ഫിറ്റ്നെസ് പ്രേമികളുടെ ഡയറ്റിലെ മുഖ്യഘടകമാണ് പ്രൊട്ടീൻ. കരുത്തിനും മസിലുകളുടെ വളർച്ചയ്ക്കുമായി ഒരു ഡസൻ മുട്ടയുടെ വെള്ളയടക്കം പ്രൊട്ടീൻ സമ്പുഷ്ടമായ ഭക്ഷണങ്ങൾ കഴിക്കുന്നത് സാധാരണമാണ്. എന്നാൽ, ശരീരത്തിലെത്തുന്ന പ്രൊട്ടീന്റെ അളവ് അമിതമായാൽ ഗുണത്തേക്കാളേറെ ദോഷമാണ് ഫലമെന്ന് മുന്നറിയിപ്പ് നൽകുകയാണ് കാർഡിയോളജിസ്റ്റായ ഡോ. ദിമിത്രി യാരനോവ്. ‘ഹൈ-പ്രൊട്ടീൻ ഡയറ്റ് 35 വയസ്സിൽ ഹൃദയാഘാതത്തിന് കാരണമാകും’ എന്ന തലക്കെട്ടോടെയാണ് അദ്ദേഹം ഇൻസ്റ്റാഗ്രാം റീലിലൂടെ ഈ അപകടവശങ്ങൾ വിശദീകരിക്കുന്നത്.
പ്രൊട്ടീനുവേണ്ടി വർഷങ്ങളോളം മാംസാഹാരം മാത്രം കഴിക്കുന്നത് ഹൃദയത്തെ എങ്ങനെ ദോഷകരമായി ബാധിക്കുമെന്നാണ് ഡോക്ടർ വീഡിയോയിൽ പ്രധാനമായും പറയുന്നത്. പുറമേക്ക് കരുത്തനായി തോന്നാമെങ്കിലും, അകവശം അത്ര ആരോഗ്യകരമായിരിക്കില്ല. എൽഡിഎൽ (മോശം കൊളസ്ട്രോൾ) വർധിക്കുന്നത്, എൻഡോതെലിയൽ ഡിസ്ഫങ്ഷൻ, തുടർച്ചയായ വീക്കം എന്നിവയെല്ലാം അമിതമായ പ്രൊട്ടീൻ ഡയറ്റിന്റെ പാർശ്വഫലങ്ങളാണെന്ന് ഡോക്ടർ ചൂണ്ടിക്കാണിക്കുന്നു.
ശാരീരികക്ഷമതയുള്ളവർ പോലും ശ്രദ്ധിക്കണമെന്നും അദ്ദേഹം പറയുന്നു. “ഹൃദയാഘാതം വന്നിട്ടുള്ള ശാരീരികക്ഷമതയുള്ള 35 വയസ്സുകാരെ ഞാൻ പരിചരിച്ചിട്ടുണ്ട്. അവർക്ക് പ്രത്യേകിച്ച് ലക്ഷണങ്ങളൊന്നും ഉണ്ടായിരുന്നില്ല. ഇത് പൊട്ടാൻ കാത്തിരിക്കുന്ന ഒരു ടൈംബോംബ് കണക്കെയുള്ള ഒന്നാണ്,” ഡോക്ടർ പറയുന്നു. കായികക്ഷമതയുണ്ടെന്നതിന് അർഥം നിങ്ങൾ ആരോഗ്യവാനാണെന്നല്ലെന്നും ഡോ. യാരനോവ് ഓർമ്മിപ്പിക്കുന്നു.
“ഒരു സിക്സ് പാക്ക് നിങ്ങളെ രക്ഷിക്കില്ല. നിങ്ങളുടെ ഡയറ്റ് നിങ്ങളുടെ എൻഡോതെലിയത്തെ (രക്തക്കുഴലുകളുടെ ആന്തരഭിത്തി) നശിപ്പിക്കുന്നുവെങ്കിൽ നിങ്ങൾക്ക് എത്ര കരുത്തുള്ള ബൈസെപ്സ് ഉണ്ടെന്ന് പറഞ്ഞിട്ടും കാര്യമില്ല.” ആരോഗ്യവാനായിരിക്കുക എന്നതിന് അർത്ഥം അമിതമായ വ്യായാമമോ പ്രൊട്ടീനോ അല്ലെന്നും, എല്ലാത്തിലും സന്തുലിതാവസ്ഥ കണ്ടെത്താൻ കഴിയുകയാണെന്നും അദ്ദേഹം ഉപദേശിക്കുന്നു. ഹൃദയാരോഗ്യം സംരക്ഷിക്കാൻ ഡയറ്റിൽ മിതത്വം പാലിക്കേണ്ടതിന്റെ ആവശ്യകതയാണ് ഈ മുന്നറിയിപ്പിലൂടെ ഡോക്ടർ അടിവരയിടുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
High-protein diet to build muscle; Heart attack at age 35 may occur: Studies say
