“കഫേ ഓൺ എയർ”; വാൻകൂവർ വിമാനത്താവളത്തിൽ എയർ കാനഡയുടെ പ്രീമിയം ‘കഫേ’

വാൻകൂവർ: വിമാനത്താവളങ്ങളിലെ സൗകര്യങ്ങൾ മെച്ചപ്പെടുത്തുന്നതിന്റെ ഭാഗമായി എയർ കാനഡ തങ്ങളുടെ പുതിയ കഫേ വാൻകൂവർ അന്താരാഷ്ട്ര വിമാനത്താവളത്തിൽ (YVR) തുറന്നു. ‘എയർ കാനഡ കഫേ’ എന്ന പേരിലുള്ള ഈ പുതിയ ‘ഗ്രാബ്-ആൻഡ്-ഗോ’ ലോഞ്ച് സൗകര്യം എയർ കാനഡയുടെ നാലാമത്തെ കഫേ ലൊക്കേഷനാണ്. യാത്ര പുറപ്പെടുന്നതിന് മുൻപ് ഭക്ഷണം കഴിക്കാനും ജോലി ചെയ്യാനും വിശ്രമിക്കാനുമുള്ള ഒരു പ്രീമിയം ഇടമാണ് ഇത്.

വാൻകൂവറിലെ ഡൊമസ്റ്റിക് ടെർമിനലിൽ C46-നും C47-നും ഇടയിലാണ് പുതിയ കഫേ സ്ഥിതി ചെയ്യുന്നത്. വാൻകൂവറിന്റെ പ്രകൃതി സൗന്ദര്യവും അവിടുത്തെ സാംസ്കാരിക വൈവിധ്യവും മണ്ണുമായുള്ള ബന്ധവും എല്ലാം ഈ കഫേയുടെ രൂപകൽപ്പനയ്ക്ക് പ്രചോദനമായിട്ടുണ്ട്. 52 പേർക്ക് ഇവിടെ ഇരിക്കാൻ സൗകര്യമുണ്ട്. വളരെ വേഗത്തിൽ ഭക്ഷണം കഴിച്ച ശേഷം യാത്രക്കാർക്ക് വേണമെങ്കിൽ അത് വിമാനത്തിലേക്ക് കൊണ്ടുപോകാനും കഴിയും.

ഏകദേശം 2,142 ചതുരശ്ര അടി വിസ്തീർണ്ണമുള്ള ഈ കഫേയിൽ പ്രാദേശിക രുചികൾക്ക് പ്രാധാന്യം നൽകുന്നുണ്ട്. ‘നാനൈമോ ബാർസ്’ പോലുള്ള വാൻകൂവറിന്റെ പ്രശസ്തമായ പലഹാരങ്ങൾ മുതൽ ഏഷ്യൻ സ്വാദുള്ള ലഘുഭക്ഷണങ്ങൾ വരെ ഇവിടെ ലഭിക്കും. കൂടാതെ, സ്വയം എടുക്കാവുന്ന (self-serve) പാനീയങ്ങളുടെ വലിയൊരു ശേഖരവും ഇവിടെ ഒരുക്കിയിട്ടുണ്ട്. കഫേയിൽ ഓരോ സീറ്റിലും പവർ പോയിന്റുകൾ ഉള്ളതിനാൽ യാത്രക്കാർക്ക് തടസ്സമില്ലാതെ കണക്ട് ചെയ്ത് ജോലി ചെയ്യാനും സാധിക്കും.

വിമാനത്തിന്റെ ബോഡിയെ ഓർമ്മിപ്പിക്കുന്ന സീലിംഗ്, പ്രകൃതിദത്തമായ വളവുകൾ എന്നിവയെല്ലാം ചേർത്താണ് കഫേയുടെ ഡിസൈൻ ചെയ്തിരിക്കുന്നത്. വാൻകൂവർ ആസ്ഥാനമായുള്ള ചൈനീസ്-കനേഡിയൻ കലാകാരനായ സ്കോട്ട് സ്യൂം ഒരുക്കിയ നാല് ഒറിജിനൽ കലാസൃഷ്ടികളും ഇവിടെ പ്രദർശിപ്പിച്ചിട്ടുണ്ട്. വാൻകൂവറിന്റെ അതുല്യമായ സ്വഭാവവും വിമാനനിർമ്മാണത്തിന്റെ കൃത്യതയും തമ്മിലുള്ള സന്തുലിതാവസ്ഥ ഈ ഡിസൈനിൽ കൊണ്ടുവരാൻ ശ്രമിച്ചിട്ടുണ്ടെന്ന് കഫേ രൂപകൽപ്പന ചെയ്ത സ്മാർട്ട് ഡിസൈൻ കമ്പനിയുടെ ഡയറക്ടർ പർ ബെയിൻ പറഞ്ഞു.

ബോർഡിംഗ് പാസ് സ്കാൻ ചെയ്ത് ഈ കഫേയിലേക്ക് പ്രവേശിക്കാൻ സാധിക്കും. ബിസിനസ് ക്ലാസ്സിൽ യാത്ര ചെയ്യുന്നവർക്കും, എയർ കാനഡയുടെ എയറോപ്ലാൻ എലൈറ്റ് സ്റ്റാറ്റസ് (50K, 75K, സൂപ്പർ എലൈറ്റ്) ഉള്ളവർക്കും, സ്റ്റാർ അലയൻസ് ഗോൾഡ് അംഗങ്ങൾക്കും, മറ്റ് ചില എയറോപ്ലാൻ പ്രീമിയം കാർഡുകൾ ഉള്ളവർക്കുമാണ് ഈ ലോഞ്ചിൽ പ്രവേശനം ലഭിക്കുക. യാത്രക്കാർക്ക് വിമാനത്താവളത്തിലെ സമയം കൂടുതൽ ആസ്വാദ്യകരമാക്കാൻ ഈ പുതിയ കഫേ ഉപകരിക്കുമെന്നാണ് എയർ കാനഡയുടെ പ്രതീക്ഷ.

air-canada-cafe-yvr-location-features-grab-and-go

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt