ലോകമെമ്പാടുമുള്ള ടെക് കമ്പനികൾ ചെലവ് ചുരുക്കുന്നതിൻ്റെ ഭാഗമായി നടത്തുന്ന കൂട്ടപ്പിരിച്ചുവിടലുകളുടെ നിരയിലേക്ക് ആമസോണും ചേരുന്നതായി റിപ്പോർട്ട്. ഒറ്റയടിക്ക് ഏകദേശം 30,000 ജീവനക്കാരെ പിരിച്ചുവിടാൻ ആമസോൺ ഒരുങ്ങുകയാണ് എന്നാണ് പുറത്തുവരുന്ന വിവരം. ഇത് ആമസോണിൻ്റെ ഏകദേശം 3,50,000 വരുന്ന കോർപ്പറേറ്റ് ജീവനക്കാരുടെ 10 ശതമാനം വരുമെന്നതിനാൽ ജീവനക്കാർക്കിടയിൽ വലിയ ആശങ്കയാണ് നിലനിൽക്കുന്നത്.
കഴിഞ്ഞ കുറച്ച് വർഷങ്ങൾക്കിടയിൽ ആമസോൺ നടത്തുന്ന ഏറ്റവും വലിയ പിരിച്ചുവിടലാണിത്. 2022-ൽ ഏകദേശം 27,000 പേരെ പിരിച്ചുവിട്ടതിന് ശേഷമുള്ള ഏറ്റവും വലിയ നടപടിയായിരിക്കും ഇത്. ഡിവൈസസ്, കമ്മ്യൂണിക്കേഷൻസ്, പോഡ്കാസ്റ്റിംഗ് തുടങ്ങിയ പല വിഭാഗങ്ങളിലും ആമസോൺ കഴിഞ്ഞ രണ്ട് വർഷങ്ങളിൽ പിരിച്ചുവിടൽ നടത്തിയിരുന്നു. എച്ച് ആർ (HR), ഓപ്പറേഷൻസ്, ഡിവൈസസ് ആൻഡ് സർവീസസ്, ആമസോൺ വെബ് സർവീസസ് (AWS) തുടങ്ങിയ വിഭാഗങ്ങളെയാകും പുതിയ നീക്കം പ്രധാനമായും ബാധിക്കുക.
മാനേജർമാരുടെ എണ്ണം കുറയ്ക്കുന്നതിനും നടപടിക്രമങ്ങൾ കൂടുതൽ സുതാര്യമാക്കുന്നതിനും വേണ്ടിയാണ് ഈ പിരിച്ചുവിടൽ എന്നാണ് ആമസോൺ സിഇഒ ആൻഡി ജാസി നൽകുന്ന വിശദീകരണം. കാര്യക്ഷമത കുറഞ്ഞ ജീവനക്കാരെ കണ്ടെത്താനായി ആൻഡി ജാസി നേരത്തെ ഒരു പരാതി സംവിധാനം ഏർപ്പെടുത്തിയിരുന്നു. ഇതിന് വലിയ പ്രതികരണം ലഭിച്ചതിന് പിന്നാലെയാണ് ഈ കൂട്ടപ്പിരിച്ചുവിടൽ എന്നതും ശ്രദ്ധേയമാണ്. കമ്പനിയുടെ സാമ്പത്തിക മുൻഗണനകൾ മാറുന്നതനുസരിച്ച് പിരിച്ചുവിടുന്നവരുടെ എണ്ണത്തിലും മാറ്റം വരാൻ സാധ്യതയുണ്ട്.
കൂടുതൽ നിക്ഷേപം ആർട്ടിഫിഷ്യൽ ഇൻ്റലിജൻസിലേക്ക് (AI) കേന്ദ്രീകരിക്കാനുള്ള ആമസോണിൻ്റെ ശ്രമങ്ങളുടെ ഭാഗം കൂടിയാണ് ഈ നീക്കമെന്നും റിപ്പോർട്ടുകളുണ്ട്. എഐ മൂലം പലർക്കും ജോലി നഷ്ടപ്പെട്ടേക്കും എന്ന് ആൻഡി ജാസി നേരത്തെ സൂചന നൽകിയിരുന്നു. നിലവിൽ എഐ കേന്ദ്രീകൃത തൊഴിൽ സാഹചര്യങ്ങളിലേക്ക് മാറാൻ ആമസോൺ ശ്രമിക്കുന്ന സമയം കൂടിയാണിത്.
വർക്ക് ഫ്രം ഹോം സമ്പ്രദായം വെട്ടിക്കുറച്ച് അഞ്ച് ദിവസവും ഓഫീസിൽ ഹാജരാകാൻ ആമസോൺ ജീവനക്കാരോട് ആവശ്യപ്പെട്ടിരുന്നു. എന്നാൽ ചില ജീവനക്കാർ ഇപ്പോഴും ഇത് പാലിക്കുന്നില്ല. ഈ കാരണങ്ങൾ കൊണ്ടുകൂടിയാണ് ആമസോൺ ഇത്തരത്തിൽ കടുത്ത നടപടികളിലേക്ക് കടക്കുന്നത് എന്നും റിപ്പോർട്ടുകൾ സൂചിപ്പിക്കുന്നു. പിരിച്ചുവിടപ്പെടുന്ന ജീവനക്കാർക്ക് മതിയായ ആനുകൂല്യങ്ങൾ നൽകിയ ശേഷമായിരിക്കും നടപടികൾ പൂർത്തിയാക്കുക.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Jobs will be lost: 30,000 people will be out! Amazon’s massive layoffs have shocked the tech world, report out
