അവർക്ക് അർഹമായത് നേടിയെടുക്കാനും ആവശ്യമെങ്കിൽ ജോലിയിൽ നിന്ന് വിട്ടുനിൽക്കാനും അവർ തയ്യാറാണ്,” അസോകർ കൂട്ടിച്ചേർത്തു.
ധനമന്ത്രിയും ട്രഷറി ബോർഡ് പ്രസിഡന്റുമായ നേറ്റ് ഹോർണർ പണിമുടക്ക് വോട്ടെടുപ്പിൽ നിരാശ പ്രകടിപ്പിച്ചു. നാല് വർഷത്തിനിടെ 12 ശതമാനം വേതന വർദ്ധനയാണ് സർക്കാർ വാഗ്ദാനം ചെയ്യുന്നതെന്നും, ഇത് മറ്റ് 87 പൊതുമേഖലയിലെ കരാറുകൾക്ക് സമാനമായ ന്യായമായ, മത്സരാധിഷ്ഠിത കരാറാണ് എന്നും അദ്ദേഹം പറഞ്ഞു. എന്നാൽ AUPE LPN-കൾക്ക് രജിസ്റ്റർ ചെയ്ത നേഴ്സുമാർക്ക് (RN-കൾ) തുല്യമായ ശമ്പളം വേണമെന്നും, 40 മുതൽ 55 ശതമാനം വരെ ശമ്പള വർദ്ധനയും, കുറഞ്ഞ വാർഷിക ജോലി സമയവുമാണ് ആവശ്യപ്പെടുന്നതെന്നും ഹോർണർ ചൂണ്ടിക്കാട്ടി. ഈ നിർദ്ദേശങ്ങൾക്കാകെ 2 ബില്യൺ ഡോളറിലധികം ചെലവ് വരുമെന്നും, LPN-കൾക്ക് RN-മാരുടേതിന് സമാനമായ വിദ്യാഭ്യാസമോ വിപുലമായ പ്രവൃത്തി പരിചയപരിധിയോ (scope of practice) ഇല്ലെന്ന വസ്തുത പരിഗണിക്കേണ്ടതുണ്ടെന്നും അദ്ദേഹം കൂട്ടിച്ചേർത്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
98% of nursing care workers go on strike; public health in Alberta is a concern
